ارداگەر قاۋىم باس قوسقان جۇزدەسۋدى پارلامەنت ءماجىلىسىنىڭ دەپۋتاتى, رەسپۋبليكالىق ارداگەرلەر كەڭەسىنىڭ توراعاسى باقتىقوجا ىزمۇحامبەتوۆ اشىپ, جۇرگىزىپ وتىردى. ەلباسى نۇرسۇلتان نازارباەۆتىڭ تاياۋدا عانا قازاقستان حالقىنا ارناعان «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىن وزەك ەتىپ, بايانداما جاسادى. ب.ىزمۇحامبەتوۆ ءوز سوزىندە الداعى ۋاقىتتا ەڭ تومەنگى جالاقىنىڭ مولشەرى 1,5 ەسە وسەتىندىگىنە توقتالدى. ەل تۇرعىندارىنىڭ الەۋمەتتىك-تۇرمىستىق جاعدايىن جاقسارتۋعا سەپتىگىن تيگىزەتىن بۇل جاناشىرلىقتى كوپشىلىكتىڭ قۋانا قابىلداعانى اتاپ ايتىلدى. الداعى ۋاقىتتا جارتى ميلليوننان استام ادامنىڭ الەۋمەتتىك-تۇرمىستىق جاعدايى كوپ-كورىم جاقسارىپ قالاتىن بولادى. وعان قوسا بيىلعى جولداۋدىڭ جوعارىدا ايتىلعان ماسەلەگە ايرىقشا ماڭىز بەرىپ وتىرعاندىعى جان-جاقتى باياندالدى.
– دەپۋتات رەتىندە ەل ىشىندە ءجيى بولامىز, سول كەزدە كوپشىلىكتىڭ تاراپىنان ايتىلاتىن جايلاردىڭ ءبارى دەرلىك جولداۋدا كورىنىس تاۋىپ وتىر دەپ ايتساق, ەشبىر ارتىقتىعى جوق. قوردالانىپ قالعان ماسەلەلەردى تامىرشىداي ءدوپ باسىپ وتىر. ماسەلەن, ۇستازداردىڭ جايى, ولاردىڭ ءوز مىندەتتەرىنەن تىس قوسالقى جۇمىستارعا جەگىلەتىندىگى ايتىلىپ ءجۇردى ەمەس پە. ەندىگى ارادا ۇستازدار مارتەبەسى تۋرالى زاڭ قابىلدانسا, بولاشاق باعباندارى وزدەرىنىڭ نەگىزگى مىندەتتەرىن ءمىنسىز اتقارۋعا مۇمكىندىك الادى. جاستار جىلىن جاريالاۋدىڭ استارىنداعى ءمان دە تەرەڭ, – دەدى ول. «رۋحاني جاڭعىرۋ» باعدارلاماسى بويىنشا جۇزەگە اسقان قانشاما شارۋا جىپكە تىزگەندەي ەتىلىپ باياندالىپ, وسى ورتاق ىسكە باس-كوز بولعان ارداگەرلەر قاۋىمىنىڭ اۋقىمدى ەڭبەگى دە اتالىپ ءوتتى.
اقمولا وبلىسى اكىمىنىڭ ورىنباسارى اينا ءمىسىرالىموۆا وبلىستىڭ الەۋمەتتىك-ەكونوميكالىق جاعدايى تۋرالى بايانداپ بەردى. ەلباسى جولداۋىنداعى العا قويىلىپ وتىرعان مىندەتتەر ۇدەسىنەن شىعۋ جايى دا قامتىلدى.
مۇنان سوڭ ءسوز العان الماتى قالالىق ارداگەرلەر كەڭەسىنىڭ توراعاسى ەرەنعايىپ شايقۇتدىنوۆ, سولتۇستىك قازاقستان جانە قوستاناي وبلىستىق ارداگەرلەر كەڭەستەرىنىڭ توراعالارى ەسكەندىر ەلەۋسىزوۆ پەن كەنجەبەك ۋكيندەر تاۋەلسىز ەلدىڭ تۇعىرىن بيىكتەتۋگە ولشەۋسىز ۇلەس قوساتىن جولداۋدان تۋىنداعان اسقارالى مىندەتتەر جايىن كوپتى كورگەن قازىنا قارتتاردىڭ دانالىق كوزىمەن شولىپ, دارالىق ويىمەن اسپەتتەدى.
كەڭەستە ارداگەرلەر قوعامدىق ۇيىمىن قارجىلاندىرۋ, ءدارى-دارمەكپەن جەتكىلىكتى قامتاماسىز ەتۋ ماسەلەلەرى كوتەرىلدى. جيىن سوڭىندا ەل ىشىندە وزدەرىنىڭ بيىك پاراساتتارىمەن, كىسىلىك كەلبەتتەرىمەن ورالىمدى ورتاق ىسكە ءدۇمدى دىڭگەك بولىپ, كەيىنگى تولقىنعا تەمىرقازىق, نىسانا ىسپەتتى جول سىلتەپ جۇرگەن ءبىر توپ ارداگەرگە العىس حاتتارمەن قوسا ەستەلىك سىيلىقتار تابىس ەتىلدى.
بايقال ءبايادىل,
«ەگەمەن قازاقستان»
