گازەت – ۇكىمەت ءتىلى, جۇرت ايناسى. ەل مەن ۇكىمەتتى سويلەستىرىپ وتىراتىن ەلشىسى. ەڭبەكشى ەلدىڭ جوعىن ىزدەيتىن جوقشىسى. قامىن جەپ قايعىراتىن قامقورى. جول كورسەتىپ, ءجون سىلتەپ, اداسقانىن ايتىپ, قونىس ىزدەيتىن كوشباسشى قارياسى. سونىڭ ءبارىن موينىنا الىپ وتىرعان گازەت جازۋشى جانە تىلشىلەرمەن كوركەيىپ, وقۋشىلارمەن ۇلعايماق.
مادەنيەتتەن كەنجە قالعان سانى 6 ميلليون شامالانعان قازاق ەلىنىڭ ورتالىق جالعىز گازەتى «ەڭبەكشى قازاق» بۇگىن تۇساۋىن كەسكەن بالاداي ءتورت جاستى جاساپ, بەس جاسقا شىعىپ وتىرسا دا, سانى ون مىڭعا, بەلگىلى تىلشىلەرى ءبىر مىڭعا جەتكەن جوق. ارينە, بۇل ءبىزدىڭ قازاق ازاماتتارىنىڭ گازەت ىسىنە سۋىق قاراعاندىعىن كورسەتەدى.
ءبىزدىڭ ەل ادامدارىمىز تۇگىل, قىزمەتتەگى ازاماتتارىمىزعا گازەتكە جازىلىڭىز دەسەڭىز, كەيبىرەۋلەرى: «پۇل تولەمەي-اق وقىپ ءجۇرمىن», دەيدى. بۇدان بولىستىق, اۋىلدىق كەڭسەلەرگە ارنالعان گازەتتەردى جولسوقتى قىلاتىنى كورىنەدى.
قولى حات بىلەتىن قىزمەتتەگى ازاماتتارىمىزدىڭ كوبى گازەتكە حابار جازعاندى ار كورەدى. گازەت تىلشىلەرىن وسەكشىل دەپ كەكەتىپ تە جۇرەدى. بۇدان ول ازاماتتارىمىزدىڭ ساياسي ساۋاتسىزدىعى, الەۋمەت ىسىنە بەرىلمەگەندىگى, قارا باسىنىڭ قامىن ىزدەگەن ءوزىمشىل ناداندىعى كورىنەدى.
ءبىزدىڭ ايتارىمىز:
1. قولى حات بىلەتىن قازاق ازاماتتارىنىڭ كورگەن-بىلگەن حابارىن جازىپ, باسقارماعا جىبەرىپ تۇرۋ مىندەتى. سوندىقتان ولار جازىپ تۇرۋى كەرەك.
2. ەل ىشىنەن تىلشىلەر بەلگىلەنىپ, ولارعا باسقارمادان نۇسقاۋلار جىبەرىلىپ تۇرۋى كەرەك. قالالاردان تىلشىلەر ۇيىمى اشىلۋى كەرەك.
3. قىزمەتتە جۇرگەن قازاق ازاماتتارى ىستەپ جۇرگەن ىسىندە قازاق ەلىنە كەلگەن پايدانى, زياندى كۇندەلىك تاجىريبەسىنەن ءبىلىپ, قازاق ەلىنىڭ تۇرمىسىن جوندەۋ تۋرالى پىكىرلەرىن جازىپ تۇرۋلارى كەرەك.
«ەڭبەكشى قازاق» كۇندەلىك گازەت بولسىن.
قىزمەتتەگى قازاق ازاماتتارى «ەڭبەكشى قازاققا» جازىلۋعا مىندەتتى بولسىن.
ەل ىشىنەن جازىلۋشىلار جينالىپ, ولارعا گازەت جولسوقتى بولماي تيۋىنە قاتتى شارا قاراستىرىلسىن.
«ەڭبەكشى قازاق» 6 جاسقا شىققاندا تىلشىلەرى بەس جۇزگە, تيراجى جيىرما بەس مىڭعا جەتسىن.
دايىنداعان ۇلاربەك نۇرعالىم ۇلى,
«ەگەمەن قازاقستان»
