قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ماڭعىستاۋ وبلىسى بويىنشا دەپارتامەنتىنىڭ باسشىسى نۇرگۇل جاننازاروۆا جانە مۇنايلى اۋدانىنىڭ اكىمى نۇرلان تاجىباەۆ قىزمەت الۋشىلارمەن تىلدەسىپ, اكتسيانىڭ ماقساتى تۋرالى ايتىپ بەردى.
ەلباسىنىڭ ءوزىنىڭ جىل سايىنعى قازاقستان حالقىنا ارناعان جولداۋلارىندا تۇرعىندارعا مەملەكەتتىك قىزمەت كورسەتۋدىڭ ساپاسىن ارتتىرۋ ارقىلى ازاماتتاردىڭ مەملەكەتتىك ورگانداردىڭ قىزمەتىنە دەگەن سەنىمىن كوتەرۋ ماڭىزدىلىعىن ەرەكشە اتاپ كورسەتىپ كەلەدى.
-كەز-كەلگەن مەملەكەتتىك قىزمەت ءتۇرى ساپالى تۇردە كورسەتىلۋى ءتيىس. ءبىزدىڭ دەپارتامەنت وسىعان ءمان بەرەدى. ال قىزمەت تۇرلەرى قاراپايىم حالىققا تۇسىنىكتى بولۋىنا مەملەكەتتىك قىزمەتشىلەر قامتاماسىز ەتۋى قاجەت. قازىر بارلىق جاعداي جاسالعان جانە تۇرعىندار وزدەرىنىڭ ۋاقىتتارىن ۇنەمدەي الادى, دەيدى دەپارتامەنت باسشىسى.
شارانىڭ نەگىزگى ماقساتى – اۋىل تۇرعىندارىنا جەر قاتىناستارى, ساۋلەت جانە قالا قۇرىلىسى, ءبىلىم, جۇمىسپەن قامتۋ, اۋىل شارۋاشىلىعى جانە تاعى باسقا سالالاردا كورسەتىلەتىن مەملەكەتتىك قىزمەتتەر تۋرالى تولىققاندى اقپارات بەرۋ, اسىرەسە ەلەكتروندى تۇردە كورسەتىلەتىن قىزمەتتىڭ قولجەتىمدىلىگى تۋرالى كەڭىنەن ءتۇسىندىرۋ بولىپ تابىلادى.
قىزمەت الۋشىلارعا حالىققا قىزمەت كورسەتۋ ورتالىعىندا كەزەكتە تۇرماي-اق, كەرەك قۇجاتتارعا جىلدام قول جەتكىزۋ مۇمكىندىگى ايتىلدى. ماسەلەن, اۋىل تۇرعىندارى دا اۋدان اسپاي, وزدەرىنىڭ تۇرعىلىقتى مەكەنجايى بويىنشا اكىم اپپاراتتارى مەن جالپى ورتا ءبىلىم بەرۋ ۇيىمدارىنان «وزىنە-ءوزى قىزمەت كورسەتۋ» بۇرىشىنان ءتيىستى انىقتامالاردى الۋعا بولاتىندىعى جونىندە ايتىلدى.
ايتا كەتۋ كەرەك, № 378 "الماتى-ماڭعىشلاق" جانە № 309 "ماڭعىشلاق-اقتوبە" باعىتىنداعى جولاۋشىلار پويىزدارىنىڭ جونەلتىلۋىنە وراي ۇيىمداستىرىلعان اكتسياعا حالىق كوپ جينالدى جانە وزدەرىنىڭ قويعان سۇراقتارىنا تۇشىمدى جاۋاپتار الدى.
سونىمەن قاتار, حقكو قىزمەتكەرلەرى م-gov ءموبيلدى ۇكىمەت پورتالى ارقىلى ەلەكتروندى تسيفرلى قولتاڭباسىز 44 قىزمەت ءتۇرىن الۋ مۇمكىندىگى جانە ءۇشىنشى تۇلعامەن انىقتاما الۋ سەرۆيسىن قولدانۋ كەڭىنەن ءتۇسىندىرىلدى.
اۋدان بويىنشا بارلىعى 93 مەملەكەتتىك قىزمەت تۇرلەرى كورسەتىلەدى. ۇستىمىزدەگى جىلدىڭ 9 ايىندا مەملەكەتتىك كورسەتىلگەن قىزمەتتەردىڭ سانى - 56 228 جەتكەن, ونىڭ ىشىندە قاعاز تۇرىندە - 8196 بولسا, «ەلەكتروندىق ۇكىمەت» ۆەب-پورتالى جانە مەملەكەتتىك كورپوراتسيا ارقىلى – 24140 قىزمەت كورسەتىلگەن.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
