قالا اكىمىنىڭ ورىنباسارى ارمان قىرىقباەۆ ەلباسى جولداۋىندا ءبىلىم سالاسىنىڭ ناقتى كورىنىس تاپقاندىعىن ايتا كەلە الماتىداعى ءبىلىم جۇيەسىنىڭ بارىسىنا توقتالدى. قالا اكىمدىگىنىڭ مالىمەتىنشە سوڭعى بەس جىل ىشىندە ءبىلىم سالاسىن قارجىلاندىرۋ 27 ملرد تەڭگەگە وسكەن. الداعى كەزەڭدەردە مەكتەپ جاسىنا دەيىنگى جانە جالپى ورتا ءبىلىم بەرۋدىڭ ساپاسىن ارتتىرۋ ماقساتىندا ءبىلىم جۇيەسى قىزمەتكەرلەرىنىڭ بىلىكتىلىگىن كوتەرۋگە بايلانىستى PIZA, SAT, AST حالىقارالىق ستاندارتتارعا كوشۋگە قاتىستى شارالار جوسپارى بەكىتىلەتىن بولادى.
ال مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنتىنىڭ ديرەكتورى دانيار تاۋمۇرات جۇرتشىلىق تاراپىنان مەكتەپتى جوندەۋ, تازالاۋ نەمەسە باسقا دا شارالارعا اقشا جيناۋ فاكتىلەرىنە قاتىستى اقپاراتتار بار ەكەندىگى تۋرالى باياندادى. دەپارتامەنت ديرەكتورىنىڭ ايتۋىنشا, مۇنداي ىستەرگە اتا-انالار شىعىندانباۋى قاجەت, ويتكەنى, بارلىق قاجەتتىلىكتەرگە بيۋدجەتتەن بولىنگەن قاراجات جەتكىلىكتى. مەكتەپتەردە اقشا جيناۋعا قاتىستى اقپاراتتار بارىنشا تەكسەرىلىپ, ونداي كەلەڭسىزدىكتەر ورىن العان جاعدايدا كىنالى ازاماتتار قاتاڭ جازاعا تارتىلاتىن بولادى. تىپتەن, قىلمىستىق ءىس قوزعالۋى دا مۇمكىن. سىبايلاس جەمقورلىقپەن قارسى كۇرەستە تسيفرلاندىرۋدىڭ ىقپالى زور. سوندىقتان دا ءبىلىم باسقارماسى مەملەكەتتىك قىزمەتتەردى اۆتوماتتاندىرۋدى جولعا قويىپ, وتكەن جىلدان باستاپ «الماتى مەكتەپ» باعدارلاماسى جۇمىس ىستەي باستادى. ونىڭ ناتيجەسىنە وراي بيىلعى جىلى بالا باقشالارعا كەزەككە قويۋ باعدارلاماسى قولعا الىنۋدا.
ال الماتى قالاسى ءبىلىم باسقارماسىنىڭ باسشىسى گۇلنار قوجابەرگەنوۆانىڭ ايتۋىنشا, پەداگوگتاردىڭ باستى مىندەتى – بالالاردى وقىتۋ مەن تاربيەلەۋ. قازىرگى كەزدە جوندەۋ جۇمىستارىنا, قاجەتتى بۇيىمدار الۋعا اقشا جيناۋعا نەگىز جوق. ءبىلىم مەكەمەلەرىنە تيەسىلىنىڭ بارلىعى مەملەكەتتىڭ مەنشىگى, ياعني سالىق تولەۋشىلەردىكى. وسى ورايدا ءبىلىم باسقارماسى مەكتەپتەرگە اقشا جيناۋعا تىيىم سالىنعانى تۋرالى ارنايى حات جولداپ, ونى قاداعالاۋ ءبىرىنشى باسشىعا جۇكتەلەدى. وسى جايتقا بايلانىستى بيىلعى جىلدىڭ وزىندە 7 مەكتەپ ديرەكتورى قىزمەتىنەن بوساتىلعان.
ەلۆيرا سەرىكقىزى,
«ەگەمەن قازاقستان»
الماتى
