اقپارات تاراتۋعا ق.ا.ياساۋي اتىنداعى حقتۋ-دا وقيتىن تۇركى تىلدەس ەلدەردىڭ ستۋدەنتتەرى ەرىكتى تۇردە اتسالىسپاق. تۇركىستان قالاسىندا وتكەن «تۇركىستان: جاڭا اقپاراتتىق كەڭىستىك» اتتى حالىقارالىق مەديا فورۋمدا بىرنەشە مەملەكەتتىڭ باق جەتەكشىلەرى مەموراندۋمعا قول قويدى. ياعني وسى قۇجات نەگىزىندە تۇركيا, ءازىربايجان, وزبەكستان, تاتارستان جانە قىرعىزستان رەسپۋبليكالارىنىڭ جەتەكشى اقپارات قۇرالدارى مەن تۇركىستان وبلىستىق ىشكى ساياسات باسقارماسى اراسىندا ارىپتەستىك ورناتىلدى.
تۇركىستان وبلىستىق ىشكى ساياسات باسقارماسىنىڭ باسشىسى بەيسەنباي تاجىباەۆ تۇركيانىڭ «TRT» تەلەكومپانياسىنىڭ استاناداعى وكىلدىگىنىڭ ديرەكتورى ابدۋلحاميت اۆشارمەن, قىرعىزستاننىڭ «كابار» ۇلتتىق اقپارات اگەنتتىگىنىڭ ءىت دەپارتامەنتىنىڭ ديرەكتورى كالنۋر جانىباەۆپەن, تاتارستاننىڭ «تاتار-ينفورم» اقپارات اگەنتتىگى باس ديرەكتورىنىڭ ورىنباسارى راميس لاتيپوۆپەن جانە ءازىربايجاننىڭ ITV تەلەراديوكومپانياسىنىڭ قازاقستانداعى وكىلى ماجيدي فۋزۋليمەن باق سالاسىنداعى ارىپتەستىك جانە ىسكەرلىك بايلانىس ورناتۋ جونىندەگى مەموراندۋمعا قول قويدى.
وسى قۇجات نەگىزىندە تۇركى مادەنيەتى مەن رۋحانياتىن, باۋىرلاس حالىقتاردىڭ بىرلىگىن نىعايتۋ باعىتىندا دا اقپاراتتىق قولداۋ كورسەتىلمەك. تاراپتار اقپارات الماسۋ, ءوزارا بايلانىستى دامىتۋ جولىندا ىنتىماقپەن ارەكەت ەتۋدى كوزدەپ وتىر. جۋرناليستيكا سالاسىنداعى جاڭا تەحنولوگيالاردى مەڭگەرۋ, تاجىريبە الماسۋ ماسەلەسىنە دە كوڭىل بولىنەدى.
مەموراندۋمعا قول قويعان شەتەلدىك باق جەتەكشىلەرى مەن وكىلدەرى تۇركىستاننىڭ تۋريزم جانە تۇركى الەمىنىڭ ورتالىعىنا اينالاتىنىنا سەنىم ءبىلدىرىپ, اقپاراتتىق قولداۋ كورسەتۋگە دايىن ەكەندەرىن جەتكىزدى.
عالىمجان ەلشىباي,
«ەگەمەن قازاقستان»
تۇركىستان قالاسى
