جيىنعا سىرتقى ىستەر ءمينيسترى ق.ءابدىراحمانوۆ, ينۆەستيتسيالار جانە دامۋ ۆيتسە-ءمينيسترى ق.وسكەنباەۆ, «KazakhExport» ەكسپورتتىق ساقتاندىرۋ كومپانياسى» اق, «اتامەكەن» ۇلتتىق كاسىپكەرلەر پالاتاسى جانە «بايتەرەك» ۇبح» اق باسشىلارى مەن حالىقارالىق بيزنەس-قاۋىمداستىقتار وكىلدەرى قاتىستى. شارانى سىرتقى ىستەر ءمينيسترى ق.ءابدىراحمانوۆ اشتى.
«بۇل جيىن ساۋدا مەن ينۆەستيتسيالاردى ىلگەرىلەتۋ تۇرعىسىنان وتە ماڭىزدى شارا بولىپ وتىر. «اتامەكەن» ۇلتتىق كاسىپكەرلەر پالاتاسى جانە «KazakhExport» كومپانياسىمەن ەكسپورتتى ىلگەرىلەتۋدەگى كۇش-جىگەرىمىزدى بىرىكتىرۋ ءۇشىن كەلىسىمگە قول قويامىز. مەموراندۋم بىرگە جۇمىس ىستەۋدەگى كەڭ اۋقىمدى ماسەلەلەردى قامتيدى», دەدى مينيستر.
سونداي-اق سىرتقى ىستەر ۆەدومستۆوسىنىڭ باسشىسى جاھاندىق تاجىريبەگە سايكەس, ينۆەستيتسيالار مەن ەكسپورتتى ىلگەرىلەتۋ جونىندەگى ماقساتتار ءوزارا بايلانىستى ەكەنىن اتاپ ءوتتى. 2022 جىلعا دەيىن قازاقستان ەكونوميكا سەكتورىنىڭ ەكسپورتتىق الەۋەتىن ءبىر جارىم ەسەگە ءوسىرۋ جوسپارلانىپ وتىر. 2016 جىلمەن سالىستىرعاندا ەلدىڭ ەكسپورتتىق الەۋەتى 31%-عا ارتىپ, 48,3 ملرد اقش دوللارىن قۇرادى. بيىلعى دەرەكتەر بويىنشا, بۇل وڭ ءۇردىس 28% وسىممەن ساقتالىپ وتىر. الداعى
3 جىل ىشىندە قازاقستاننىڭ ەكسپورتتىق الەۋەتىن ارتتىرۋ ماقساتىندا سىرتقى ىستەر مينيسترلىگى مەن «اتامەكەن» ۇكپ جانە «KazakhExport» ۇك بىرىگە جۇمىس ىستەيتىن بولدى.
«اتامەكەن» ۇلتتىق كاسىپكەرلەر پالاتاسى مەن «KazakhExport» كومپانياسى ەلىمىزدىڭ ەكسپورتىن ىلگەرىلەتۋدەگى نەگىزگى قۇرالدار بولىپ وتىر. قازاقستان ينۆەستيتسيانى قابىلداۋعا قاشاندا دايىن. جاڭا وندىرىستەردى اشۋ ءۇشىن بىزدە ەكسپورتتى قولداۋ جونىندەگى ۇلتتىق ستراتەگيالار ازىرلەندى. ءبىز ينۆەستيتسيا الماسۋعا, سونداي-اق تاۋارلاردىڭ سىرتقى نارىقتا ىلگەرىلەۋىنە ۇلكەن كومەك كورسەتۋگە دايىنبىز», دەدى ينۆەستيتسيالار جانە دامۋ ۆيتسە-ءمينيسترى ق.وسكەنباەۆ.
جيىن سوڭىندا سىرتقى ىستەر مينيسترلىگى, «اتامەكەن» ۇلتتىق كاسىپكەرلەر پالاتاسى مەن «KazakhExport» ۇلتتىق كومپانياسى اراسىندا ءوزارا تۇسىنىستىك پەن ىنتىماقتاستىق تۋرالى مەموراندۋمعا قول قويىلدى.
مارجان تىلەۋبەك,
«ەگەمەن قازاقستان»
