بايقاۋعا قاتىسۋشىلارعا سۇلتانماحمۇت تورايعىروۆتىڭ «كىم جازىقتى؟», «قامار سۇلۋ» تۋىندىلارىنان ساحنالىق كورىنىس, پوەمالارى مەن ولەڭدەرىنەن ءۇزىندى وقۋ, «ولەڭ قورجىنىنان» اتتى بولىمدە ولەڭدەرىن مانەرلەپ وقۋ جانە اقىننىڭ ءومىرى مەن شىعارماشىلىعىنا قاتىستى سۇراقتارعا جاۋاپ بەرۋ سىندى شارتتار قويىلعان.
بايقاۋدىڭ وسى شارتتارىنا لايىقتى ونەر كورسەتكەن وبلىس ورتالىعىنداعى №43 مەكتەپتىڭ قازاق ءتىلى مەن ادەبيەتىنىڭ مۇعالىمى ينگا گروسس 1-ءشى ورىندى يەلەندى.
ينگا گروسس وڭىردەگى ماي اۋدانى, ساتى اۋىلىندا تۋىپ وسكەن. ومىردەن وتكەن اتاسى وتتو گروسستىڭ اكە-شەشەسى راينگولدتەر وتباسى سوعىس جىلدارى قۋعىن–سۇرگىن كوردى. قازاق جەرىنەن پانا تاپتى. ۇل-قىزدارى, نەمەرەلەرى قازاق تىلىندە وقىپ ءبىلىم الدى.
ال, 2-ورىن №25 ورتا مەكتەپتىڭ وقۋشىلارى داميرا تۇسىپبەكوۆا مەن نۇر داۋلەتقان, 3-ءشى ورىن №30 ورتا مەكتەپتىڭ وقۋشىسى اجار كەڭەس پەن پەداگوگيكالىق ۋنيۆەرسيتەتتىڭ 2-كۋرس ستۋدەنتى ۇلجان ابسادىقوۆاعا بەرىلدى.
ال, 27-قازاندا «سۇلتانماحمۇتتىڭ قوڭىر كۇزى» اتتى قالالىق بايقاۋعا قاتىسۋشىلار باياناۋىلداعى تورايعىر اۋىلىنا جول تارتتى.
اۋىل مەكتەبىندە «مەن - قازاق,«قازاقپىن» دەپ ماقتانامىن» اتتى سۇلتانماحمۇت وقۋلارى كۇنى وتكىزىلدى.
قالالىق مادەنيەت جانە تىلدەردى دامىتۋ ءبولىمىنىڭ ءبولىم مەڭگەرۋشىسى مەيرام نۇعىماننىڭ ايتۋىنشا, جىل سايىن وتەتىن ادەبي بايقاۋدىڭ قاتىسۋشىلارى بايقاۋدان سوڭ اقىننىڭ وسكەن جەرى باياناۋىلداعى تورايعىر اۋىلىنا كەلەدى. اقىننىڭ كەسەنەسىنە ءتاۋ ەتىپ, مۋزەيىن ارالاتۋ داستۇرگە اينالعان.
سۇلتانماحمۇت تورايعىروۆتىڭ تۋعانىنا 125 جىل تولۋىنا ارنالعان «سۇلتانماحمۇتتىڭ قوڭىر كۇزى» اتتى قالالىق بايقاۋ, اقىننىڭ ءىزى قالعان تۋعان جەرىنە ساياحات, مەكتەپ وقۋشىلارمەن كەزدەسۋمەن جالعاستى.
بايقاۋ قاتىسۋشىلارى تورايعىر كولى جاعاسىنداعى «مۇرتتى قورعان» اتالىپ كەتكەن كونە قورىمداردى ارالاپ, تاريحي ەسكەرتكىشتەر جايلى كورىپ, ءبىلدى.
فاريدا بىقاي,
«ەگەمەن قازاقستان»
پاۆلودار وبلىسى
باياناۋىل اۋدانى
