جاسىراتىنى جوق, تورتكۇل دۇنيەنىڭ تەڭدەسسىز بالۋاندارى باس قوسقان بايراقتى باسەكەدە ءدال وسى ورەندەر جۇلدە الادى دەپ ويلاعان جانكۇيەرلەر كەمدە-كەم. دەسەك تە ەسىمدەرى كوپشىلىككە بەيمالىم قازاقتىڭ قوس ورەنى ۆەنگريانىڭ استاناسىندا وتە كەرەمەت ونەر كورسەتىپ, بۇگىنگى تاڭدا وزدەرىنىڭ سپورتتىق مانسابىنداعى ەڭ زور كورسەتكىشكە قول جەتكىزىپ وتىر. اتاپ ايتساق, 60 كيلو سالماقتاعى ايدوس سۇلتانعالي العاشقى اينالىمدا ەۋروپا بىرىنشىلىگىنىڭ قولا جۇلدەگەرى, ۋكراينالىق دميتري تسىمباليۋكتى (6:1) ۇتسا, ىلە-شالا ريو وليمپياداسىنىڭ كۇمىس جۇلدەگەرى, ازيا ويىندارىنىڭ جەڭىمپازى, قۇرلىق چەمپيونى, جاپونيالىق سينوبۋ وتاعا (7:5) شاڭ قاپتىردى. شيرەك فينالدا جاسوسپىرىمدەر اراسىنداعى الەم بىرىنشىلىگىنىڭ جەڭىمپازى, قىرعىزستاندىق قالى سۋلايمانوۆتىڭ (9:0) تاس-تالقانىن شىعارعان ول جارتىلاي فينالدا ەۋروپا چەمپيونى, رەسەيلىك سەرگەي ەمەلينگە (0:9) ەسە جىبەردى. ال قولا مەدال ءۇشىن باسەكەدە ايدوس سولتۇستىك كورەيانىڭ وكىلى سە ۋنگ ريدەن (1:1) ايلاسىن اسىردى.
67 كيلو سالماقتاعى مەيىرجان شەرماحانبەتكە جەرەبە تىپتەن قيىن ءتۇستى. تۇساۋكەسەر كەزدەسۋىندە ول الەم بىرىنشىلىگىنىڭ قولا جۇلدەگەرى, تۇركيالىق يۋكسەل اتاقانمەن جولىقتى. الايدا ايگىلى قارسىلاسىنىڭ ەش قايمىقپاعان قانداسىمىز 12:0 ەسەبىمەن ايقىن جەڭىسكە قول جەتكىزدى. ودان كەيىن مەيىرجان اتاعى جەر جارعان كۋبا قابىلانى, الەم چەمپيونى, وليمپيا ويىندارىنىڭ جەڭىمپازى يسماەل بوررەرونىڭ «بىت-شىتىن» شىعاردى. شيرەك فينالدا ازيا ويىندارىنىڭ جەڭىمپازى, يراندىق مۇحاممادرەزا ابدولحاميد رەزايدى تىرپ ەتكىزبەدى. بۇل كەزدەسۋدە 9:0 ەسەبى تىركەلدى. جارتىلاي فينالدا الەم بىرىنشىلىگىنىڭ ەكى دۇركىن قولا جۇلدەگەرى, ەۋروپانىڭ ەكى دۇركىن چەمپيونى, ەۋروپا ويىندارىنىڭ جەڭىمپازى ارتەم سۋركوۆتان (1:3) ۇتىلسا, ءۇشىنشى ورىن ءۇشىن تارتىستا فرانتسيانىڭ مىقتىسى ماماداسسا سيللانى جەڭدى.
عالىم سۇلەيمەن,
«ەگەمەن قازاقستان»
