حالىقتىڭ تۇرمىسى جاقسارادى
جولداۋدا ايتىلعان ەكونوميكالىق ماسەلەلەر مەن حالىقتىڭ تۇرمىسىن جاقسارتۋ ماسەلەلەرىنە Regnum.ru اگەنتتىگى دە نازار اۋداردى.
اقپارات اگەنتتىگى ن.نازارباەۆتىڭ حالىققا جولداۋىندا شيكىزاتتىق ەمەس ەكونوميكاعا تارتىلاتىن تىكەلەي ينۆەستيتسياعا ارنالعان ارنايى قور قۇرۋدى تاپسىرعانىن جازادى. مۇنداي قادام اۋقىمدى جوبالاردى جۇزەگە اسىرۋعا مۇمكىندىك بەرمەك.
وسى باستامانى جۇزەگە اسىرۋ ءۇشىن 300 ميلليارد تەڭگە قاراستىرىلعان. اگەنتتىك وسىنىڭ ارقاسىندا شەتەلدىك ينۆەستورلاردىڭ قازاقستانعا قىزىعۋشىلىعى ارتا تۇسەدى دەپ پايىمدايدى.
«قازاقستان پرەزيدەنتى باسىمدىعى بار جوبالارعا قولجەتىمدى نەسيە بەرۋ مىندەتىن شەشۋ ءۇشىن ۇلتتىق بانككە كەمىندە 600 ميلليارد تەڭگە كولەمىندە ۇزاق مەرزىمگە قارجى ءبولۋدى تاپسىردى. سونداي-اق وسى قاراجاتتىڭ كوزدەلگەن ماقساتقا جۇمسالۋىن قاتاڭ باقىلاۋدى قامتاماسىز ەتۋى كەرەكتىگىن اتاپ ءوتتى», دەيدى Regnum.ru.
بۇدان كەيىن اقپارات اگەنتتىگى ەلباسىنىڭ وتاندىق تاۋارلاردى تۇتىنۋعا جانە قولداۋعا شاقىرىپ, قازاقستاندىق تاۋار ءوندىرىسىن جانداندىرۋ قاجەتتىگىن ايتقانىن جازادى.
سونداي-اق 2030 جىلعا دەيىن اۋماقتىق دامىتۋ جونىندەگى جوسپار جاسالاتىنىنا دا توقتالىپ ءوتتى. قۇجاتقا سايكەس, اۋىلدار مەن ەلدى مەكەندەردىڭ بولاشاعى زەرتتەلەدى. «ن.نازارباەۆ جوسپار ەلدەگى ۋربانيزاتسيانى باسقارۋعا مۇمكىندىك بەرەتىنىن اتاپ ءوتتى. «ينفراقۇرىلىم ادامدارعا» مودەلىنەن «ادامدار ينفراقۇرىلىمعا» مودەلىنە بىرتە-بىرتە كوشۋ قاجەتتىگىن مالىمدەدى», دەيدى Regnum.ru.
ەكونوميكاعا ماڭىز بەرىلدى
Trend اقپارات اگەنتتىگى قازاقستان پرەزيدەنتى نۇرسۇلتان نازارباەۆتىڭ حالىققا جولداۋىنا ەرەكشە نازار اۋداردى. اسىرەسە پرەزيدەنتتىڭ ەل ەكونوميكاسىن ودان ءارى دامىتۋ تۋرالى ويلارىنا جەكەلەي توقتالدى.
ازەربايجاندىق اقپارات اگەنتتىگى «بيزنەستىڭ جول كارتاسى-2020» باعدارلاماسىن 2025 جىلعا دەيىن ۇزارتۋ قاراستىرىلعانىن اتاپ ءوتتى.
«2010 جىلى «بيزنەستىڭ جول كارتاسى-2020» باعدارلاماسىن ىسكە قوستىق. وڭىرلەرگە بارعان ساپارىمدا بۇل ءتيىمدى باعدارلاما ەكەنىنە كوز جەتكىزدىك. باعدارلامانى 2025 جىلعا دەيىن ۇزارتۋىمىز كەرەك. ونى جۇزەگە اسىرۋ ءۇشىن جىل سايىن كەمىندە 30 ملرد تەڭگە ءبولۋىمىز قاجەت», دەگەن بولاتىن ەلباسى.
Trend جولداۋدا ايتىلعان تاعى بىرقاتار ماسەلەلەرگە نازار اۋداردى. ماسەلەن, مەملەكەت باسشىسى اۋىل شارۋاشىلىعى ءونىمىنىڭ ەكسپورتىن 2022 جىلعا قاراي 2,5 پروتسەنتكە كوبەيتۋ مىندەتىن قويدى. وسىعان سايكەس, الداعى ۋاقىتتا جىل سايىن اۋىل شارۋاشىلىعىنا 100 ميلليارد تەڭگە قاراستىرىلادى.
اقپارات اگەنتتىگى ونەركاسىپ سالاسىن ىلگەرىلەندىرۋ ءۇشىن الداعى ءۇش جىلدا قوسىمشا 500 ميلليارد تەڭگە بولىنەتىنىن دە اتاپ وتكەن. Trend-تىڭ پايىمداۋىنشا, بۇل ەل ەكونوميكاسىن نىعايتا ءتۇسىپ, ونەركاسىپ سالاسىن دامىتۋعا زور ۇلەس قوسادى.
الەۋمەتتىك سالا باستى نازاردا
ەلباسى جولداۋىنا باۋىرلاس تۇركيانىڭ بۇقارالىق اقپارات قۇرالدارى دا نازار اۋدارعان ەكەن. Haberler باسىلىمى جولداۋدا حالىقتىڭ تۇرمىس-تىرشىلىگىنە قاتىستى الەۋمەتتىك ماڭىزدى ماسەلەلەر ايتىلعانىن جەتكىزەدى.
«جولداۋدا ايتىلعان باعىتتارعا قاراعاندا, قازاقستاننىڭ جاڭعىرۋىندا الەۋمەتتىك ماسەلەلەرگە باسىمدىق بەرىلگەنى اڭعارىلادى. ن.نازارباەۆتىڭ ادام كاپيتالىنا ەرەكشە ءمان بەرۋى وڭىردەگى دامۋ مودەلىنىڭ جاڭا ءبىر بەلەسكە كوتەرىلگەنىن كورسەتەدى», دەيدى Haberler.
باسىلىمنىڭ پايىمداۋىنشا, جولداۋدا ايتىلعان ماسەلەلەر ادام كاپيتالىن دامىتۋعا ەرەكشە ۇلەس قوسپاق. ياعني, وسى قادام ارقىلى قازاقستاندا الەۋمەتتىك مەملەكەت قۇرۋ يدەياسى جۇزەگە اسىرىلادى.
«مەملەكەتتىڭ باستى مىندەتى – حالقىنا قىزمەت ەتۋ. وسى ورايدا, ن.نازارباەۆتىڭ ماقساتى قازاقستان حالقىن باسەكەگە قابىلەتتى ۇلتقا اينالدىرۋ. ونى جۇزەگە اسىرۋ ادامداردىڭ دەنساۋلىعىنا, بىلىمگە, مادەنيەتكە جانە كاسىپكەرلىككە تىكەلەي بايلانىستى», دەيدى Haberler.
شولۋدى دايىنداعان
اباي اسانكەلدى ۇلى,
«ەگەمەن قازاقستان»
