ەكى كونفەرەنتسيا دا بيىل تۇركسوي ۇيىمى تاراپىنان اتاۋلى جىل بولىپ جاريالانعان قىرعىز جازۋشىسى شىڭعىس ايتماتوۆتىڭ 90 جىلدىعىنا جانە قازاق اقىنى ماعجان جۇمابايدىڭ 125 جىلدىعىنا ارنالدى. تۇركسوي باس حاتشىسىنىڭ ورىنباسارى فىرات پۋرتاش باستاعان رەسمي دەلەگاتسيا مەن جيىنعا قاتىسۋشى عالىمداردى ماكەدونيا سىرتقى ينۆەستيتسيالار ءمينيسترى ادنان كاحيل جانە مادەنيەت ءمينيسترى اساف ادەمي ارنايى قابىلداپ, ۇيىمنىڭ مادەني ينتەگراتسيا سالاسىنداعى جاڭاشىل جوبالارىنا تابىس تىلەدى.
كونفەرەنتسيادا ءسوز العان عالىمدار قازاق اقىنى ماعجان جۇماباي مەن قىرعىز جازۋشىسى شىڭعىس ايتماتوۆ مۇرالارىنىڭ تۇركى حالىقتارىنىڭ مادەني ومىرىندەگى ورنى مەن ماڭىزىنا توقتالىپ, ولاردىڭ الەم ادەبيەتىنە اكەلگەن جاڭالىقتارىن ءسوز ەتتى.
جيىن كەزىندە «ماعجان جۇماباي جىلى» اياسىندا تۇركسوي حالىقارالىق ۇيىمى تاراپىنان جاريالانعان ماعجان اقىننىڭ ءۇش جيناعى تانىستىرىلدى. ولاردىڭ ءبىرىنشىسى - تۇرىك تىلىنە جاڭادان اۋدارىلعان (اۋدارماشى - الي اكباش) «الىستاعى باۋىرىما» جيناعى, ەكىنشىسى – اقىننىڭ ون ەكى تىلدەگى اۋدارمالارىنىڭ توپتاما جيناعى (قۇراستىرعان- اسقار تۇرعانباەۆ), ءۇشىنشىسى – ءازىربايجان تىلىندەگى (اۋدارماشى – راميز اسكەر) ماعجاننىڭ «تۇركىستان» توپتاماسى.
سكوپە قالاسىنداعى ماكەدونيا مەملەكەتتىك ۋنيۆەرسيتەتىنىڭ تۇركولوگيا بولىمىندە جانە گوستيۆار قالاسىنداعى ۆيزيون ۋنيۆەرسيتەتتەرىندە وتكىزىلگەن كونفەرەنتسيالاردىڭ ناتيجەسىندە ماعجان اقىننىڭ مۇرالارىن ماكەدون تىلىنە اۋدارۋ كەلىسىلدى.
