اتالعان ونەر ورداسىنىڭ قابىرعاسىندا تالاي ونەرپاز قىزمەت اتقارىپ, ونەر الەمىنە جولداما العان. بيىل كەنەن ازىرباەۆ اتىنداعى جامبىل وبلىستىق فيلارمونياسىنا ەلۋ جىل تولدى. جارتى عاسىرلىق بەلەستى باعىندىرعان ونەر ورداسى ءوزىنىڭ مەرەيتويىن تاراز تورىندە اتاپ ءوتتى.
مەرەيتويعا كەنەن اقىننىڭ ۇلى باقىتجان كەنەن ۇلى مەن تورتكەن كەنەنقىزى ارنايى قاتىستى. سونىمەن قاتار قازاقستاننىڭ ەڭبەك سىڭىرگەن قايراتكەرى جابال ەرعاليەۆ تە كەلدى. اۋەلى مەرەيتوي ءباسپاسوز ماسليحاتىمەن باستالدى. مۇندا جامبىل وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى دۇيسەنالى بىقىباەۆ اۋليەاتا ءوڭىرى ءۇشىن فيلارمونيانىڭ كەنەن ەسىمىن يەلەنۋى ايتارلىقتاي وقيعا ەكەنىن جەتكىزسە, تورتكەن كەنەنقىزى اقىن اتىن ارداقتاعان حالىققا, ونەر ورداسىنا اقىن ەسىمىن بەرۋگە اتسالىسقان ازاماتتارعا العىسىن ءبىلدىردى. ءوز سوزىندە جابال ەرعاليەۆ كەنەن ءيسى قازاققا ورتاق تۇلعا ەكەنىن اتاپ ءوتتى.
ال باقىتجان كەنەن ۇلى اقىن اتىنىڭ ماڭگى وشپەيتىنىن, كەنەن اتىنداعى «شىرقا, داۋىسىم!» بايقاۋىنىڭ تۇراقتى وتكىزىلىپ كەلە جاتقانىن تىلگە تيەك ەتسە, «قۇرمەت», «پاراسات» وردەنىنىڭ يەگەرى, كۇيشى ءابدىمومىن جەلدىباەۆ ونەر الەمىندە كەنەن كەڭىستىگىنىڭ بولەك ەكەنىن اتاپ ءوتىپ, شۋ اۋدانى اكىمىنىڭ قۇتتىقتاۋ حاتىن تاپسىردى. ءوز كەزەگىندە كەنەن ازىرباەۆ اتىنداعى فيلارمونيانىڭ ەلۋ قىزمەتكەرىنە جامبىل وبلىسى اكىمىنىڭ قۇرمەت گراموتاسى, وبلىستىق مادەنيەت, ارحيۆتەر جانە قۇجاتتاما باسقارماسى باسشىسىنىڭ العىس حاتى جانە وزگە دە ماراپاتتار بەرىلدى. سونىمەن قاتار ءباسپاسوز ءماسليحاتى بارىسىندا ء«ان قاناتىنداعى اۋليەاتا» كىتابى مەن «اۋەنى اسەم اۋليەاتا» CD جيناعىنىڭ تۇساۋى كەسىلدى. سونىمەن قاتار كەنەن بەينەسى سالىنعان كىلەمشە تانىستىرىلدى.
بۇدان كەيىن مەرەيتويلىق شارا وبلىستىق فيلارمونيا ونەرپازدارىنىڭ قاتىسۋىمەن «اۋەنى اسەم اۋليەاتا» اتتى گالا-كونتسەرتپەن جالعاستى. مۇندا كوپشىلىككە «جارتى عاسىر – جالىندى ءسات» اتتى دەرەكتى فيلم كورسەتىلدى. كەش بارىسىندا كەنەن ازىرباەۆ بەينەسى سومدالىپ, اندەرى شىرقالىپ, «قۇلاق» كۇيى تارتىلدى. ال سالتاناتتى شارا كەزىندە جامبىل وبلىسى اكىمىنىڭ ورىنباسارى ەرقانات مانجۋوۆ ەلىمىزدىڭ مادەنيەت جانە سپورت ءمينيسترى ارىستانبەك مۇحامەدي ۇلىنىڭ قۇتتىقتاۋ حاتىن فيلارمونيا ديرەكتورى سەيىتقاسىم تۇكتىباەۆقا تاپسىردى. بۇل رەتتە ول بىرقاتار ونەرپازداردى وبلىس اكىمىنىڭ قۇرمەت گراموتاسىمەن, العىس حاتىمەن جانە ءمينيستردىڭ العىس حاتتارىمەن ماراپاتتادى.
مەرەيتوي كەزىندە باقىتجان كەنەن ۇلى جۇرەكجاردى لەبىزىن ءبىلدىرىپ, ۇكىلى ىبىرايدىڭ, اقان سەرىنىڭ ەلىنەن كەلگەن جابال ەرعاليەۆتىڭ يىعىنا شاپان جاۋىپ, قۇرمەت كورسەتتى. ال جابال ەرعاليەۆ ءوز كەزەگىندە ەرقانات مانجۋوۆقا كەڭەس وداعىنىڭ باتىرى, جازۋشى, عالىم مالىك عابدۋللين تۋرالى بەس تومدىق كىتاپ سىيلادى.
حاميت ەسامان,
«ەگەمەن قازاقستان»
جامبىل وبلىسى
