باتىس قازاقستان وبلىسىندا تۇڭعىش اشىلىپ وتىرعان ورتالىققا ءوڭىر باسشىسى التاي كولگىنوۆ ارنايى كەلدى. ۋنيۆەرسيتەت رەكتورى اسقار نامەتوۆ بيىل 55 جىلدىعىن اتاپ وتكەن ىرگەلى ءبىلىم ورداسىندا قولعا الىنعان «SMART university» جوباسى تۋرالى اڭگىمەلەدى.
– ۋنيۆەرسيتەتتەگى «Smart university» جوباسىن باستاپ وتىرمىز. بۇل ورتالىقتا ستۋدەنتتەرگە دە, وقىتۋشىلارعا دا اۆتوماتتى قىزمەت ۇلگىسىن كورسەتەدى, – دەدى اسقار نامەتوۆ.
– ەلباسىمىز كەلەسى جىلدى جاستار جىلى دەپ اتادى. جاستارعا ەڭ باستى قولداۋ – ءبىلىم الۋعا, كاسىپ ۇيرەنۋگە بارلىق مۇمكىندىكتى جاساۋ. پرەزيدەنتىمىز تاۋەلسىزدىكتىڭ العاشقى جىلدارىنان-اق بىلىمگە ەرەكشە كوڭىل ءبولدى. «بولاشاق» باعدارلاماسى پايدا بولدى, نازارباەۆ ۋنيۆەرسيتەت, زياتكەرلىك مەكتەپتەر, ليتسەيلەر اشىلدى. ولار قۇرال-جابدىقپەن قامتاماسىز ەتىلىپ, قانشاما گرانت ءبولىنىپ جاتىر. بەس الەۋمەتتىك باستاما بويىنشا بيىل تاعى دا قوسىمشا گرانت ءبولىندى. بۇل گرانتتىڭ يەگەرلەرى ءبىزدىڭ وڭىردە دە, وسى ۋنيۆەرسيتەتتە دە بار. مەملەكەت جىل سايىن جاستارعا جاڭا كەڭىستىك اشىپ وتىر. ەڭ باستى كوزدەگەن ماقسات – ساپالى ءبىلىم بەرۋ. ءبىز الدىڭعى قاتارلى مەملەكەتتەردىڭ تىزىمىنە ەنگىمىز كەلسە, جاستارىمىز ءبىلىمدى بولۋى كەرەك. باسقا جول جوق! بۇگىن اشىلعان ستۋدەنتتەرگە قىزمەت كورسەتۋ ورتالىعى دا ءبىلىم ساپاسىن ارتتىرۋعا سەپ بولادى دەپ ويلايمىز, – دەدى التاي كولگىنوۆ ورتالىقتىڭ اشىلۋ سالتاناتىندا.
ستۋدەنتتەرگە قىزمەت كورسەتۋ ورتالىعىنىڭ لەنتاسىن «رۋحاني جاڭعىرۋ» ورتالىعىنىڭ پروفەسسورى, فيلوسوفيا عىلىمدارىنىڭ دوكتورى تىلەكجان رىسقاليەۆ پەن ماشينا جاساۋ فاكۋلتەتىنىڭ 4-كۋرس ستۋدەنتى, پرەزيدەنت ستيپەندياسىنىڭ يەگەرى, جوو اراسىندا وتكىزىلگەن «ۇزدىك ستۋدەنت-2018» بايقاۋىنىڭ جەڭىمپازى گۇلنۇر تىلەپبەرگەن قيدى. ورتالىق قىزمەتىن تۇڭعىش پايدالانعانداردىڭ ءبىرى ماشينا جاساۋ فاكۋلتەتىنىڭ 4-كۋرس ستۋدەنتى مۇسا كونەەۆ بولدى.
– بۇرىن ءدال وسى ترانسكريپتى الۋ ءۇشىن ءبىر اپتا ۋاقىتىمىز كەتەتىن. بۇگىن, مىنە, بەس-اق مينۋت جۇمسادىم, – دەيدى مۇسا. – ۋاقىتتى ءتيىمدى پايدالاناتىن بولدىق. بۇل جەردە ۇنەمدەلگەن ۋاقىتتى ءبىلىم الۋعا, باسقا دا پايدالى ىسكە جۇمسايمىز.
ستۋدەنتتەرگە قىزمەت كورسەتۋ ورتالىعىنىڭ جۇمىسىمەن تانىسقان التاي كولگىنوۆ جاڭگىر حان اتىنداعى بقاتۋ-ءدىڭ 1-كۋرس ستۋدەنتتەرى الدىندا «بىلىمگە تالپىنىس – جەتىستىكتىڭ نەگىزگى كىلتى» تاقىرىبىندا قوعامدىق ءدارىس وتكىزدى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى
