«ەلباسىنىڭ بيىلعى 7 قاراشادا قاۋىپسىزدىك كەڭەسىندە بەرگەن تاپسىرمالارىن ەنەرگەتيكا مينيسترلىگى ورىندايدى», — دەپ باياندادى ق. بوزىمباەۆ.
مەملەكەت باسشىسىنىڭ تاپسىرماسىنا سايكەس ەنەرگيا ءوندىرۋشى ۇيىمداردىڭ ەلەكتر ەنەرگياسىنا ارنالعان شەكتى تاريفتەرىنىڭ وبەكتيۆتى دەڭگەيى بەلگىلەنەتىن بولادى.
«2019 جىلعى 1 قاڭتاردان باستاپ ەلەكتر قۋاتىنىڭ نارىعى ەنگىزىلگەن سوڭ ەلەكتر ەنەرگياسىن ءوندىرۋ سەكتورى ءۇشىن جاڭا تاريفتىك ءادىسناما قولدانىلادى», — دەدى ق. بوزىمباەۆ.
ەنەرگيا ءوندىرۋشى ۇيىمداردىڭ ەلەكتر ەنەرگياسىنىڭ قۇنى قۋات ءتاريفى جانە ەلەكتر ەنەرگياسىنا تاريف رەتىندە بولىنەتىن بولادى. مينيسترلىك ەكى كومپونەنتتىڭ (قۋات باعاسى مەن ەلەكتر ەنەرگياسىنىڭ باعاسى) قوسىندىسى بويىنشا ەلەكتر ستانتسيالارى ءۇشىن ەلەكتر ەنەرگياسىنا باعانى تومەندەتۋ بويىنشا شارالار قابىلدايدى.
«بۇگىنگى تاڭدا نەگىزگى ەلەكتر ستانتسيالارىن تەكسەرۋ بويىنشا باس پروكۋراتۋرامەن بىرلەسكەن جۇمىس اياقتالدى. ەنەرگەتيكا مينيسترلىگىندە كەستە بەكىتىلىپ, بارلىق ەنەرگيا ءوندىرۋشى ۇيىمداردى تىڭداۋ باستالدى. اتالعان جۇمىستى بيىلعى 20 قاراشاعا دەيىن اياقتايمىز. وسى ايدىڭ سوڭىنا دەيىن ءتيىستى بۇيرىق قابىلدانۋى ءتيىس», — دەدى مينيستر.
ەلەكتر ەنەرگياسىنا وبەكتيۆتى شەكتى تاريفتەردى بەلگىلەۋ ەنەرگيا ءوندىرۋشى ۇيىمداردىڭ ساتۋ باعاسىن تومەندەتۋگە مۇمكىندىك بەرەدى.
مينيستر ەنەرگيا ءوندىرۋشى ۇيىمداردىڭ ساتۋ باعاسىن وزگەرتۋىنىڭ نەگىزىندە, تابيعي مونوپوليالار سالالارىندا باسشىلىقتى جۇزەگە اسىراتىن ۋاكىلەتتى ورگان (تابيعي مونوپوليالاردى رەتتەۋ, باسەكەلەستىكتى جانە تۇتىنۋشىلاردىڭ قۇقىقتارىن قورعاۋ كوميتەتى) تۇپكى تۇتىنۋشىلار ءۇشىن ەلەكتر ەنەرگياسىنىڭ قۇنىن تومەندەتۋ بويىنشا شارالار قابىلداۋى ءتيىس ەكەنىن ايتتى.
بۇدان وزگە, ەنەرگيا ءوندىرۋشى ۇيىمداردىڭ ەلەكتر ەنەرگياسىنا تاريفتەرىن تومەندەتۋ ماقساتىندا ەنەرگەتيكا مينيسترلىگى بۇيرىق جوباسىن ازىرلەدى. بۇل جوبادا تاۋارلىق گازدىڭ شەكتى كوتەرمە باعالارىن تومەندەتۋ كوزدەلگەن.
ء«بىزدىڭ باعالاۋىمىز بويىنشا, كوتەرمە ساۋدا باعاسىن 2019 جىلعى 1 قاڭتاردان باستاپ تومەندەتۋ − تاۋارلىق گازدىڭ تۇپكىلىكتى باعاسىن وڭىرگە بايلانىستى گاز پايدالاناتىن ەلەكتر ستانتسيالارى ءۇشىن 6-15%-عا تومەندەتۋگە مۇمكىندىك بەرەدى. بۇيرىقتى وسى جىلدىڭ قاراشا ايىنىڭ سوڭىندا بەكىتۋ جوسپارلانعان», — دەدى مينيستر.
ەنەرگەتيكا مينيسترلىگىنىڭ گازعا كوتەرمە ساۋدا باعالارىن تومەندەتۋ نەگىزىندە, تابيعي مونوپوليالاردى رەتتەۋ كوميتەتى ءتيىستى بۇيرىقتار قابىلداپ, ەلەكتر ستانتسيالارى ءۇشىن گاز باعاسىن تومەندەتۋى ءتيىس.
ەلەكتر ەنەرگياسى مەن تاۋارلىق گاز باعالارىن تومەندەتۋگە باعىتتالعان شارالار 2018 جىلعى قاراشا ايىنىڭ سوڭىنا دەيىن مينيسترلىكتىڭ ءتيىستى بۇيرىعى رەتىندە بەكىتىلەدى. اتالعان بۇيرىق 2019 جىلدىڭ 1 قاڭتارىنان باستاپ قولدانىسقا ەنگىزىلەدى.
