بۇل القالى باسقوسۋ مەملەكەت باسشىسى نۇرسۇلتان نازارباەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى كۇنى كەشەگى قازاقستان حالقىنا ارناعان جولداۋىن تالقىلاۋعا ارنالدى.
«ەلباسى نۇرسۇلتان ءابىش ۇلى نازارباەۆتىڭ بۇل جولداۋىندا ايتىلعان بارلىق تۇجىرىمدار كاسىپوداقتار قىزمەتىنىڭ مازمۇنىمەن تىكەلەي قابىسىپ جاتىر. سوندىقتان ءبىز جولداۋدىڭ نەگىزگى ارقاۋى بولىپ تابىلاتىن قازاقستاندىقتاردىڭ ءال-اۋقاتىن جاقسارتۋ ماقساتىنداعى ۇردىستەردى جاڭعىرتۋ جۇمىستارىنىڭ الدىڭعى قاتارىنان تابىلۋىمىز كەرەك», دەدى جينالىستىڭ بەتاشار سوزىندە كاسىپوداقتار فەدەراتسياسىنىڭ توراعاسى باقىتجان ءابدىرايىموۆ. ادامنىڭ تۇرمىس دەڭگەيى اي سايىن الاتىن جالاقىسىنىڭ مولشەرىنە بايلانىستى ەكەندىگىن ايتا كەلىپ, ول جولداۋدا: «ۇكىمەتكە 2019 جىلدىڭ 1 قاڭتارىنان باستاپ ەڭ تومەنگى جالاقىنى 1,5 ەسە ياعني 28 مىڭنان 42 مىڭعا دەيىن ءوسىرۋدى تاپسىرامىن. بۇل بارلىق سالا بويىنشا ءتۇرلى مەنشىك نىساندارىنداعى كاسىپورىنداردا جۇمىس ىستەيتىن 1 ميلليون 300 مىڭ ادامنىڭ ەڭبەكاقىسىن تىكەلەي قامتيدى», دەپ اتاپ كورسەتىلگەن. وزدەرىڭىز ويلاپ قاراڭىزدار, ەگەر ورتاشا ەسەپپەن وتباسىندا ءتورت ادام بولاتىندىعىن ەسكەرسەك, ەلباسىنىڭ جولداۋىندا ايتىلعان وسى ءبىر عانا ماسەلە ەلىمىزدىڭ 4 ميلليونعا جۋىق تۇرعىنىن قامتيدى ەكەن. سونىمەن بىرگە الداعى ۋاقىتتا از قامتىلعان ادامداردان الىناتىن سالىق دەڭگەيى دە ءبىرشاما تومەندەيتىن بولادى. مۇنىڭ ءبارى ءبىزدىڭ اتا زاڭىمىزدا اتاپ كورسەتىلگەن الەۋمەتتىك مەملەكەت قاعيدالارىنا بارىنشا سايكەس كەلەدى», دەدى كاسىپوداقتار فەدەراتسياسىنىڭ توراعاسى.
ودان ءارى ول ءوز سوزىندە بۇدان بىلاي ەڭ تومەنگى جالاقى ەڭ تومەنگى كۇنكورىس شەگىنە بايلانىستى بولمايتىندىعىن, ەڭ تومەنگى جالاقىنىڭ جاڭا مولشەرى بۇكىل ەكونوميكا اۋماعىنداعى ەڭبەكاقى ءوسىمىن ارتتىراتىن يگى قوزعاۋشى كۇشكە اينالاتىنىن اتاپ كورسەتتى. سونىمەن بىرگە كاسىپوداقتار فەدەراتسياسىنىڭ توراعاسى بۇل تاريحي قۇجاتتىڭ ەلىمىزدىڭ ورتا جانە شاعىن بيزنەس سالاسىن ەكپىندى دامىتۋعا تىڭ سەرپىن بەرەتىندىگىن دە تىلگە تيەك ەتتى.
قازاقستان رەسپۋبليكاسى كاسىپوداقتار فەدەراتسياسىنىڭ باسقوسۋىندا ءسوز العان اۋىل شارۋاشىلىعى قىزمەتكەرلەرى سالالىق كاسىپوداعىنىڭ توراعاسى ەگور كاپپەل مەملەكەت باسشىسىنىڭ اتالعان جولداۋىنىڭ ءبىرىنشى كەزەكتە اۋىل تۇرعىندارىنىڭ ءال-اۋقاتىن جاقسارتۋعا ارنالعان تاريحي قۇجات ەكەندىگىن تىلگە تيەك ەتتى. ەلباسى اۋىل كاسىپكەرلەرىنە شارۋاشىلىق جۇرگىزۋدىڭ جاڭا داعدىلارىن ۇيرەتۋدىڭ ماڭىزدىلىعىن اتاپ كورسەتە كەلىپ, ۇكىمەتكە الداعى ءۇش جىل ىشىندە وسى ماقساتتارعا جىل سايىن قوسىمشا كەمىندە 100 ميلليارد تەڭگە قاراستىرۋدى تاپسىردى. بۇل شىن مانىندە اۋىل تۇرعىندارىنىڭ ەڭبەكپەن قامتىلۋىن جاقسارتۋدىڭ جاڭا ءبىر ءتيىمدى جولى ەكەندىگى داۋسىز.
مەملەكەت باسشىسىنىڭ قازاقستان حالقىنا ارناعان جولداۋىن تالقىلاۋعا ارنالعان ەلىمىز كاسىپوداقتارىنىڭ القالى باسقوسۋىندا مادەنيەت, سپورت جانە اقپارات قىزمەتكەرلەرى سالالىق كاسىپوداعىنىڭ ءتورايىمى سۆەتلانا يمانقۇلوۆا, استانا قالاسى كاسىپوداقتار ورتالىعىنىڭ توراعاسى تاستانبەك ەسەنتاەۆ جانە باسقالار ءسوز سويلەپ, قازاقستان حالقىنىڭ ءال-اۋقاتىن جاقسارتۋعا بايلانىستى جولداۋدا اتاپ كورسەتىلگەن نەگىزگى تۇجىرىمداردى تىلگە تيەك ەتتى. جينالىسقا قاتىسۋشىلار ەلباسىنىڭ جولداۋىندا كوتەرىلگەن كوكەيكەستى ماسەلەلەرىن ناقتى ءىس جۇزىنە اسىرۋدا ەلىمىزدىڭ كاسىپتىك وداقتار سالاسىنىڭ قىزمەتكەرلەرى بارىنشا بەلسەندىلىك تانىتاتىندىعىن ءبىراۋىزدان اتاپ كورسەتتى.
جىلقىباي جاعىپار ۇلى,
«ەگەمەن قازاقستان»
