- دايىندىعىمىز قاراپايىم كۇيدە ءوتتى. فۋتبولشىلارىمىزدىڭ بارلىعى دايىن. ەرتەڭ ءبىز جاقسى دەڭگەيدىڭ ويىنىن كورە الامىز. وسىعان دەيىنگى ماتچتاردا ءبىز جاقسى ويىن كورسەتتىك.
- استانادا وتكەن جاتتىعۋ جيىندارىندا نەگە كوڭىل ءبولدىڭىز؟
- ەڭ الدىمەن ءبىز فۋتبولشىلاردىڭ قايتا قالىپقا كەلۋىنە كوڭىل بولدىك. ولاردىڭ باسىم بولىگى جەكسەنبى مەن بەيسەنبى كۇنى ماتچتار وتكىزدى. كاپيتان شومكونىڭ كىشىگىرىم جاراقاتى بولعان, الايدا ول ەرتەڭگى ويىنعا دايىن.
- لاتۆيا قۇراماسى جايلى نە ايتا الاسىز؟ ولاردىڭ باسىم تۇسەتىن تۇستارى بار ما؟
- لاتۆيا ءوزىنىڭ كورسەتىپ جۇرگەن ناتيجەلەرىنە سايكەس ەمەس. ولار نەگىزى جاقسى كورسەتكىش الا الاتىن كوماندا. ولار قورىقپاي وينايدى. لاتۆيا ءبىزدىڭ ليگادا ەكىنشى سەبەتتە. ولار رەيتينگ بويىنشا بىزدەن جوعارى تۇر. بىراق, ءبىر عانا ماتچ جايلى ايتىپ قارايتىن بولساق, ويىن تارتىستى ءارى تەڭ دارەجەدە ءوتۋى مۇمكىن.
- لاتۆيا فۋتبولىمەن قانداي دا ءبىر ەستەلىكتەرىڭىز بار ما؟
- يۋرمالادا ءبىر كەزدەسۋ وتكىزگەنىم ەسىمدە. بىراق, سول كەزدە مەنىڭ شاكىرتتەرىم قارسىلاستى كىشكەنە مەنسىنبەي شىققانداي بولدى. سونىڭ سالدارىنان چەمپيوندار ليگاسىنىڭ كەلەسى كەزەڭىنە ءوتۋ ءسال قيىنداۋ بولدى.
- قازاقستان چەمپيوناتىندا «اقجايىق» ءۇشىن وينايتىن كاراشاۋسكاس جايلى نە ايتاسىز؟
- كاراشاۋسكاس جايلى بىلەمىن. ول ىشكى بىرىنشىلىكتە جاقسى ويناپ ءجۇر. لاتۆيالىق فۋتبولشىلار كومبيناتسيالىق ويىن كورسەتەدى. ولار ەۋروپالىق مانەردە وينايدى.
- قازاقستان قۇراماسىنىڭ ويىنشىلارى تۇگەلگە دەرلىك ىشكى بىرىنشىلىكتە وينايدى. بۇل ءسىزدىڭ قۇراماڭىزعا قالاي اسەر ەتەدى؟
- بۇل ساۋالعا بىرنەشە جاۋاپ بار. ۇلتتىق قۇراما دەڭگەيىندە بۇل ماسەلە كوپ اسەر ەتپەۋى مۇمكىن. ەگەر قۇراما ويىنى بىركەلكى, ءارى ويىنشىلار ءبىر-ءبىرىن جاقسى ءتۇسىنىپ تۇرسا. ەكىنشى جاعىنان فۋتبولشىلاردىڭ مىقتى بىرىنشىلىكتە ويناعانى ۇلتتىق قۇراماعا جاقسى. سەبەبى, ول ويىنشىلار كوماندا ويىنىنا ءوزىنىڭ كورگەن بىلگەنىن الىپ كەلەرى انىق.
- قۇرامانىڭ دەنى «استانا» مەن «قايراتتىڭ» ويىنشىلارى. ولار ءبىر-بىرىمەن كوماندا ىشىندە ءبولىنىپ جۇرگەن جوق پا؟
- «استانا» مەن «قايرات» ويىنشىلارى قۇرامادا ءبولىنىپ جۇرگەنىن بايقامادىم. بولگاريا قۇراماسىن باپتاعان كەزدە دە ءارتۇرلى باسەكەلەس كوماندالاردىڭ ويىنشىلارى بولعان. بىراق, ولار قۇراماعا كەلگەن كەزدە بارلىعىن ۇمىتادى. سول سەكىلدى ءبىزدىڭ كوماندا دا ەكىگە ءبولىنۋ دەگەن جوق. قازىر, قۇرامادا كوپتەگەن وزگەرىستەر بار. ولار ءبولىنۋ تۋرالى ويلاپ تا جۇرگەن جوق.
ەرمۇحامەد ماۋلەن
