ەكونوميكانىڭ وركەندەۋى, تۇرعىنداردىڭ كاسىپكەرلىككە, تابىسقا نەگىزدەلگەن ماتەريالدىق اۋقاتتىلىعى جانە تۇرمىس ساپاسىنىڭ ۇدايى ارتۋى, سونىمەن قوسا تابىس پەن تۇرمىس ساپاسىنىڭ جەتكىلىكتى قورعالۋى دەموكراتيالىق, قۇقىقتىق جانە قۋاتتى مەملەكەت قۇرۋدىڭ العىشارتى. ەلىمىزدە الەۋمەتتىك مەملەكەتتىڭ ىرگەتاسى اتا زاڭدا بەكىتىلۋ ارقىلى بەرىك قالانعان.
ەلباسى جولداۋىنىڭ كىرىسپە بولىگىندە, زاماناۋي پروگرەسسيۆتى مەملەكەت قۇرۋ بارىسىندا, تاريحي ولشەم بويىنشا قىسقا مەرزىمدە, ەلىمىزدە ساپالى, ناتيجەلى قۇرىلىمدىق, كونستيتۋتسيالىق جانە ساياسي رەفورمالار جۇرگىزىلگەنى جانە قازاقستان قوعامىن جاڭعىرتۋ ۇدەرىسىنىڭ جالعاسىپ جاتقانى ەسكەرىلگەن. دەمەك, جولداۋ – ەلىمىزدە جۇرگىزىلىپ جاتقان جاڭعىرتۋ ۇدەرىسىنىڭ, ستراتەگيالىق ساياساتتىڭ زاڭدى جالعاسى جانە ءتيىستى دەڭگەيىن قامتاماسىز ەتەتىن قۇجات.
«قولى جەتكەنشە نۇسقاعان – كوسەم», دەپ حالىق بەكەر ايتپايدى. جولداۋ كەز كەلگەن قازاقستاندىققا تۇسىنىكتى سوزبەن جازىلعاندىعىمەن, حالىقتىڭ تۇرمىس ساپاسىن ارتتىرۋ ماقساتىندا شەشىلۋگە ءتيىستى ماسەلەلەر ايقىندالعاندىعىمەن جانە ونى شەشۋ جولدارى كورسەتىپ بەرگەندىگىمەن قۇندى جانە باعدارلامالىق قۇجات بولىپ وتىر. جولداۋ حالىققا قانشا تۇسىنىكتى بولعانىمەن, ۇكىمەت جانە مەملەكەتتىك ورگاندار ءۇشىن ىستەيتىن جۇمىستىڭ كولەمى كەڭ ءارى كۇردەلى.
جولداۋدا ازاماتتاردىڭ الەۋمەتتىك-ەكونوميكالىق كونستيتۋتسيالىق قۇقىقتارىنىڭ ىسكە اسىرىلۋىنا مەملەكەت تاراپىنان كەپىلدىكتەر بەرىلگەن: ءوز كاسىبىن جاقسى مەڭگەرگەن ادامداردىڭ لايىقتى جالاقى الۋىنا, جەكە كاسىپ اشۋعا, ونى دامىتۋعا قولايلى مۇمكىندىك جاساۋ, شاعىن جəنە ورتا بيزنەستى دامىتۋ, ساپالى ءارى قولجەتىمدى باسپانامەن قامتاماسىز ەتۋ, ءومىر سۇرۋگە جايلى ورتا قالىپتاستىرۋ, ءبىلىم بەرۋ, دەنساۋلىق ساقتاۋ قىزمەتىنىڭ ساپاسىن كوتەرۋ, سپورت پەن دەنەشىنىقتىرۋدىڭ قولجەتىمدىلىگى, ساپالى ازىق-ت ۇلىكپەن قامتاماسىز ەتۋ جانە ت.ب.
سونىمەن ازاماتتاردىڭ كونستيتۋتسيالىق الەۋمەتتىك-ەكونوميكالىق قۇقىقتارىنىڭ ىسكە اسىرىلۋ جولدارى ناقتى ايقىندالىپ, ورىنداۋ مىندەتتىلىگى مەملەكەتتىك بيلىك ورگاندارىنا جۇكتەلگەن. وعان قوسا, جۇرگىزىلىپ جاتقان رەفورمالار مەن نەگىزگى ستراتەگيالىق قۇجاتتارداعى تاپسىرمالاردىڭ ورىندالۋىنا مونيتورينگ جۇرگىزەتىن, باعالايتىن ۇلتتىق جاڭعىرۋ كەڭسەسىنىڭ قۇرىلۋى حالىق – قازى, ەڭبەك – تارازى دەگەنگە سايادى. ونىڭ دالەلى, ۇكىمەت جولداۋدى ىسكە اسىرۋدىڭ جالپىۇلتتىق جوسپارىن دايىنداپ, بەكىتكەندىگى.
