بۇل جونىندە س.حوروشۋن: «شانحيگرۋپپ» جشس تۇرعىن ءۇي قۇرىلىسى ءتارتىبىن ورەسكەل بۇزعاندىقتان ءارى ۇلەسكەرلەردىڭ تالابى بويىنشا بۇل ماسەلە ۆەدومستۆوارالىق كوميسسيادا بىردەن قارالدى. وزدەرىڭىز كورگەندەي, بۇدان بىرنەشە اي بۇرىن قۇرىلىس جۇمىستارى پىسىقتالماستان ەكسپلۋاتاتسياعا بەرىلگەن. ۇلەسكەرلەردىڭ ىشكى ىستەر دەپارتامەنتىنە شاعىمدانۋىمەن قۇرىلىس كومپانياسى قاتەلىكتەرىن تۇزەتۋگە مىندەتتەلدى. شامامەن ءبىر ايدان كەيىن بۇل تۇرعىن ءۇي كەشەنى تولىقتاي پايدالانۋعا دايىن بولادى دەپ وتىرمىز, دەيدى.
بۇدان كەيىن استانا قالاسى اكىمىنىڭ ورىنباسارى «پامير» تۇرعىن ءۇي كەشەنىنە ات باسىن بۇردى. س.حوروشۋننىڭ سوزىنە سۇيەنسەك, بۇل نىساندى سالۋشى كومپانيا بۇدان 1,5 جىل بۇرىن قۇرىلىستى اياقتاۋعا ءتيىس بولعان. قارجى جاعىنان قيىندىققا تاپ بولعان «پوليترەند» جشس ۇلەسكەرلەردىڭ ءۇمىتىن اقتاماي, ەڭ سوڭىندا بۇل ماسەلە ۆەدومستۆوارالىق كوميسسيانىڭ نازارىنا ىلىنگەن.
- «پامير» تۇرعىن ءۇي كەشەنى ورتالىقتاندىرىلعان جىلۋ جۇيەسىنە ءالى تولىق قوسىلماعان. كۇن سۋىپ كەلە جاتقاندىقتان, قۇرىلىس كومپانياسىنا بۇگىن سوڭعى رەت ەسكەرتۋ جاسادىم. باسقا دا قانداي كەمشىلىكتەر بار, ءبارىن وڭتايلاندىرۋعا 2 اپتا ۋاقىت بەرىپ وتىرمىز, - دەيدى قالا اكىمىنىڭ ورىنباسارى.
العاشىندا 9 قابات دەپ جوسپارلانعان «جاڭا كوكتال» تۇرعىن ءۇي كەشەنى 5 قاباتتى بولىپ بوي كوتەرگەندە قۇرىلىس كومپانياسى مەن ۇلەسكەرلەر اراسىندا تۇسىنىسپەۋشىلىك پايدا بولسا, ول ماسەلە دە قالانىڭ باس ساۋلەت جوسپارىن جاساۋشى مامانداردىڭ ارقاسىندا وڭ شەشىمىن تاۋىپتى. جىلىتۋ, سۋ قۇبىرى جانە ەلەكتر-ەنەرگيا جۇيەسى ءبىر قالىپقا كەلتىرىلگەن تۇرعىن ءۇي كەشەنىندە ءبىر ايدان كەيىن بىرنەشە وتباسى قونىس تويىن تويلاماق. سونىمەن قاتار, «ابايدىڭ 150 جىلدىعى» تۇرعىن ءۇي كەشەنى دە قاراشا ايىنىڭ سوڭىنا دەيىن تولىقتاي پايدالانۋعا بەرىلەدى دەپ جوسپارلانىپ وتىر. سوڭعى اتالعان قوس بىردەي تۇرعىن ءۇي كەشەنى بىلتىر ءىستى بولعان «تولەندى» قۇرىلىس كومپانياسىنا تيەسىلى بولاتىن.
- 2017 جىلى استانا قالاسى بويىنشا پروبلەمالى 62 قۇرىلىس نىسانى تىركەلسە, ۆەدومستۆوارالىق كوميسسيانىڭ قۇرىلىپ, ىسكە كىرىسۋىمەن ولاردىڭ سانى ازايا باستادى. ەلباسىنىڭ تاپسىرماسىنا سايكەس, بىرقاتار تەگەۋرىندى جۇمىستار اتقارىلىپ, بيىلعى جىلدىڭ باسىندا پروبلەمالى وبەكتىلەردىڭ سانى 52 بولسا, قازىر 29 تۇرعىن ءۇي كەشەنىنىڭ ماسەلەسىن باقىلاۋدا ۇستاپ وتىرمىز. ونىڭ 28-ءىنىڭ جۇمىسى ۆەدومستۆوارالىق كوميسسيانىڭ قاداعالاۋىنسىز جۇرمەيتىنىنە كوز جەتكىزدىك. سوندىقتان, ءبىر-ەكى اپتا سايىن اتالعان وبەكتىلەردى ءجىتى باقىلاپ, ۇلەسكەرلەرمەن دە كەزدەسىپ تۇرامىز, دەيدى قالا اكىمىنىڭ ورىنباسارى س.حوروشۋن.
