بۇگىندە الاتاۋ اۋدانى مەگاپوليستىڭ جەدەل وركەن جايعان ەلدى وڭىرىنە اينالدى. ون جىل ىشىندە تۇرعىندارى 70%-كە ءوسىپ, حالىق سانى 250 مىڭنان اسىپ جىعىلعان. ورتالىقتاندىرۋ قاعيداسى بويىنشا مۇندا 12 مەكتەپ, وسىنشاما مەديتسينالىق مەكەمە, سونىمەن قاتار 98 مەملەكەتتىك جانە جەكە بالا باقشالار اشىلعان.
شاھار باسشىسى ءوز سوزىندە, 10 جىل ىشىندە اۋداندى دامىتۋعا 430 ملرد. تەڭگە جۇمسالعانىن, 30 مىڭنان استام جۇمىس ورنى قۇرىلعانىن, 2,7 ملن.كۆ.م. تۇرعىن ءۇي سالىنعانىن ايتادى.
– ەلباسى وسى 10 جىلدا الاتاۋ اۋدانىنا 10 رەت كەلدى. مەملەكەت باسشىسى اۋداننىڭ دامۋ بارىسىمەن تۇراقتى تانىسىپ, ۇدايى قولداۋ ءبىلدىرۋىنىڭ ارقاسىندا بۇگىندە الاتاۋ اۋدانى قالا تۇرعىندارى مەن قوناقتارى ءۇشىن جاڭا ورتالىققا اينالدى. بۇگىنگى كۇنى قالامىزدىڭ ءاربىر 7-ءشى تۇرعىنى الاتاۋ اۋدانىندا تۇرادى, سوندىقتان جايلى قالا كەڭىستىگىن قۇرۋ ماقساتىندا بيىلعى جىلى 600 ورىندى تاعى ءبىر مەكتەپ جانە 880 ورىندى ءتورت جاڭا بالا باقشا ىسكە قوسىلادى. بۇلاردان وزگە, تاعى ءبىر جاڭا اۋرۋحانا مەن ەكى ەمحانا سالىنادى – دەيدى باۋىرجان بايبەك.
بولاشاقتا الاتاۋ اۋدانى الماتىنىڭ قۋاتتى ءوندىرىس ورتالىعىنا اينالماق. يندۋستريالاندىرۋ باعدارلاماسى اياسىندا مۇندا ارنايى يندۋستريالدى ايماق قۇرىلدى. قىركۇيەك ايىندا عانا اۋداندا جاپوندىق, رەسەيلىك, قىتايلىق جانە يتالياندىق ينۆەستيتسيالار ەسەبىنەن بىرنەشە جوعارى تەحنولوگيالى زاۋىتتار ىسكە قوسىلعان بولاتىن.
اۋدان اۋماعىندا بوي تۇزەگەن بىرقاتار مادەني جانە سپورت وبەكتىلەردىڭ ورنى بولەك. ولاردىڭ ىشىندە «الاتاۋ» ءداستۇرلى ونەر تەتاترى, ءداستۇرلى مۋزىكانىڭ مۋلتيمەديالىق ورتالىعى, قولونەرشىلەر ورتالىعى, «الماتى ارەنا» جانە «رۋحاني جاڭعىرۋ» باعدارلاماسى شەڭبەرىندە جەكە قارجى ەسەبىنەن سالىنعان جەڭىل اتلەت ستاديونىن ايرىقشا اتاۋعا بولادى.
كۇن ساناپ تولاعايداپ تولىسقان جاس اۋداننىڭ 10 جىلدىعى كەڭ كولەمدە اتاپ ءوتىلدى. ارنايى كونتسەرتتىك باعدارلاما مەن ءتۇرلى سپورتتىق شارالار ۇيىمداستىرىلىپ, الماتى اسپانىن ءان تەربەدى.
ارمان وكتيابر,
«ەگەمەن قازاقستان»
الماتى
