مۇنىڭ ءوزى, اسىرەسە زەينەتكەرلەرگە قيىنعا سوعۋدا. ماسەلەن, ءبىز بيىل بولعان اقمولا وبلىسىنىڭ زەرەندى اۋدانىندا وسىنداي ناۋقاستار سانى 800-گە جەتكەنىن بىلدىك. ولاردىڭ باسىم كوپشىلىگى زەينەتكەرلەر ەكەن.
گلاۋكوما قازاقستان رەسپۋبليكاسىنداعى الەۋمەتتىك ءمانى بار پاتالوگيالار تىزبەسىنە ەنگىزىلگەن. كوز اۋرۋلارى عىلىمي-زەرتتەۋ ينستيتۋتىنىڭ دەرەكتەرىنە قاراعاندا, 2011 جىلدان باستاپ 2017 جىلعا دەيىن دەنساۋلىق ساقتاۋدى دامىتۋعا ارنالعان «سالاماتتى قازاقستان» جانە «دەنساۋلىق» مەملەكەتتىك باعدارلامالارى بويىنشا 40 جانە 70 جاس ارالىعىنداعى ازاماتتار اراسىندا ارنايى سكرينينگ جۇرگىزىلىپ كەلگەن. سونىڭ ناتيجەسىندە 7 جىل ىشىندە 12,5 ميلليونعا جۋىق ادام قارالىپ, گلاۋكوماعا جاڭادان شالدىققان 33 364 ادام انىقتالعان.
سكرينينگ وتكىزۋدىڭ ارقاسىندا جاڭادان انىقتالعان ناۋقاستار سانى 49 پايىزعا ارتىپ, ولاردىڭ قاتارى جىل سايىن ورتا ەسەپپەن 4 مىڭ ادامعا كوبەيىپ بارادى. 2017 جىلدىڭ سوڭىندا ەلىمىز بويىنشا گلاۋكومامەن سىرقاتتانۋشىلار سانى 68195 ادامعا جەتكەن.
ەلىمىزدە گلاۋكوماعا شالدىعۋشىلىق كوبەيىپ بارا جاتقاندىعىن جانە وسى دەرتكە ۇشىراعانداردىڭ اراسىندا جاسى ۇلعايعان ادامدار كوپ ەكەندىگىن ەسكەرە وتىرىپ, ءبىز پرەمەر-ءمينيستردىڭ ورىنباسارى ەربولات دوساەۆتىڭ اتىنا مىناداي ۇسىنىستاردى ەنگىزدىك:
1. گلاۋكومانى ەمدەۋگە قاجەتتى پرەپاراتتاردى ازاماتتار تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە قامتاماسىز ەتىلەتىن دارىلىك زاتتار تىزبەسىنە ەنگىزۋ ماسەلەسىن قاراستىرۋ كەرەك. ويتكەنى مۇنداي پرەپاراتتاردى ءومىر بويى قولدانۋ قاجەت بولعاندىقتان, پاتسيەنتتەرگە ەلەۋلى مولشەردە قارجى شىعىنداۋعا تۋرا كەلۋدە. ال قاراجات جەتىسپەۋشىلىگىنە بايلانىستى گلاۋكومادان تۇراقتى ەمدەلۋدەن باس تارتۋ ادامداردى سوقىرلىققا دۋشار ەتەتىندىگىن ەسكەرۋ قاجەت;
2. ەلىمىزدىڭ تۇرعىندارى اراسىندا گلاۋكومانى انىقتاۋعا ارنالعان سكرينينگتىك زەرتتەۋلەردى ودان ءارى جالعاستىرعان ءجون;
3. گلاۋكومانىڭ جانە باسقا وفتالمولوگيالىق پاتولوگيالاردىڭ رەگيسترىن جاساۋعا جانە ەنگىزۋگە قارجى ءبولۋ كەرەك. وسى جونىندە الماتى قالاسىندا قولعا الىنعان قاناتقاقتى جوبانى بارلىق وڭىرلەردە ەنگىزگەن دۇرىس.
كارىباي مۇسىرمان,
ءماجىلىس دەپۋتاتى
