«شەرتپە كۇي» فەستيۆالىنىڭ باستى ماقساتى – ەلىمىزدەگى تالانتتى كۇيشىلەردى قولداۋ, شەرتپە كۇي ونەرىن دامىتۋ بولىپ تابىلادى. سايىسقا قازاقستاننىڭ ەڭبەك سىڭىرگەن قايراتكەرى, قازاق ۇلتتىق ونەر ۋنيۆەرسيتەتىنىڭ پروفەسسورى, داۋلەسكەر كۇيشى جانعالي ءجۇزباي توراعالىق ەتتى. سونىمەن قاتار, «قۇرمەت» وردەنىنىڭ كاۆالەرى, تانىمال كۇيشى مۇحامەدجان تىلەۋحان, قۇرمانعازى اتىنداعى قازاق ۇلتتىق كونسەرۆاتورياسىنىڭ پروفەسسورى, كۇيشى ءبىلال ىسقاق, كۇيشى, كۇي زەرتتەۋشىسى مۇرات ابۋعازى, تاتتىمبەت اتىنداعى رەسپۋبليكالىق كۇيشىر كونكۋرسىنىڭ باس جۇلدەگەرى قايرات ايتباەۆ سەكىلدى ساڭلاقتار قازىلىق ەتتى.
فەستيۆالدىڭ سالتاناتتى اشىلۋى قارساڭىندا وتكەن ارنايى ءباسپاسوز ءماسليحاتىندا ءسوز العان قازىلار القاسىنىڭ توراعاسى جانعالي ءجۇزباي ءوز پىكىرىن ايتتى.
«جالپى «شەرپە كۇي» سايىسى بۇرىن دا بىرنەشە مارتە وتكەن. ال, رەسپۋبليكالىق دەڭگەيدە, ۇلتىمىزدىڭ ۇلى مۇراسى رەتىندە تۇڭعىش رەت ۇلىقتالىپ وتىر. قازاقتىڭ قانىن دا, جانىن دا, سالت- ءداستۇر, ادەپ-عۇرپىن ءبىر اۋىز ءسوزسىز تۇسىندىرەتىن ەرەكشە قۇدىرەت ول – كۇي. كۇي ونەرى تەك قازاققا عانا ءتان باعا جەتپەس اسىل مۇرا. بۇگىندە التايدان اتىراۋعا, ارقادان الاتاۋعا دەيىن ىرگە تەپكەن حالقىمىزدىڭ اراسىندا شەرپە كۇيدىڭ ورىنداۋشىلىق نەگىزىن سالىپ, مەكتەبىن قالىپتاستىرۋشى بايجىگىت, بەيسەمبى, تاتتىمبەت, قوجەكە, سۇگىر سىندى ۇلى كۇيشىلەردىڭ ەسىمى كەڭ تاراعان. ءبىز اتا-بابادان جەتكەن سول مۇرانى كەيىنگىلەرگە جەتكىزۋشىلەرمىز. بۇگىنگى رۋحاني جاڭعىرۋ اياسىندا قولعا الىنعان كۇي فەستيۆالىنىڭ كيەلى جەتىسۋ جەرىنەن باستالۋىنىڭ ءوزى زور قۋانىش. مەن بارلىق قاتىسۋشىلارعا ساتتىلىك تىلەيمىن» –دەدى ول.
فەستيۆالدىڭ سالتاناتتى اشىلۋىندا الماتى وبلىسى اكىمىنىڭ ورىنباسارى, ءداستۇرلى ءانشى اقان ءابدۋالى ءسوز سويلەپ, بارشى جينالعان قاۋىمدى كۇي مەرەكەسىمەن شىن جۇرەكتەن قۇتتىقتاپ, سايىسكەرلەرگە ساتتىلىك تىلەدى.
سايىس ەكى كەزەڭنەن تۇردى. بىرىنشە كەزەڭدە كۇيشىلەر بايجىگىتتىڭ «كوكبالاق», تاتتىمبەتتىڭ «بەس تورە», توقانىڭ «باستاۋ قوسباسار», اققىزدىڭ «مۇڭدى قىز» كۇيلەرىن ورىنداپ, ءوز شەبەرلىكتەرىن كورسەتتى. ناتيجەسىندە 24 سايىسكەردىڭ ىشىنەن 12 كۇيشى كەلەسى كەزەڭگە جولداما الدى.
ءى. جانسۇگىروۆ اتىنداعى مادەنيەت سارايىندا وتكەن ءدۇبىرلى دودانىڭ ەكىنشى كەزەڭىندە 12 كۇيشى ءوزارا مىقتىنى انىقتاپ, سايىس باعدارلاماسىنا ەنگەن سۇگىردىڭ «بەس جورعاسىن», ابىكەن حاسەنوۆتىڭ «قوڭىرىن», تولەگەن مومبەكوۆتىڭ «سالتاناتىن», نۇرعيسا تىلەنديەۆتىڭ «ارمانىن» جانە بەيىسبايدىڭ «شىڭىراۋ» كۇيلەرىن تارتتى.
قازىلار القاسىنىڭ ءبىر اۋىزدان قابىلداعان شەشىمى ناتيجەسىندە باس جۇلدە استانا قالاسىنان كەلگەن تانىمال كۇيشى اقجۋسان يمانعازىقىزىنا بەرىلدى. ءبىرىنشى ورىندى تۇركىستاندىق سەرىك پازىلوۆ, ەكىنشى ورىندا اتىراۋلىق اينۇر ساكۋپوۆا مەن شىعىس قازاقستاننان كەلگەن سىرىم نۇرمولدين ەنشىلەسە, جۇلدەلى ءۇشىنشى ورىندى پاۆلوداردان كەلگەن ەرتىس سايىرحان مەن الماتىلىق ماعاۋيا سامال قانجىعالارىنا بايلادى.
فەستيۆالدىڭ باس جۇلدە يەگەرىنە مادەنيەت ءمينيسترى ارىستانبەك مۇحامەدي ۇلىنىڭ اتىنان ارنايى ديپلوم مەن «التىن دومبىرا» ءمۇسىنى, سونىمەن قاتار, 1 000 000 تەڭگە قارجىلاي سىيلىق تابىستالدى.
اقجۋسان يمانعازىقىزى – تانىمال كۇيشى. ونىڭ ورىنداۋىنداعى كۇيلەر قىتايدىڭ حالىق راديوسىنىڭ التىن قورىندا ساقتالعان. فرانتسۋز مۋزىكاتانۋشىسى گساۆە اللەزدىڭ باستاماسىمەن پاريجدە شىققان تاتتىمبەت كۇيلەرىنىڭ ديسكىسىنە اقجۋساننىڭ ورىنداۋىنداعى تاتتىمبەتتىڭ بەس كۇيى ەنگەن.