«دۇرىس قاناتتانعان ءتۇزۋ ۇشار» دەمەكشى, پرەزيدەنت قوعامنىڭ بارلىق سالاسىندا اتقارىلاتىن جۇمىستاردىڭ تابىستى بولۋىنىڭ بىردەن-ءبىر شارتى قۇقىق ۇستەمدىگى قاعيداسى ەكەنىن باسىپ ايتتى.
ادامداردىڭ تۇرمىس ساپاسىن انىقتايتىن ولشەمشارتتىڭ ءبىرى – قاۋىپسىزدىك, ادامداردىڭ ەشتەڭەگە الاڭداماي ءومىر سۇرەتىن ورتانى قۇرۋ. سوندىقتان قوعامدىق ءتارتىپتى قامتاماسىز ەتەتىن, قۇقىق بۇزۋشىلىقتار پروفيلاكتيكاسى, جول ءجۇرۋ قاۋىپسىزدىگى جانە ت.ب. قىزمەتتەرمەن اينالىساتىن ىشكى ىستەر ورگاندارى قىزمەتىنە, پوليتسيا قۇزىرىنا قاتىستى ناقتى تاپسىرما بەرىلدى. وسى تاپسىرمانى ورىنداۋ ماقساتىندا ۇكىمەت پەن پرەزيدەنت Əكىمشىلىگىمەن بىرلەسىپ, «ىشكى ىستەر ورگاندارىن جاڭعىرتۋ جونىندەگى جول كارتاسىن» قابىلداپ, رەفورمالار 2019 جىلدىڭ 1 قاڭتارىنان باستاپ جۇزەگە اسىرىلاتىن بولادى.
پوليتسيانىڭ جۇمىسىن سەرۆيستىك مودەلگە كوشىرۋ ارقىلى پوليتسيا جۇمىسىنىڭ تۇبەگەيلى جاقسارتۋ تالابى قويىلدى. پوليتسيانى وزىنە تيەسىلى ەمەس فۋنكتسيالاردان بوساتىپ, قۇزىرلارىن ناقتىلاپ, جاڭا سيپاتتاعى پوليتسەيلەردىڭ جالاقىسىن كوبەيتىپ, ولاردىڭ تۇرعىن ءۇي جانە وزگە دە الەۋمەتتىك ماسەلەلەرىن شەشىپ, تەك ۇزدىكتەرى عانا قىزمەتىن جالعاستىراتىنداي رەفورما جاساۋ قاجەتتىلىگى جانە ت.ب. ماسەلەلەر ايتىلدى.
ارينە كاسىبي دەڭگەيى جوعارى ماماندار قوعامدىق ءتارتىپتى باقىلاپ, حالىققا جوعارى ىنتامەن قىزمەت كورسەتسە, كۇندەلىكتى مونيتورينگ جاسالىپ قۇقىق بۇزۋشىلىق ورىن الاتىن نىساندار قاتاڭ باقىلاۋدا بولسا, حالىقتىڭ پوليتسەيلەرگە دەگەن سەنىمى جانە قۇرمەتى ارتا تۇسەتىنى ءسوزسىز!
سونىمەن قوسا سوت ءوندىرىسىنىڭ زاماناۋي فورماتتارىن جانە وزىق ەلەكتروندى سەرۆيستەر ارقىلى جۇرگىزىلۋىن قامتاماسىز ەتۋ قاجەتتىلىگى تالاپ ەتىلدى. مەملەكەت باسشىسى سوت بيلىگىنىڭ تاۋەلسىز ەكەندىگىن ەسكەرە وتىرىپ, كادرلارىنىڭ جاڭارۋىن قامتاماسىز ەتۋدى, ۇزدىك زاڭگەرلەر سۋديا بولۋعا ۇمتىلاتىنداي جاعداي جاساۋ كەرەكتىگىن ەرەكشە اتاپ ءوتتى. جولداۋدا قويىلعان تاپسىرمانى ىسكە اسىرۋ ماقساتىندا ۇكىمەت, جوعارى سوت كەڭەسى جانە جوعارعى سوت بىرلەسە وتىرىپ سۋديالىق قىزمەتكە ۇمىتكەر سۋديالاردى, سوت توراعالارىن ىرىكتەۋ پروتسەدۋراسىن جەتىلدىرۋدى كوزدەپ وتىر.
ءۇنزيلا شاپاق,
كونستيتۋتسيالىق
كەڭەس مۇشەسى, زاڭ عىلىمدارىنىڭ دوكتورى
