كەلۋشىلەر الدىمەن قازاقتىڭ ۇلتتىق كيىمى مەن قولونەرىنىڭ, سۋرەتشىلەر شىعارماسىنىڭ كورمەسىن تاماشالادى. اتى ايتىپ تۇرعانداي, قوعامدىق كەلىسىم مەن جالپىۇلتتىق بىرلىكتىڭ قازاقستاندىق ۇلگىسىن ناسيحاتتاۋعا ارنالعان رەسپۋبليكالىق لەكتوريدىڭ ماقساتى – «رۋحاني جاڭعىرۋ» باعدارلاماسىن جانە «قازاقتانۋ» جوباسىن ىسكە اسىرۋ اياسىندا قازاقستان حالقى اسسامبلەياسى قىزمەتىنىڭ باعىتتارىن تالقىلاۋ, وڭىرلىك دەڭگەيدە قحا-نىڭ پراكتيكالىق مىندەتتەرىن بەلگىلەۋ بولاتىن. وعان قازاقستان حالقى اسسامبلەياسى توراعاسىنىڭ ورىنباسارى, «lituanica» قوعامدىق بىرلەستىگىنىڭ توراعاسى ۆيتالي تۆاريوناس, وبلىس اكىمىنىڭ ورىنباسارى مارات جۇندىباەۆ, عالىمدار مەن قوعامدىق بىرلەستىكتەر, ۇيىمدار, زيالى قاۋىم وكىلدەرى قاتىستى. وسى لەكتوريدە ەلدىڭ ەلدىگىن, حالىقتىڭ بىرلىگىن نىعايتاتىن, كەلەر ۇرپاققا مۇرا ەتىپ قالدىراتىن ەكى ماسەلە تالقىلاندى. ونىڭ ءبىرى – «قازاقتانۋ» جوباسى توڭىرەگىندە ايتىلعان ماسەلەلەر.
– «قازاقتانۋ» جوباسىنىڭ ماقساتى – قازاق ەتنوگرافياسىن تانۋ, حالقىمىزدىڭ ءداستۇرى, ادەبيەتى, مادەنيەتى, فيلوسوفياسى تۋرالى ەلىمىزدەگى ءتۇرلى ەتنوستارعا تەرەڭ اقپاراتتار بەرۋ بولىپ تابىلادى. ونىڭ سىرتىندا بۇل جوبانىڭ ەتنوسارالىق قارىم-قاتىناستار, كوشى-قون ماسەلەسى, قازاق داستۇرلەرىن ساقتاۋ, ونى جاڭعىرتۋ سەكىلدى ىشكى باعىتتارى دا تولىپ جاتىر. لەكتوريدە كوشى-قون, ەتنوسارالىق ماسەلەلەردى قامتىدىق. ادامدارعا حالىقتىق داستۇرلەرىمىزدىڭ ءتۇپ-تامىرىنان قول ءۇزىپ قالماۋىمىزدى تۇسىندىردىك. وسىنداي ماسەلەلەر قازاقستاندى وتانىم دەيتىن ادامداردىڭ بارلىعىن ويلانتۋى ءتيىس, – دەدى تاريح عىلىمدارىنىڭ دوكتورى, پروفەسسور جامبىل ارتىقباەۆ.
لەكتوريگە ەكىنشى ارقاۋ بولعان تاقىرىپ ء«داستۇرلى قازاق قوعامىنداعى مەدياتسيا» اتتى ماسەلە ەدى. مەدياتسيا دا حالقىمىزدىڭ ءبىر قۇندىلىعى دەپ ايتۋعا بولادى. كەيدە ءبىر اۋىلدى ءبىر اقساقالدىڭ بيلەۋى, ۇلكەنگە قۇرمەت, كىشىگە ىزەت كورسەتۋ, اركىمنىڭ ءوز ورنى بولۋى ءتيىس دەگەن سياقتى دالانىڭ جازىلماعان زاڭدارىنىڭ ءىزى كومەسكىلەنگەندەي بولادى.
شاراعا جينالعاندار رۋدنىي, ليساكوۆ قالالارى جانە قارابالىق اۋداندارىندا بولىپ, تۇرعىندارمەن كەزدەستى.
ءنازيرا جارىمبەت,
«ەگەمەن قازاقستان»
قوستاناي
