جامبىل وبلىسى اكىمدىگىندە وبلىس اكىمى اسقار مىرزاحمەتوۆتىڭ قاتىسۋىمەن وڭىرلىك جوبالىق باسقارۋ ءوفيسىنىڭ جۇمىسى جانە «تسيفرلى قازاقستان» مەملەكەتتىك باعدارلاماسىنىڭ وبلىس اياسىندا جۇزەگە اسۋى بويىنشا جيىن ءوتتى. جيىندا وڭىردەگى ءبىلىم بەرۋ, دەنساۋلىق ساقتاۋ, مادەنيەت, قىزمەت كورسەتۋ جانە وزگە دە سالالاردى تسيفرلاندىرۋ باعىتىنداعى اتقارىلىپ جاتقان ءىس-شارالار تالقىلاندى. وبلىستىق ينۆەستورلارعا قىزمەت كورسەتۋ, جوبالىق باسقارۋ جانە تسيفرلاندىرۋ ورتالىعىنىڭ ديرەكتورى دامير سەگىزباەۆ كۇن تارتىبىندەگى ماسەلە بويىنشا بايانداما جاساپ, جەمىستى جۇمىستار جونىندە اڭگىمەلەدى.
وسى ۋاقىتقا دەيىن باعدارلاما اياسىندا 182 534 ادام وقىتۋ كۋرسىنان ءوتۋى ءتيىس بولسا, بۇل جوسپار بۇگىنگە دەيىن تولىق ورىندالعان. وبلىس اكىمى اسقار مىرزاحمەتوۆ بۇل كورسەتكىشتى جىل سوڭىنا دەيىن تاعى دا ارتتىرۋ جولدارىن قاراستىرۋ كەرەكتىگىن باسا ايتتى.
«تسيفرلى قازاقستان» باعدارلاماسى اياسىندا 2018 جىلى ءوڭىردىڭ تەحنيكالىق مۇمكىندىگىنە سايكەس مەكتەپتەردىڭ 93 پايىزىندا ينتەرنەت جىلدامدىعىن 4-40 مبيت/س جوعارىلاتۋ كوزدەلىپ وتىر. ال كەلەر جىلى ونى 100 پايىزعا جەتكىزۋ جوسپارلانعان. سونىمەن قاتار بيىلعى جىلى تاراز قالاسىنداعى 111 بالاباقشادا ەلەكتروندى كەزەككە قويۋ جۇيەسى تولىعىمەن اۆتوماتتاندىرىلاتىن بولادى.
جامبىل وبلىستىق ءبىلىم باسقارماسىنىڭ باسشىسى راحيا تۇرماحانبەتوۆا سالا بويىنشا اتقارىلىپ جاتقان جۇمىس بارىسىمەن تانىستىردى.
– بۇگىندە كەڭ ارنالى ينتەرنەت جەلىسىنە قوسىلعان مەكتەپتەر سانى 447 بولىپ, 100 پايىزعا جەتىپ وتىر. «كۇندەلىك» جوباسىنا 433 مەكتەپ قوسىلعان. ال «Bilimland» تسيفرلى ءبىلىم بەرۋ رەسۋرستارى پورتالىنا 447 مەكتەپ قوسىلعان. 429 مەكتەپ ونلاين, 18 مەكتەپ وفلاين تاسىلىندە پلاتفورمانى پايدالانادى. سىمسىز ىشكى Wi-Fi جەلىسىمەن 199 مەكتەپ جاراقتاندىرىلعان. سونىمەن قاتار 346 مەكتەپ 983 كومپيۋتەر, پروەكتور, ەكران سياقتى ينتەراكتيۆتى قۇرىلعىلارمەن جابدىقتالعان. 370 مەكتەپكە 1866 ينتەراكتيۆتى تاقتا ورناتىلىپ, STEM ءبىلىم بەرۋدى ەنگىزۋ ءۇشىن 83 روبوت تەحنيكا كابينەتتەرىمەن جابدىقتالعان. وبلىس بويىنشا 11 ءىت-سىنىپ اشىلدى, – دەدى باسقارما باسشىسى.
ر.تۇرماحانبەتوۆا سونداي-اق كوللەدج بىتىرۋشىلەردىڭ جۇمىسقا ورنالاسۋىن ەسەپكە الۋ جانە قابىلداۋ اۆتوماتتاندىرىلعان اقپاراتتىق جۇيەسىن ەنگىزۋگە مەملەكەتتىك ساتىپ الۋ اشىق كونكۋرسى جۇزەگە اسىرىلىپ, الەۋەتتى ءونىم بەرۋشى انىقتالعانىن ايتتى. بۇگىنگى تاڭدا كوللەدجدەر بويىنشا مالىمەتتەر اقپاراتتىق جۇيەگە ەنگىزىلۋدە ەكەن.
باسقوسۋ بارىسىندا اۋىلدىق كلۋبتارداعى اقپاراتتىق ورتالىقتاردىڭ اشىلۋى, مەكەمەلەردىڭ كومپيۋتەرلەرمەن قامتىلۋى سەكىلدى جۇمىستار دا سارالاندى.
جيىن سوڭىندا اسقار مىرزاحمەتوۆ جاۋاپتى ادامدارعا كورسەتكىشتەردى ارتتىرۋ ءۇشىن ەكى-ءۇش جىلدىق جوسپارعا بايلانباي, جايباسارلىققا سالىنباي, ۋاقىت وزدىرماي ىسكە اسىرۋ كەرەكتىگىن ەسكەرتىپ, ءتيىستى باسشىلارعا ناقتى تاپسىرمالار جۇكتەدى.
حاميت ەسامان,
«ەگەمەن قازاقستان»
جامبىل وبلىسى
