كورمەدە پرەزيدەنت ءارحيۆىنىڭ قورىندا ساقتالعان تەڭگەنى اينالىمعا ەنگىزۋ بويىنشا دايىندىق شارالارىنا قاتىستى قۇجاتتار, پرەزيدەنت ن.ءا.نازارباەۆتىڭ جارلىقتارى, ۇلتتىق ۆاليۋتانى اينالىمعا ەنگىزۋ بويىنشا مەملەكەتتىك كوميسسيا ءماجىلىسىنىڭ حاتتامالارى, وسى ماسەلە بويىنشا ازاماتتاردىڭ حاتتارى, ەلباسىنىڭ ەستەلىكتەرى جانە تاعى باسقا بىرەگەي قۇجاتتار تۇڭعىش رەت كوپشىلىك نازارىنا ۇسىنىلدى. سونىمەن قاتار كورمە ەكسپوزيتسياسىن وتىرار مەملەكەتتىك ارحەولوگيالىق قورىق-مۋزەيى مەن «ازىرەت سۇلتان» مەملەكەتتىك تاريحي-مادەني قورىق-مۋزەيى ۇسىنعان قازاقستان جەرىندە ورتا عاسىرلاردان باستاپ اينالىستا بولعان تيىن-مونەتالار مەن وزگە دە اقشا ۇلگىلەرى تولىقتىردى.
وسى ايتۋلى مەرەكە قارساڭىندا ۇيىمداستىرىلعان شاراعا اتالعان مەكەمە باسشىلارىمەن قاتار, الماتى قالاسى مادەنيەت جانە ارحيۆتەر باسقارماسىنىڭ وكىلدەرى, الماتى قالاسىندا ورنالاسقان ورتالىق مەملەكەتتىك ارحيۆتەردىڭ باسشىلارى, قارجى جانە بانك سالاسىنىڭ قىزمەتكەرلەرى, تەڭگەنىڭ العاشقى اۆتورلارىنىڭ ءبىرى حايروللا عابجاليلوۆ, ۇلتتىق بانك توراعاسىنىڭ ورىنباسارى قىزمەتىن اتقارعان ەرلەن جانگەلدين جانە قوعام قايراتكەرلەرى قاتىستى.
پرەزيدەنت ءارحيۆىنىڭ ديرەكتورى ءجاميلا ابدىقادىروۆا ۇلتتىق ۆاليۋتامىزدى اينالىمعا ەنگىزۋ تاۋەلسىز قازاقستاننىڭ جىلناماسىنداعى ەڭ ماڭىزدى وقيعالاردىڭ ءبىرى ەكەندىگىنە نازار اۋداردى.
– بۇل ەلىمىزدىڭ تاۋەلسىزدىگىن نىعايتۋ جولىنداعى تۇبەگەيلى الەۋمەتتىك-ەكونوميكالىق رەفورمالاردى جۇرگىزۋ ءۇشىن قاجەتتى تاريحي قادام بولدى. ءتول تەڭگەمىز پايدا بولعالى جۇرگىزىلىپ كەلە جاتقان مەملەكەتتىڭ تىزبەكتى قارجىلىق ساياساتىنىڭ ارقاسىندا ەلىمىزدە نارىقتىق ينستيتۋتتار ماكروەكونوميكالىق تۇرعىدان تۇراقتالىپ, بىرتىندەپ قالىپتاسا باستادى. ەلباسى ن.ءا.نازارباەۆتىڭ سىندارلى ساياساتىنىڭ ناتيجەسىندە ءوزىمىزدىڭ اقشا بىرلىگىمىزدى ەنگىزۋ قازىرگى كەزدەگى قول جەتكەن ەكونوميكالىق تابىستارىمىزدىڭ نەگىزىن قالادى, – دەپ اتاپ ءوتتى ج.ابدىقادىروۆا.
سونىمەن قاتار شارا بارىسىندا تەڭگەنىڭ 25 جىلدىق مەرەيتويىنىڭ قارساڭىندا پرەزيدەنت ءارحيۆى دايىنداعان «ۇلتتىق ۆاليۋتا تاريحىنان» اتتى قۇجاتتار جانە ماتەريالدار جيناعىنىڭ تۇساۋكەسەرى ءوتتى. جيناققا كسرو-نىڭ قۇلدىراۋىنان كەيىنگى تمد ەلدەرىندەگى, ونىڭ ىشىندەگى قازاقستانداعى قارجى سالاسىنىڭ قيىنشىلىقتارى, سوم ايماعىنىڭ جويىلۋ سەبەپتەرى, ۇلتتىق ۆاليۋتانى دايىنداۋ مەن ەنگىزۋدىڭ ۇيىمداستىرىلۋى, تاۋەلسىز قازاقستاننىڭ اقشا-قارجى جۇيەسىنىڭ دامۋىن باياندايتىن پرەزيدەنت ءارحيۆى قورلارىنداعى بىرەگەي قۇجاتتار, اتالعان تاقىرىپتا بۇقارالىق اقپارات قۇرالدارىندا جاريالانعان ماتەريالدار مەن ەلباسىنىڭ ەستەلىكتەرى ەنگىزىلگەن.
مۇحاممەد جىلگەلدينوۆ,
قازاقستان رەسپۋبليكاسى پرەزيدەنت ءارحيۆىنىڭ ديرەكتورىنىڭ كومەكشىسى,
عالىم سۇلەيمەن,
«ەگەمەن قازاقستان»
