اقش-تىڭ تەحاس شتاتىنداعى ريچموند دەپ اتالاتىن شاعىن عانا قالادا تۇرىپ جاتقان چارلولار وتباسى 1990 جىلدىڭ جايماشۋاق كوكتەمىندە قۋانىشقا كەنەلەدى. اتاپ ايتساق, 19 مامىر كۇنى شەكەسى تورسىقتاي قوس نارەستە دۇنيەگە كەلدى. اتا-اناسى ءبىرىنىڭ اتىن – دجەرمالل, ەكىنشىسىن – دجەرمەلل دەپ اتادى. بالا كەزدەرىنەن بوكسپەن شۇعىلدانعانا باستاعان ەگىز ۇلدار ۋاقىت وزا ءوز قاتارلاستارىنىڭ الدى بولىپ, ۇلكەن ارەنادا اۋىز تولتىرىپ ايتارلىقتاي تابىسقا قول جەتكىزەدى.
گەننادي گولوۆكينگە قارسىلاس اتانىپ وتىرعان دجەرمالل چارلونىڭ 2008 جىلى بەيجىڭدە الاۋى تۇتانعان وليمپيا ويىندارىنا قاتىسۋعا مۇمكىندىگى بولدى. الايدا ءدال سول جارىستىڭ قارساڭىندا قولىنان قاتتى جاراقات العان ول عالامدىق دودادان شەت قالدى. سودان چارلو كاسىپقويلار اراسىندا كۇش سىناسۋعا بەل بۋدى. بۇل رەتتە قادامى ءساتتى بولدى. 10 جىل ارالىعىندا 27 كەزدەسۋ وتكىزگەن دجەرمالل سول جەكپە-جەكتىڭ بارلىعىن جەڭىسپەن اياقتادى. 21 قارسىلاسىن ايقىن باسىمدىقپەن ۇتتى. سوڭعى جىلدارى ايتۋلى بوكسشىعا ەسە جىبەرگەندەر قاتارىندا مايكل فينني, كورنەليۋس باندرەيدج, وستين تراۋت, دجۋليان ۋيليامس, حورحە حەيلاند, ۋگو سەنتەنو سىندى ساڭلاقتار بار. بۇگىنگى تاڭدا دجەرمالل چارلو WBC نۇسقاسى بويىنشا ورتا سالماقتا ۋاقىتشا الەم چەمپيونى اتاعىن يەلەنىپ وتىر.
ەگىزدىڭ سىڭارىنا كەلەتىن بولساق, ول 2015 جىلى دۇنيەجۇزىلىك جاسوسپىرىمدەر وليمپياداسىندا قولا مەدالدى يەلەندى. ەرەسەكتەر رينگىندە دە ءتاۋىر جۇدىرىقتاستى. 2007 جىلدان بەرى دجەرمەلل كاسىپقويلارمەن ايقاسىپ ءجۇر. سول كەزدەن بەرى 31 رەت شارشى الاڭعا شىعىپ, بارلىق باسەكەدە جەڭىسكە جەتتى. 15 قارسىلاسىن نوكاۋتپەن ۇتتى. قازىرگى كەزدە ول WBC نۇسقاسىنداعى ءبىرىنشى ورتا سالماقتاعى الەم چەمپيونى.
بۇكىلالەمدىك بوكس كەڭەسى گەننادي گولوۆكين مەن دجەرمالل چارلونى ءبىر-بىرىمەن جۇدىرىقتاسۋعا مىندەتتەگەنىمەن, سان ميلليون جانكۇيەردى بۇل باسەكەدەن گورى قازاقستاندىق ورەن مەن مەكسيكالىق ساۋل الۆارەس اراسىنداعى ايقاس كوبىرەك قىزىقتىرۋدا. قازىرگى كەزدە تورتكۇل دۇنيە جۇرتشىلىعى ءدال سول جەكپە-جەكتى تاعاتسىزدانا كۇتۋدە. كۇنى كەشە باق وكىلدەرىنە سۇحبات بەرگەن دجەرمالل چارلو وسىعان بايلانىستى ءوز ويىن ءبىلدىردى. «ەگەر قوس تاراپ ورتاق مامىلەگە كەلىپ, GGG مەن «كانەلو» اراسىنداعى ءۇشىنشى كەزدەسۋىن ۇيىمداستىرىلاتىن بولسا, مەنىڭ وعان ەش قارسىلىعىم جوق», – دەپ مالىمدەدى.
عالىم سۇلەيمەن,
«ەگەمەن قازاقستان»
