ساربازداردىڭ اسكەري بولىممەن قوشتاسۋ ءىس-شاراسى سالتاناتتى تۇردە اقتاۋ, اقتوبە جانە اتىراۋ اسكەري بولىمدەرىنىڭ جاۋىنگەرلىك تۋىمەن قوشتاسۋ عۇرىپىمەن اياقتالدى. ءبىر جىل بويى ساربازدار جاۋىنگەرلىك ماماندىقتى مەڭگەرىپ, جاۋىنگەرلىك دايارلىقتا ايتارلىقتاي جەتىستىكتەرگە جەتتى. ولار وزدەرىنىڭ ماشىقتىلىعىن كوپتەگەن وقۋ-جاتتىعۋلارى مەن «باتىس-2018» ستراتەگيالىق كوماندالىق-شتابتىق وقۋ-جاتتىعۋى كەزىندە كورسەتە الدى.
وسى ءىس-شاراعا وراي, قىزمەتتىك مىندەتتەرىن ۇلگىلى اتقارعان ساربازدار گراموتارلارمەن, العىس حاتتارمەن, باعالى سىيلىقتارمەن ماراپاتتالدى, ولاردىڭ ەڭ ۇزدىكتەرى اسكەري اتاققا يە بولدى, ولاردىڭ ءبىرى - ەفرەيتور سارتاي دارحان.
-اسكەردەگى ءبىر جىل, مەن جانە مەنىڭ قىزمەتتەستەرىم ءۇشىن ناعىز ەرلىك پەن دوستىقتىڭ, ءور مىنەزدىلىك پەن قايراتتىلىقتىڭ ەمتيحانى بولدى. بۇگىن بىزدەر كىندىك قانىمىز تامعان ولكەمىزگە ناعىز ەر ازامات بولىپ ورالۋدامىز. بۇنىڭ بارلىعى دەرلىك ءبىزدىڭ كومانديرلەرىمىزدىڭ ارقاسىندا, سول ءۇشىن ولارعا مىڭ العىس, دەدى ەفرەيتور سارتاي دارحان.
اسكەري بولىمدەردەگى قالىپتاسىپ قالعان سالتتارعا سايكەس ساربازدار ساپتىق الاڭمەن سوڭعى رەت شەرۋمەن ءوتتى. ءبىر قىزىعى, مەرزىمدى اسكەري قىزمەتشىلەردىڭ ءبىرازى كەلىسىمشارت بويىنشا اسكەري قىزمەتكە قالۋعا بەل بۋىپ, قارۋلى كۇشتەردىڭ قاتارىندا تۇراقتى تۇردە قالدى, ال كەتىپ بارا جاتقانداردىڭ ورنىن ەلىمىزدىڭ بارلىق ايماقتارىنان كۇزگى شاقىرىلىمنىڭ جاس ساربازدارى تولىقتىرادى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
