باستى ماقسات – جەكە ينۆەستوردىڭ قاراجاتىن تارتۋ مەن پايدالانۋ ارقىلى ەسكىرە باستاعان بالاباقشا عيماراتتارىنا كۇردەلى جوندەۋ جۇرگىزۋ, قايتا جاڭعىرتۋ ءارى بالاباقشالاردى بۇگىنگى زاماناۋي قۇرال-جابدىقتارمەن جانە جاڭا جيھازدارمەن جابدىقتاۋ.
بۇل بيۋدجەت قاراجاتىن ءتيىمدى جۇمساۋ قاجەتتىلىگىنەن تۋىندايدى. ەكىنشىدەن, جەرگىلىكتى بيۋدجەتتەرگە تۇسەتىن سالماق پەن جۇكتەمەنى ازايتۋ ماقساتى كوزدەلگەن. مۇنداي الەۋمەتتىك جاۋاپكەرشىلىگى جوعارى ىسكە بيزنەس وكىلدەرىن تارتۋ – بۇگىنگى كۇننىڭ باستى تالاپتارىنىڭ ءبىرى. سولاي بولا تۇرسا دا وڭىردەگى مەملەكەتتىك بالاباقشالار جۇيەسىندەگى وزگەرىستەر كەيبىر اتا-انالاردىڭ الاڭداۋشىلىعىن تۋعىزدى. بالاباقشادا قىزمەت ەتىپ جۇرگەن كاسىبي بىلىكتىلىگى جوعارى مامانداردىڭ اراسىندا دا قوبالجۋ پايدا بولعانى جاسىرىن ەمەس. ويتكەنى قىزمەتكەرلەردى جۇمىس ورنىندا قالدىرۋعا نەمەسە شىعارۋعا جاڭا بالاباقشانى باسقارۋعا العانداردىڭ ەركى بار ەمەس پە؟ سونىمەن بىرگە اتا-انالار دا كاسىپكەرلەر ەرىك وزدەرىنە تيگەن سوڭ بالاباقشاعا تولەنەتىن تولەمدى ءوسىرىپ جىبەرەتىن شىعار دەپ قاۋىپتەنەدى. الايدا ازىرگە مۇنداي جاعداي ورىن العان جوق.
«قازاقستانداعى مەكتەپكە دەيىنگى مەكەمەلەر قاۋىمداستىعى» اقتوبە وبلىسى فيليالىنىڭ ءتورايىمى ناتاليا كايۋدينانىڭ ايتۋىنشا, قازىرگى كەزدە بالاباقشا تولەماقىسىنىڭ كولەمى مەملەكەتتىك جانە جەكەمەنشىك بالاباقشالاردا بىردەي كولەمدە. سونداي-اق مەملەكەتتىك تاپسىرىس اياسىندا جۇمىس ىستەيتىن بالاباقشالار قىزمەتى مەملەكەت تاراپىنان ۇدايى قاداعالانادى. بۇعان توتەنشە جاعدايلار جانە سانيتارلىق تازالىق بويىنشا تەكسەرۋلەر دە كىرەدى ەكەن. مۇنىڭ سىرتىندا ارنايى ديۆيزيالىق كوميسسيا مەن قالالىق ءبىلىم ءبولىمى ماماندارى دا قاداعالاۋ جۇمىستارىن جۇرگىزەدى. ال مەملەكەتتىك بالاباقشادا قىزمەت ەتىپ جۇرگەن مامانداردىڭ ءوز ورنىندا قالۋى نەمەسە قالماۋى جونىندەگى ماسەلە تۋرالى سەنىمگەرلىكپەن باسقارۋعا بەرىلگەن «بۇل-بۇل» بالاباقشاسىنىڭ باسقارۋشىسى عازيزا الىمجانقىزى بىلاي دەدى: «تاجىريبەلى, بىلىكتى مامانداردى جۇمىستان شىعارۋ ءبىز ءۇشىن وتە ءتيىمسىز. مۇنداي كادرلار ونسىز دا تاپشى ەكەنى بەلگىلى. سوندىقتان ەشكىمدى جۇمىسىنان شەتتەتكەن جوقپىز. ءارى مۇنداي ويدان اۋلاقپىز».
وبلىس ورتالىعىنداعى «ديماش» بالاباقشاسىن سەنىمگەرلىكپەن باسقارۋعا العان كاسىپكەر زلاتا سيسەنعاليەۆا دا وسى ويدى قۋاتتايدى.
ەڭ باستىسى, بۇگىندە وڭىردە مەملەكەتتىك بالاباقشالاردى سەنىمگەرلىكپەن باسقارۋعا العان كاسىپكەرلەر مەن بالاباقشا ماماندارى جانە اتا-انالار اراسىندا ءوزارا سەنىم ورنىعىپ كەلەدى. بۇعان پەداگوگتار قۇرامىنىڭ سول كۇيىندە وزگەرىسسىز قالعانى, جاڭا باسقارۋشىلار كورسەتىلگەن سەنىمدى اقتاپ بالاباقشا عيماراتتارىن قايتادان جاڭعىرتقانى, ءار بالاعا تولەنەتىن بالاباقشا قۇنىنىڭ وزگەرمەگەنى دالەل.
تەمىر قۇسايىن,
«ەگەمەن قازاقستان»
اقتوبە
