جۇلدەلى ءبىرىنشى ورىندى قىزىلوردا قالاسىنان داستان ايتبايدىڭ «يننوۆاتسيالىق قۇلاققاپ «Safe headphones» جوباسى جەڭىپ الدى. وعان ارنايى ديپلوم مەن 300 مىڭ تەڭگەنىڭ سەرتيفيكاتى تابىس ەتىلدى.
داستاننىڭ قۇلاققابىن ناعىز يننوۆاتسيالىق جوبا دەپ ايتۋعا بولادى. بۇگىنگى جاستاردىڭ سمارتفوننان ەكى ەلى اجىرامايتىندىعى بەلگىلى. ۇيالى تەلەفونىنداعى اۋەندەردى سىمتەتىك ارقىلى قۇلاعىنا قىستىرىپ, سىرتىنان قۇلاققاپ كيىپ العان بوزبالالار مەن بويجەتكەندەر تۋ سىرتىنان ماشينا كەلىپ قالىپ, سيگنالىن ويبايلاتىپ باسقانىمەن ەستىمەيدى. رۇقسات ەتىلمەگەن جول قالتارىستارىنان شىعا كەلگەن جاسوسپىرىمدەردىڭ اپاتقا ۇشىراپ جاتقاندارى بار.
ۇلكەندەردى تىڭداعىسى كەلمەگەن سول تۇستاستارىن داستان ونەرتاپقىش مويىنداتتى. داستان ويلاپ تاپقان قۇلاققاپ ىشىندە قاۋىپسىزدىك سيگنالى بار. اۆتوموبيل, جول-كولىك قىزمەتكەرلەرىنىڭ, جەدەل-جاردەم ماشينالارىنىڭ سيگنالى ىسكە قوسىلعاندا, قۇلاققاپتاعى مۋزىكا بىردەن توقتايدى.
جاقىنداپ قالعان كولىكتىڭ داۋىسىن اجىراتىپ, قاۋىپتىڭ كەلىپ قالعاندىعىن اۋەندى توقتاتۋمەن بىلدىرەدى. قاۋىپتىڭ الدىن الۋعا جاردەمدەسەتىن مۇنداي قۇرىلعىلاردى كوپتەپ دايىنداۋعا وبلىس اكىمدىگى مەن قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ باسشىلىعى ۇسىنىس ءبىلدىرىپتى.
داستاننىڭ جوباسى وسىلايشا ءبىرىنشى ورىنعا يە بولدى. ەكى ەكىنشى ورىندى قىزىلوردالىق شىڭعىسحان ءسادۋوۆتىڭ «جارناما بيزنەس-يدەياسى» مەن سىرداريا اۋدانىنان ومىرزاق ەسبولاتوۆتىڭ «ساۋىقتىرۋ ورتالىعى» جوباسى ءبولىستى. ءۇشىنشى ورىن «تىگىن تسەحى» جوباسىنىڭ يەگەرى شيەلىلىك گۇلنۇر ۇدەرباەۆاعا, «لوگيستيكالىق ورتالىق «Logo Center» جوباسىنىڭ اۆتورى ءۋاليحان تاسقارا مەن «كىشكەنتاي حانىمدار» مەكتەبى» جوباسىنىڭ يەسى اقبوتا بازاربايعا بۇيىردى.
جەڭىمپازدار مەن جۇلدەگەرلەردى وبلىس اكىمىنىڭ ورىنباسارى رۋسلان رۇستەموۆ ارنايى قۇتتىقتادى.
باقتيار تايجان,
«ەگەمەن قازاقستان»
قىزىلوردا وبلىسى
