قازاقستاننىڭ بوكسشىلارى اراسىنان وسى جارىستا سابىرجان بەكبەرگەنوۆتىڭ باعى جاندى. 69 كيلو سالماقتا ونەر كورسەتكەن قانداسىمىز باستاپقى باسەكەلەرىنىڭ بارلىعىندا جەڭىسكە جەتىپ, جارتىلاي فينالدا يتاليانىڭ وكىلى ۆينچەنتسو ارەكيانى ۇتتى. اقتىق سىندا يزرايلدىك ميروسلاۆ كاپۋلەردى قاپى قالدىرعان سابىرجان باس جۇلدەنى قانجىعاسىنا بايلادى.
56 كيلو سالماقتاعى بەكزات ماعجاننىڭ دا جەڭىس تۇعىرىنىڭ ەڭ بيىك ساتىسىنا كوتەرىلۋگە جاقسى مۇمكىندىگى بولدى. الايدا شەۋشى تۇستا فرانتسيالىق دجوردان رودريگەسكە ەسە جىبەرگەن ول كۇمىس مەدالدى موينىنا ءىلدى. ال 52 كيلو سالماق دارەجەسىندە جۇدىرىقتاسقان تەمىرتاس ءجۇسىپوۆ قولا جۇلدەنى يەلەندى. قازاق بوكسشىسى جارتىلاي فينالدا انگليالىق ۋيلل كوۋليگە جول بەردى.
مينسكىدەگى ءتۋرنيردىڭ كوماندالىق ەسەبىندە بەلارۋس قۇراماسى توپ جاردى. بۇل ەلدىڭ ءتورت بوكسشىسى جەڭىمپاز اتاندى. انگليا مەن گرۋزيانىڭ وكىلدەرى ەكى رەتتەن دارا شىقسا, فرانتسيا مەن قازاقستاننىڭ ورەندەرىنە دە باس جۇلدە بۇيىردى.
عالىم سۇلەيمەن,
«ەگەمەن قازاقستان»
