قازاقستاندىق جانە شەتەلدىك باق باسشىلارى مەديا ورتالىقتىڭ تۇساۋىن كەسىپ, يگى باستاماعا ساتتىلىك تىلەدى. جاس جۋرناليستەرمەن جانە ستۋدەنتتەرمەن كەزدەسىپ, پىكىر الماستى. سونداي-اق ينتەللەكتۋالدى كلۋبتىڭ ءبىرىنشى وتىرىسىندا العاشقى سپيكەرلەر رەتىندە وبلىس اكىمى ج. تۇيمەباەۆ پەن تانىمال پۋبليتسيستەر تۇركىستاننىڭ دامۋى جونىندەگى ويلارىن ورتاعا سالدى. قاجەتتى جيھاز, كومپيۋتەرلەرمەن جانە عالامتور جەلىسىمەن تولىقتاي قامتىلعان مەديا ورتالىقتا بريفينگ جانە شاعىن كەڭەستەر وتكىزىلەتىن بولادى. سونداي-اق مۇندا تۇركىستان وبلىسىنىڭ وڭىرلىك كوممۋنيكاتسيالار قىزمەتى, ق.ا.ياساۋي اتىنداعى حقتۋ-دىڭ ستۋدەنتتەرىنەن قۇرالعان ەرىكتى جاس جۋرناليستەر كلۋبى جۇمىس ىستەيدى. مەديا ورتالىق ارقىلى تۇرىك, ءازىربايجان, ورىس, وزبەك, قىرعىز تىلدەرىندە اقپارات تاراتىلادى. اقپاراتتاردى اعىلشىن تىلىندە دە تاراتۋ كوزدەلىپ وتىر. قاسيەتتى قالاعا كەلگەن وتاندىق جانە شەتەلدىك جۋرناليستەر اقپارات تاراتۋدا ورتالىقتىڭ قىزمەتىن اقىسىز پايدالانا الادى. ال, ينتەللەكتۋالدى كلۋبتا ءتۇرلى تاقىرىپتاردا باسقوسۋلار, دوڭگەلەك ۇستەلدەر مەن ەل رۋحانياتىنا وڭ ىقپال ەتەتىن جيىندار وتكىزىلەتىن بولادى.
ايتا كەتەيىك, سالتاناتتى شاراعا تۇركيا, ءازىربايجان, وزبەكستان, تاتارستان جانە قىرعىزستان رەسپۋبليكالارى اقپارات قۇرالدارىنىڭ جەتەكشىلەرى مەن وكىلدەرى قاتىستى.
عالىمجان ەلشىباي,
«ەگەمەن قازاقستان»
تۇركىستان
