كەزدەسۋ بارىسىندا نۇرسۇلتان نازارباەۆ جوزە مانۋەل بارروزۋعا استانا كلۋبىنىڭ وتىرىسىنا كەلگەنى ءۇشىن ريزاشىلىق ءبىلدىردى.
مەملەكەت باسشىسى ەۋروپالىق كوميسسيانىڭ بۇرىنعى توراعاسىنىڭ قازاقستان مەن ەۋروپالىق وداق اراسىنداعى قارىم-قاتىناستاردى نىعايتۋ ىسىنە قوسقان ۇلەسىن اتاپ ءوتتى.
– مەن سىزبەن تاعى دا جۇزدەسىپ وتىرعانىما قۋانىشتىمىن. ءسىز ءاردايىم قازاقستانعا قولداۋ كورسەتتىڭىز. سونىڭ ارقاسىندا ەلىمىزدىڭ ەۋروپالىق وداقپەن سەرىكتەستىگى جونىندەگى كەلىسىمگە قول قويىلدى. قازىرگى تاڭدا بۇل قۇجات راتيفيكاتسيالانۋ ۇدەرىسىنەن ءوتىپ جاتىر, – دەدى قازاقستان پرەزيدەنتى.
جوزە مانۋەل بارروزۋ كەزدەسكەنى جانە استانا كلۋبىنىڭ جۇمىسىنا قاتىسۋعا شاقىرعانى ءۇشىن نۇرسۇلتان نازارباەۆقا العىس ايتتى.
– سىزبەن قايتا كەزدەسۋ – مەن ءۇشىن زور مارتەبە. بريۋسسەلگە تاريحي ساپارمەن كەلگەنىڭىز ەسىمدە. سول كەزدە قازاقستان مەن ەۋروپالىق وداق اراسىندا ىنتىماقتاستىق ورناتۋ جونىندە تاريحي شەشىم قابىلدانعان بولاتىن. بۇگىندە قازاقستاننىڭ تۇراقتىلىقتى ساقتاپ, وڭىردە ماڭىزدى ءرول اتقارىپ وتىرعانىن كورگەنىمە قۋانىشتىمىن, – دەدى ەۋروپالىق كوميسسيانىڭ بۇرىنعى توراعاسى.مەملەكەت باسشىسى نۇرسۇلتان نازارباەۆ ەۋروپالىق كوميسسيانىڭ بۇرىنعى توراعاسى جوزە مانۋەل بارروزۋمەن كەزدەستى.
