كورمەدە «قىزىل تراكتور» قازاقستاندىق ونەر توبىنىڭ ءۇش جۇزگە جۋىق ەكسپوناتى قويىلعان: كوركەم سۋرەت, گرافيكا, مونۋمەنتتى مۇسىندىك جۇمىس, كەڭىستىكتىك نىسان, ينستاللياتسيا, پەرفورمانستاردىڭ مۇراعاتتىق سۋرەتى جانە بەينەلەرى. كورمەنىڭ سالتاناتتى اشىلۋىندا «قىزىل تراكتور» ونەر توبى «تازارتۋ» اتتى ءوزىنىڭ تانىمال پەرفورمانستارىنىڭ ءبىرىن ۇسىندى.
ايتا كەتكەن ءجون, قازاقستاننىڭ ارت-ساحناسىندا 90-جىلداردىڭ باسىنان بەرى بەلسەندى ەڭبەك ەتىپ جۇرگەن «قىزىل تراكتور» قاتىسۋشىلارى – ترانساۆانگارد قوزعالىسىنىڭ نەگىزىن سالۋشىلار. توپتى كەڭىستىكتىك قۇرىلىمدىق كومپوزيتسيا مەكتەبىنىڭ وقىتۋشىسى جانە جولىن قۋشى ۆيتالي سيماكوۆ قۇرعان. توپ قۇرىلعان ۋاقىتتان بەرى اتاۋىن بىرنەشە رەت وزگەرتكەن: «ساا توبى», «شىمكەنت-ترانساۆانگارد», «سي قۇرىلىمدىق مەكتەبى». 1995 جىلى مولداقۇل نارىمبەتوۆتىڭ ۇسىنىسىمەن «قىزىل تراكتور» اتاۋى بەرىلدى. اۆتوردىڭ تۇپكى ويىنا سايكەس, بۇل توپ الەمدى شارلاۋى ءتيىس.
توپتىڭ مۇشەلەرى, ارقايسىسىنىڭ دەربەس شىعارماشىلىق جولىنىڭ بولۋىنا قاراماستان, «ويلار جيناعى: ويداعى وقيعالار» كورمەسىندەگىدەي ءجيى بىرىگىپ تۇرادى.
«قىزىل تراكتور» توپ تاجىريبەسىندە ايماقتاعى بولىپ جاتقان الەۋمەتتىك جانە ساياسي وزگەرىستەرمەن تىعىز بايلانىستا بولاتىن كوشپەلىلەر, سوپىلىق, شامانيستىك فيلوسوفيالاردى قايتا ويلاستىرىپ, پايدالاناتىنىمەن بەلگىلى. كوشپەلىلەردىڭ تۇراقتى قوزعالىسى, 90-شى جىلدارداعى تانىمال نارراتيۆ, سونداي-اق تابيعي ماتەريالداردىڭ – اعاش, ءجۇن, كيىز, توقىمانىڭ قاسيەتتىلىگى قولدان جاسالعان شاڭقوبىز, دومبىرا جانە بارابان سەكىلدى حالىق اسپاپتارىن پايدالاۋمەن تەڭ دارەجەدە توپتىڭ پەرفورمانستارىندا ءجيى كەزدەسەدى.
ەكسپوزيتسيانىڭ ورتالىعىندا – سۋرەتشى, اقىن, فيلوسوف جانە «قىزىل تراكتور» توبىنىڭ باستى تۇلعاسى م. نارىمبەتوۆتىڭ كەسكىندەمەسى قويىلعان. م. نارىمبەتوۆتىڭ كورمەگە قويىلعان شىعارمالارىن ەۋرازيالىق مادەني اليانس قامتاماسىز ەتتى جانە جۇزدەگەن باسقا ەكسپونات سۋرەتشىلەردىڭ وزدەرىنىڭ شەبەرحانالارىنان, قازاقستان مەن ورتالىق ازياداعى مۋزەيلەر مەن جەكە كوللەكتسيالاردان جينالدى.
كورمەنىڭ «ويلار جيناعى: ويداعى وقيعالار» اتاۋى كورمە كۋراتورى ليزا ءاحماديدىڭ شىعارما جەلىسىنە قاتىستى, ول سۋرەتشىنى كوركەمونەر نارىعىنان تىس ءبىرىنشى كوللەكتسيا جيۋشى دەپ اتايدى, بۇل سونىمەن قاتار 2018 جىلعى ازيا زاماناۋي ونەر اپتالىعىنىڭ نەگىزگى تۇجىرىمداماسى.
«فوكۋس قازاقستان» جوباسىن «رۋحني جاڭعىرۋ» باعدارلاماسى اياسىندا مادەنيەت جانە سپورت مينيسترلىگىنىڭ قولداۋىمەن قازاقستاننىڭ ۇلتتىق مۋزەيى ۇيىمداستىرۋدا.
«ەگەمەن-اقپارات»
