الماتىدا General Electric Healthcare Discovery IQ وزىق جابدىقتارىمەن جابدىقتالعان پوزيتروندى-ەميسسيوندى توموگرافيا/كومپيۋتەرلىك توموگرافيا پەت/كت ورتالىعىنىڭ اشىلۋى ونكولوگيالىق دەرتتى اۋىزدىقتاۋدا اسا ماڭىزدى وقيعالاردىڭ قاتارىنان ورىن الادى.
بۇگىندە ونكولوگيالىق دەرتتىڭ سالدارىنان بولاتىن قازا جۇرەك-قان-تامىرلارى اۋرۋلارىنان بولاتىن ءولىم-جىتىمنەن كەيىن ەكىنشى ورىندا تۇر. جىل سايىن وبىردان قازاقستاندا 15 مىڭداي ادام كوز جۇمادى.
بۇل كۇندەرى ەلىمىزدە ءارتۇرلى فورمادا قاتەرلى ىسىكتەر مەن جاڭا وسكىندەر انىقتالعان 164 مىڭ ناۋقاس ەسەپتە تۇر. تەك وتكەن جىلدىڭ 10 ايىندا 26 مىڭ ادام وسى دەرتكە شالدىققان. سوندىقتان وتاندىق دەنساۋلىق ساقتاۋ سالاسى ونكولوگيالىق دەرتتەردى دەر كەزىندە دياگنوستيكالاۋ مەن الدىن الۋعا ۇلكەن ءمان بەرىپ, وزىق يننوۆاتسيالىق تەحنولوگيالارعا قول جەتكىزۋگە كۇش سالىپ وتىرعانى انىق.
بۇل ءادىس پوزيتروندى-ەميسسيوندى توموگرافيا (پەت) مەن كومپيۋتەرلىك توموگرافيانى (كت) بىرىكتىرەدى جانە بەينە ارقىلى جوعارى دارەجەلى سەنىمدىلىكپەن قاتەرلى ىسىكتەردەن باستاپ قاتەرسىز ىسىكتەرگە دەيىن اجىراتۋعا مۇمكىندىك بەرەدى.
پەت/كت توموگرافياسىنىڭ ەرەكشەلىگى سول, ۋلترادىبىس, رەنتگەن, كT جانە مرت-مەن انىقتالمايتىن ىسىك توراپتارىنا دياگنوستيكا جاساي الادى.
وسى جابدىق ەندى الماتىداعى قازاق ونكولوگيا جانە راديولوگيا عزي بازاسىندا مەملەكەت-جەكەمەنشىك شەڭبەرىندە جۇمىس ىستەيتىن بولادى. جوبا «Orhun Medical» جشس-مەن بىرلەسىپ جۇزەگە اسىرىلعان.
ماماندار دياگنوستيكا بارىسىندا وزگەرىسكە ۇشىراعان جاسۋشالاردى انىقتاۋ ءۇشىن ءتۇرلى راديوفارمپرەپاراتتارى قولدانىلادى. ياعني, بۇكىل اعزاعا كۇرە تامىر ارقىلى 18F-فليۋورودوكسيگليۋكوزاسى جىبەرىلىپ, وسىدان كەيىن پاتسيەنت دەنەسى پەت/كت اپپاراتىنا كىرگىزىلەدى. بۇل راديوفارماتسەۆتيكالىق دارمەك ءاربىر ناۋقاستىڭ جەكە ەرەكشەلىكتەرىن ەسكەرە وتىرىپ, زەرتتەلىپ بارىپ دايىندالادى. دياگنوستيكا مولەكۋليارلىق دەڭگەيدەگى جاسۋشالاردىڭ زات الماسۋ جىلدامدىعىن باعالاۋعا نەگىزدەلگەن, سوندىقتان ول ءتىپتى 4-5 ميلليمەتر مولشەرلى قاتەرلى ىسىكتى كورۋگە مۇمكىندىك بەرەدى.
بۇل پروتسەدۋرانىڭ ارتىقشىلىقتارى جەتكىلىكتى دەۋگە بولادى. ءتىپتى اۋرۋ بەلگىلەرى بىلىنبەي تۇرعان كەزەڭدە-اق قاتەرلى ىسىكتىڭ بار ەكەندىگىن انىقتاۋعا مۇمكىندىك بار. جانە تەكسەرۋ بارىسىندا اۋىرسىنۋ سەزىمىن تۋعىزبايدى ءارى قاۋىپسىز. ەڭ باستىسى, اعزاداعى قاتەرلى ىسىكتىڭ تارالۋىنان تولىق اقپارات بەرە الادى.
مەديتسينا ماماندارى 18FDG راديودارمەگى امبەباپ ەكەندىگىن, ول بارلىق جاسۋشالاردى ءسىڭىرىپ الاتىندىعىن العا تارتادى. سەبەبى ول – قۇرىلىمى جاعىنان قاراپايىم گليۋكوزاعا جاقىن. ىسىك جاسۋشالارى پرەپاراتتى قالىپتى جاسۋشالارعا قاراعاندا تەز ءسىڭىرىپ الاتىندىقتان, ولار سكانەرلەۋ كەزىندە ايقىن كورىنەدى. دارمەك ناۋقاستىڭ اعزاسىنان 24 ساعات ىشىندە شىعادى جانە جارتىلاي ىدىراۋ كەزىندە (ت1/2) 110 مينۋت ۋاقىتتى قامتيدى.
پەت/كت ناۋقاستىڭ زاقىمدالعان ىسىك كولەمىن باعالاۋعا جانە دەرتتىڭ قاي دەڭگەيدە تۇرعانىن دۇرىس انىقتاۋعا مۇكىندىك بەرەدى. سول سياقتى راديوتەراپيا مەن حيميوتەراپيا كۋرسىنان وتكەن نەمەسە وتا جاسالعان ناۋقاستاردى تەكسەرۋ, بەلگىلەنگەن ەم مونيتورينگ ناتيجەلەرى ءۇشىن بۇل اۋاداي قاجەت. پەت/كت – سكانەرى ىسىكتىڭ قالاي وزگەرگەنىن, جاڭا وشاقتاردىڭ جانە قايتالانۋدىڭ پايدا بولۋىن كورسەتەدى.
تۇسىنىكتى تىلمەن ايتقاندا, مۇنىڭ بارلىعى باستاپقى ىسىك وشاقتارى مەن مەتاستازداردى انىقتاۋدا, ىسىكتىڭ تارالۋ كەزەڭىن ەرتە بىلۋدە, قاتەرلى جانە قاتەرسىز ىسىكتەردى سارالاۋدا, ءتيىمدى ەمدەۋ ءادىسىن تاعايىنداۋدا اسا ماڭىزدى.
18FDG-مەن قاتەرلى ىسىكتەر قاڭقاسىن انىقتاۋدان بولەك, مەلانوما, حودجيكين ەمەس ليمفومالار جانە حودجيكين اۋرۋى, جۇمساق تىندەر ساركوماسى, قالقانشا بەز قاتەرلى ىسىگى, ءسۇت بەزى, مويىن جاتىرى, تيمۋس, وكپە, ۇيقى بەزى, انالىق بەزى, اسقازان جانە ىشەك اۋرۋلارىن انىقتاۋ كەزىندە جۇرگىزىلەدى.
ايناش ەسالي,
«ەگەمەن قازاقستان»
