دەۆيد موريس سميت, «نيۋ-يورك تايمس». گيسبورن ۇلدار مەكتەبىنىڭ وقۋشىلارىنىڭ باسىم بولىگى ماوري تايپاسىنان تاراعان. ولار سوعىس ءبيى – «حاكا» ورىنداپ جاتىر.
دەۆيد ماۋريس سميت, «نيۋ-يورك تايمس»
جاڭا زەلانديا حالقى بەس ميلليونعا جەتەر-جەتپەس. جەر كولەمى رەگبي دامىعان باسقا ەلدەردەن الدەقايدا كىشى. وسىعان قاراماستان, ولاردىڭ سپورتتاعى باسىمدىعى ءازىر اياقتالا قويۋى ەكىتالاي. ەلدىڭ رەگبيدەگى ۇستەمدىگىن جەتكىلىكتى ءتۇسىنۋ ءۇشىن ويىننىڭ شىققان تەگىنە نازار اۋدارۋ كەرەك.
جاڭا زەلانديادا جاڭا بۋىن وكىلدەرى «قارا جەيدە» (ۇلتتىق قۇراما جەيدەسى – ا.ا.) كيۋدى ارمانداپ وسەدى. سولتۇستىك ارالدىڭ شىعىس جاعالاۋىندا جاتقان گيسبورن قالاسى – ارمانشىل جاستارعا تولى مەكەن. قالادا ورتا بىلىممەن بىرگە رەگبيدى قاتار ۇيرەتەتىن «گيسبورن بالالار جوعارى مەكتەبى» بار. «گيسبورن بالالارى» ەلدەگى مەكتەپىشىلىك ەڭ جوعارى تۋرنير – National First XV Championship-ءتى ءتورت مارتە جەڭىپ العان, سونداي-اق ۇلتتىق قۇرامانىڭ بىرنەشە مۇشەسى وسى وقۋ ورنىنىڭ تۇلەگى.
مەكتەپتەگى وقۋشىلاردىڭ كوبى ماوري تايپاسىنان تاراعان. ءبىلىم ورداسىنىڭ اكىمشىلىگى الەۋەتتى جىگىتتەر مەن كۇشتى رەگبي ويىنشى تاربيەلەپ شىعۋدى حالىقتىڭ شىعۋ تەگىمەن بايلانىستىرادى.
«كوپتەگەن سپورت كوماندالارى توپتىق مادەنيەت قالىپتاستىرۋعا تالپىنادى. ال ءبىزدىڭ كوماندا كۇندەلىكتى تىرشىلىكتە كەزدەسەتىن, ومىرشەڭ داستۇرگە نەگىزدەلگەن», دەيدى رايان تاپسەلل. ول – «گيسبورن بالالارىندا» ماوري عىلىمدارى فاكۋلتەتى دەكانى جانە First XV ۇلكەندەر كومانداسىنداعى قورعاۋشىلاردىڭ باپكەرى. «ويىنشىلار اتا-بابالارىنىڭ داستۇرىنە سۇيەنەدى. ولار وسىنىڭ نەگىزىن قالاپ كەتتى», دەيدى ول.
كوماندا ماوري مادەنيەتىنىڭ ءداستۇرلى ەرەجەلەرىنە نەگىزدەلىپ جاسالعان kawa دەپ اتالاتىن نۇسقاۋلىقتى ساقتاۋى ءتيىس. ەگەر ونى بۇزسا, كومانداعا كەرى اسەرىن تيگىزەدى.
مەكتەپتە ارنايى رەگبي ساباعى بار. وقۋشىلار فيلم كورىپ, ويىن ستراتەگياسىن تالقىلاپ, جاتتىعۋ مەن ازىرلىكتىڭ نەگىزدەرىن, سالماق كوتەرۋ جانە يوگامەن اينالىسۋدى ۇيرەنەدى. وقۋ ورنىنداعى 11 كابينەت جاڭا زەلانديا قۇراماسىنىڭ بۇرىنعى ويىنشىسى دجونا لومۋگە ارنالعان. ول الاڭعا №11 جەيدە كيىپ شىعاتىن جانە All Blacks-تىڭ ۇزدىكتەرىنىڭ ءبىرى ەدى.
«First XV – ءبىزدىڭ مەكتەپتىڭ جۇرەگى», دەپ First XV توبىنىڭ باس باپكەرى مارك دجەففەرسون اعىنان جارىلدى. ول – «گيسبورن بالالارىنىڭ» تۇلەگى. م.دجەففەرسون ءالى كۇنگە دەيىن جاڭا زەلانديا تاريحىندا ەڭ ۇزدىك مەكتەپ كومانداسى سانالاتىن 1994 جىلعى توپتىڭ كاپيتانى بولدى. ولار وزدەرى قاتىسقان ۇلتتىق جانە حالىقارالىق باسەكەنىڭ بارىندە جەڭىسكە جەتتى.
گيسبورننىڭ قازىرگى First XV توبىنداعى بىرنەشە ويىنشى ۇلتتىق كوماندا باپكەرلەرىنىڭ نازارىن اۋداردى. تاڭداپ الىنعان جىگىتتەر Super Rugby فرانشيزاسىنىڭ جاڭا زەلاندياداعى جەرگىلىكتى بەس قوسىنىنىڭ بىرىندە جاتتىعادى. بۇل – جوعارى دەڭگەيلى كاسىبي رەگبي ۇيىمىنىڭ كلۋبتىق ءتۋرنيرى. Super Rugby-ءدىڭ ارگەنتينادا, اۋستراليادا, جاپونيادا جانە وڭتۇستىك افريكادا كوماندالارى بار.
مۇنداي تەڭدەسسىز جۇيە تالانتتاردى شىڭداپ, ءبارىنىڭ ورتاق ارمانى – جاڭا زەلانديانىڭ اتىن شىعاراتىن, بولاشاق All Blacks كومانداسىن دايارلاۋعا مۇمكىندىك بەرەدى.
«جاڭا زەلاندياداعى اۋەسقويلىقتان كاسىبيلىككە دەيىنگى بۇكىل جۇيە ۇلتتىق قۇرامانى جاساقتاۋعا ارنالعان», دەيدى مەكتەپتىڭ رەگبي بويىنشا ديرەكتورى توم كەرنس.
جۇيەنىڭ اياسىندا ەرەكشە تىيىم بار. ۇلتتىق قۇراماعا ىلىگۋ ءۇشىن ويىنشى جاڭا زەلانديانىڭ كوماندالارىندا ونەر كورسەتۋى ءتيىس. ءتىپتى, فرانتسيا مەن انگليا سەكىلدى شەتەلدىك ليگالار مول قارجى ۇسىنىپ, شاقىرتۋ السا دا, ويىنشىلار وندا بارۋعا ق ۇلىقتى ەمەس. سوندىقتان ۇلتتىق قۇراماعا ىلىنۋدەن ۇمىتتەنگەندىكتەن اقشانى قۇرباندىققا شالادى.
رەگبيدەن 2019 جىلعى الەم چەمپيوناتىندا جاڭا زەلانديانىڭ باسىمدىعى جالعاسا بەرمەك. «رەگبيگە قاتىستى شەشىم قابىلداساق, الەمنىڭ قالعان بولىگى بىزگە ەرەدى», دەيدى كەرنس.
وسىلايشا, داستۇرگە سۇيەنگەن ەل تاڭداۋلى كوماندا جاساقتاپ, ەشكىمگە دەس بەرمەي كەلەدى.
© 2018 The New York Times News Service
ماقالانى اۋدارعان اباي اسانكەلدى ۇلى,
«ەگەمەن قازاقستان»
