مەملەكەتتىك حاتشى گۇلشارا ابدىقالىقوۆا توراعالىق ەتكەن جيىنعا پارلامەنت دەپۋتاتتارى, ورتالىق جانە جەرگىلىكتى اتقارۋشى ورگانداردىڭ جەتەكشىلەرى, بەلگىلى قوعام قايراتكەرلەرى مەن عالىمدار قاتىستى.
وتىرىستى اشقان گۇلشارا ابدىقالىقوۆا اتالعان سالادا بەلگىلى ءبىر رەتتىلىك قالىپتاسقانىن ايتا كەلە, ازاماتتاردىڭ مەملەكەتتىك رامىزدەرگە دەگەن قۇرمەت سەزىمىن قالىپتاستىرۋ باعىتىندا اقپاراتتىق ءتۇسىندىرۋ جۇمىستارىن جۇيەلى تۇردە ىلگەرىلەتۋ, پاتريوتتىق تاربيەنىڭ ءرولىن, اسىرەسە جاستار اراسىندا ودان ءارى جالعاستىرۋ قاجەت ەكەنىن جەتكىزدى.
«ەلباسى نۇرسۇلتان نازارباەۆ تاياۋداعى جولداۋىندا: ء«اربىر قازاقستاندىق جۇرگىزىلىپ جاتقان رەفورمالاردىڭ ءمانىن, ولاردىڭ وتانىمىزدى وركەندەتۋ جولىنداعى ماڭىزىن جەتە ءتۇسىنۋى ءتيىس. رەفورمالاردى تابىستى جۇزەگە اسىرۋ ءۇشىن قوعامىمىزدىڭ ورتاق ماقساتقا جۇمىلۋى اسا ماڭىزدى», دەپ اتاپ وتكەن بولاتىن. ول – قازاقستان ازاماتتارىنىڭ ەل مەن جەرگە, وتانعا دەگەن قۇرمەتىنىڭ ارتۋى, تاۋەلسىزدىگىمىزدىڭ نىعايۋىنا ىقپال ەتۋى», دەدى مەملەكەتتىك حاتشى.
وتىرىستا جوعارعى سوتتىڭ جامبىل, الماتى جانە پاۆلودار وبلىستارى اكىمدىكتەرىنىڭ مەملەكەتتىك رامىزدەردى پايدالانۋ, قولدانۋ جانە ناسيحاتتاۋ جونىندەگى ەسەپتەرى تىڭدالدى. سونداي-اق جوعارعى سوتتىڭ سوتتاردىڭ قىزمەتىن قامتاماسىز ەتۋ دەپارتامەنتىنىڭ باسشىسى نۇرسەرىك ءشارىپوۆ ەلىمىزدىڭ زاڭدارىندا مەملەكەتتىك رامىزدەردى زاڭسىز پايدالانعانى, قورلاعانى ءۇشىن اكىمشىلىك جانە قىلمىستىق جاۋاپكەرشىلىك كوزدەلگەنىن, وسى باعىتتا سوت پراكتيكاسىن حالىققا دۇرىس ءتۇسىندىرۋ ماسەلەسىن جوعارعى سوت نازاردا ۇستاپ وتىرعانىن ايتىپ ءوتتى.
«ەستەرىڭىزدە بولسا, بىلتىر مەملەكەتتىك تۋدى پاتەرىنە زاڭسىز ءىلدى دەگەن جەلەۋمەن قىزىلوردا وبلىسىنىڭ تۇرعىنى جاۋاپقا تارتىلعان بولاتىن. ءسويتىپ وعان 450 مىڭ تەڭگەدەن استام ايىپپۇل سالىندى. ارينە بۇل ءىس ەل ىشىندە رەزونانس تۋدىردى. جوعارعى سوت ءىستى قاراي كەلە, اتالعان ازاماتتىڭ ارەكەتىنەن زاڭ بۇزۋشىلىق تاپپادى. سەبەبى مەملەكەتتىك تۋدى ۇيگە ءىلىپ قويۋ دەگەن ءتارتىپ ءالى كۇنگە دەيىن رەگلامەنتتەلمەگەن», دەدى نۇرسەرىك ءشارىپوۆ. ونىڭ ايتۋىنشا, جوعارعى سوت اتالعان جاعدايدى ەسكەرە وتىرىپ, مەملەكەتتىك رامىزدەردى قولدانۋ بويىنشا ارنايى قاعيدا قاجەت ەكەنىن ۇسىنىپ, ۇكىمەتكە حات جولداعان.
جيىن سوڭىندا 2019 جىلعا ارنالعان جۇمىس جوسپارى بەكىتىلدى. گ.ابدىقالىقوۆا مەملەكەتتىك ورگاندار باسشىلارىنا مەملەكەتتىك رامىزدەردى پايدالانۋ, قولدانۋ جانە ناسيحاتتاۋ بويىنشا ناقتى تاپسىرمالار بەردى.
اقمارال اعزامقىزى,
«ەگەمەن قازاقستان»
