كورمەنىڭ اشىلۋ سالتاناتىندا ءسوز العان ۇلتتىق مۋزەي ديرەكتورىنىڭ ورىنباسارى جاكەن تايماعامبەتوۆ: «مەملەكەت باسشىسى ءبىر سوزىندە: ء«بىر بەلدەۋ, ءبىر جول» – جاڭا پاراديگما, جاڭا دەڭگەيدەگى ىنتىماقتاستىق جۇيەسى» دەگەن بولاتىن. بۇگىنگى كورمەنىڭ ء«بىر بەلدەۋ, ءبىر جول» باستاماسىنىڭ بەس جىلدىعىنا وراي ۇيىمداستىرىلعانىن ەرەكشە اتاپ وتكىم كەلەدى. ۇلتتىق مۋزەي قازاقستانداعى ەلشىلىكتەرمەن بىرلەسە وتىرىپ, كوپتەگەن ءىس-شارالار ۇيىمداستىرۋدا. قازاقستانداعى قىتاي ەلشىلىگىمەن الداعى ۋاقىتتا دا ماڭىزدى جوبالاردى جۇزەگە اسىرامىز دەگەن ويدامىز. كورمەگە ۇسىنىلعان سۋرەتتەر ەرەكشە تاڭدانىسپەن, قىزىعۋشىلىقپەن تۇسىرىلگەن. بۇل سۋرەتتەر سىزدەردى دە بەيجاي قالدىرمايتىنى انىق», – دەپ ءوز پىكىرىن ءبىلدىردى.
ال قحر-دىڭ قازاقستانداعى توتەنشە جانە وكىلەتتى ەلشىسى چجان ساو: «بۇل شارا قىتايدىڭ رەفورما جانە اشىقتىق ساياساتىنا 40 جىل تولۋىنا وراي ۇيىمداستىرىلىپ وتىر. بۇگىنگى كورمە ەكى حالىق اراسىنداعى دوستىق پەن ىنتىماقتاستىقتىڭ جارقىن كورىنىسى دەۋگە بولادى. مۇندا ۇسىنىلعان سۋرەتتەردەن قىتاي حالقىنىڭ كۇندەلىكتى تۇرمىس-تىرشىلىگىن, ءومىر سالتىن, داستۇرلەرىن تانىپ, ونداعى ءتۇرلى قالالاردىڭ اسەم كورىنىستەرىن تاماشالاۋعا مۇمكىندىك بار. زاماناۋي قىتايدىڭ كەلبەتى كوڭىلدەرىڭىزدەن شىعادى دەپ سەنەمىن», – دەدى.
كورمەگە بارلىعى 700-دەن استام فوتو جينالىپ, وسىلاردىڭ اراسىنان ەڭ ۇزدىك 100 فوتوسۋرەت تاڭدالىپ, اتالعان كورمەگە قويىلىپتى. «سىزدەر وسى سۋرەتتەر ارقىلى قازاقستاندىقتاردىڭ كوزىمەن تاڭعاجايىپ قىتايدىڭ اسەم كورىنىستەرىن تاماشالاي الاسىزدار», دەيدى ۇيىمداستىرۋشىلار.
قۋات ۋاتقان,
جۋرناليست
