بۇگىندە ءتۋريزمدى دامىتۋ باعىتىندا وڭىردە جۇيەلى باعدارلامالار دايارلانعان. ياعني الداعى ۋاقىتتا كەلۋشىلەر سانى تاعى ارتا تۇسەتىنىنە سەنىم مول.
ال سەيسەنبى كۇنى ميلليونىنشى بولىپ تىركەلگەن قوناق اقش-تىڭ سولتۇستىك كورولينا شتاتىنان كەلىپتى. ەرلى-زايىپتى ۋيليام جانە باربارا برەنچتەردى تۇركىستان وبلىسىنىڭ اكىمى جانسەيىت تۇيمەباەۆ ياساۋي كەسەنەسى الدىندا كۇتىپ الدى. قازاقستانعا العاش كەلىپ وتىرعان ۋيليام برەنچ امەريكالىقتار تۇركىستاندى ورتا ازيا مەملەكەتتەرى ىشىندەگى تاريحى باي, كيەلى مەكەندەردىڭ ءبىرى رەتىندە تانيتىنىن ايتادى. اقش ازاماتتارىنىڭ قاسيەتتى قالاعا ءجيى كەلۋى دە سوندىقتان. ء«بىز تۇركىستان قالاسى مەن ءياساۋيدىڭ تاريحىنان حاباردارمىز. قازاقستانعا, تۇركىستان وڭىرىنە كەلگەلى قازاق حالقىنىڭ قوناقجايلىعى مەن دارقاندىعىنا كۋا بولدىق. اقش-قا بارعاننان كەيىن ونداعى وتانداستارىمىزعا وسى قۇندىلىقتارىڭىزدى جەتكىزىپ, كەلەسى جىلى ارنايى تاعى ات باسىن بۇرامىز», - دەدى ۋيليام برەنچ.
وبلىس اكىمى تۇركىستانعا كەلگەن ميلليونىنشى قوناقتارعا ۇلتتىق شاپان كيگىزىپ, قامشى, تايقازان سىيلادى. سونداي-اق, تۇركىستان وڭىرىندە تۋريزم الەۋەتىن ارتتىرۋ ءۇشىن ارتقارىلىپ جاتقان جۇمىستارمەن تانىستىردى.
عالىمجان ەلشىباي,
«ەگەمەن قازاقستان»
تۇركىستان وبلىسى
