ەلىمىزدىڭ تۇكپىر-تۇكپىرىندەگى 20 تەاتردىڭ اراسىنان ىرىكتەلگەن 9 تەاتر ۇجىمى وبلىس ورتالىعىنىڭ تۇرعىندارىنا 4 كۇن بويى ونەرلەرىن پاش ەتەتىن بولادى. مادەني شارانىڭ اشىلۋىندا ءسوز العان وبلىستىق مادەنيەت باسقارماسىنىڭ باسشىسى ازامات مۇحامەدچينوۆ ەكى جىل قاتارىنان ۇيىمداستىرىلعان فەستيۆالدى الداعى ۋاقىتتا حالىقارالىق دەڭگەيدە وتكىزۋدى جوسپارلاپ وتىرعاندارىن جەتكىزدى. «رۇستەم ەسداۋلەت شىعىستىڭ تەاتر ونەرىن جاڭا بەلەسكە كوتەردى. وسكەمەن تەاترى ەلىمىزدەن شىعىپ, شەت مەملەكەتتەردە ونەر كورسەتتى. سوندىقتان بۇل فەستيۆال جالعاسا بەرەدى», دەدى ول.
قازاقستان جازۋشىلار وداعىنىڭ توراعاسى, رەجيسسەردىڭ اعاسى ۇلىقبەك ەسداۋلەت قۇتتىقتاۋ سوزىندە رۇستەمنىڭ وسكەمەندە ەڭبەك ەتكەن 7-8 جىل مۇعدارىندا 25 قويىلىم قويىپ, تەاتردىڭ اتىن ايگىلى ەتكەنىنە توقتالىپ, بۇگىنگى جاڭا تەاتردىڭ سالىنۋىن تاعاتسىزدانا كۇتكەنىن تىلگە تيەك ەتتى. «وسى تەاتردى تۇسىندە كورىپ جۇرەتىن. وسى تەاتردىڭ جوباسىن جاساتىپ, ماكەتىن سىزدىرىپ الىپ كەلىپ, سول كەزدەگى وبلىس اكىمى بەردىبەك ساپارباەۆقا تاپسىرعان ەدى. ول كىسى ماعان سونى كورسەتىپ: «مىنە, مىناداي تەاتر سالىپ بەرەيىن دەپ وتىرمىن» دەگەن ەدى. كەيىن رۇستەم دۇنيەدەن وتكەننەن كەيىن تەاترعا ونىڭ ەسىمى بەرىلەتىنىن ايتىپ, ەل الدىندا ۋادەسىن بەرگەن ەدى. الماتىدان وسىندا كەلەردە اتاقتى ءارتىس ءاسانالى ءاشىموۆتىڭ «قازىرگى اكىمدەرىڭە ايتشى, تەاترعا نەگە ءالى كۇنگە دەيىن رۇستەمنىڭ اتىن بەرمەي ءجۇر؟» دەپ ايتتى», دەدى ۇ.ەسداۋلەت.
ازامات قاسىم,
«ەگەمەن قازاقستان»
