تۇركىستان وبلىسىنىڭ اكىمى جانسەيىت تۇيمەباەۆتىڭ ايتۋىنشا, بۇگىندە وبلىس اۋماعىنداعى 9798 كاسىپورىندا 105811 جۇمىسشىنىڭ 13674-ءى (12,9%) 42500 تەڭگەدەن تومەن جالاقى الادى. بۇل دەرەكتەر وبلىس اكىمدىگى جۇرگىزگەن ارنايى تالداۋ ناتيجەسىندە انىقتالعان. بۇدان بولەك, وبلىستاعى مەملەكەتتىك بيۋدجەتتىك مەكەمەلەردە 42 500 تەڭگەدەن تومەن جالاقى الاتىن 52 170 جۇمىسشى بار ەكەنى بەلگىلى بولدى. وسىعان وراي, اتالعان كاسىپورىندار مەن مەكەمەلەردە ەلباسىنىڭ جولداۋىن ىسكە اسىرۋ ماقساتىندا ۇگىت-ناسيحات جۇمىستارى جۇرگىزىلگەن. ناتيجە بار. مىسالى, «كەنتاۋ ترانسفورماتور زاۆودى» اكتسيونەرلىك قوعامى ورتاشا جالاقىنى 40 پايىزعا ياعني, 75 مىڭنان 105 مىڭ تەڭگەگە دەيىن وسىرمەك. «كاس بەتون» جشس-ىندە دە ورتاشا جالاقى ەداۋىر كوتەرىلەتىن بولادى. ءوڭىر باسشىسىنىڭ ايتۋىنشا, وبلىستاعى جۇزگە جۋىق ءىرى جانە ورتا كاسىپورىندار مەن مەكەمەلەردە ءتۇسىندىرۋ جۇمىستارى جانە كەلىسسوزدەر جۇرگىزىلىپ, ولاردىڭ باسىم بولىگىنىڭ باسشىلارى جۇمىسشىلارىنىڭ جالاقىسىن كوتەرۋگە كەلىسىم بەرگەن.
عالىمجان ەلشىباي,
«ەگەمەن قازاقستان»
تۇركىستان وبلىسى
