مەن ءوزىم ءبىلىم سالاسىندا كوپ جىلدار ەڭبەك ەتكەندىكتەن پرەزيدەنتىمىزدىڭ ءوز جولداۋىندا ءبىلىم سالاسىنا كوپ كوڭىل بولگەنىن ۇلكەن قۋانىشپەن ءارى تولقۋمەن قابىلدادىم. اتاپ ايتساق, ەلباسى ءوز سوزىندە «مەكتەپكە دەيىنگى ءبىلىم بەرۋ ساپاسىن تۇبەگەيلى جاقسارتۋ كەرەك. بۇل سالادا بىلىكتىلىك تالاپتارىن, وقىتۋ ءادىسىن, تاربيەشىلەردىڭ جانە بالاباقشاداعى باسقا دا قىزمەتكەرلەردىڭ ەڭبەگىنە اقى تولەۋ جۇيەسىن قايتا قاراۋ قاجەت. ءبىلىم جانە عىلىم مينيسترلىگى اكىمدىكتەرمەن بىرلەسىپ, بيىل ءتيىستى «جول كارتاسىن» ازىرلەۋى كەرەك», دەدى. ورتا ءبىلىم بەرۋ جۇيەسىندە نەگىزگى تاسىلدەر بەلگىلەنگەن, قازىرگى كەزەڭدە سولاردىڭ ورىندالۋىنا باسا نازار اۋدارعان ءجون.
سونىمەن قاتار «پەداگوگ مارتەبەسى تۋرالى» زاڭدى ازىرلەپ قابىلداۋ قاجەتتىگىن ايتتى, بۇل شىنىمەن مۇعالىمدەر مەن مەكتەپكە دەيىنگى مەكەمەلەر قىزمەتكەرلەرى ءۇشىن بارلىق يگىلىكتى قاراستىرىپ, جۇكتەمەنى ازايتۋعا, ءجونسىز تەكسەرىستەر مەن مىندەتتەن تىس فۋنكتسيالاردان اراشالاۋعا اپاراتىن بىردەن ءبىر جول دەپ بىلەمىن. جولداۋدا جوعارى ءبىلىم بەرۋ ىسىنە دە نازار اۋدارىلعان. ەندى ونداعى مامان دايىنداۋ ساپاسىنا قاتىستى تالاپتار كۇشەيتىلەدى. بۇل وقۋ بىتىرگەن ستۋدەنتتەردىڭ جۇمىسپەن قامتىلۋى, جالاقىسى جوعارى جۇمىسقا ورنالاسۋىنا ۇلكەن كومەك بەرەتىنىنە سەنەمىن.
ەلباسى ءوزىنىڭ كەزەكتى جولداۋىندا مەملەكەتتىك ورگاندار قىزمەتىنىڭ تيىمدىلىگىن تۇبەگەيلى ارتتىرۋ ماسەلەسىن دە ايتىپ كەتتى. بيىل 4 مەملەكەتتىك ورگانعا جالاقى تولەۋدىڭ جاڭا مودەلىن ەنگىزىپ, بارلىق پيلوتتىق جوبالار جاقسى ناتيجەلەر كورسەتتى. ءتيىمسىز شىعىنداردى وڭتايلاندىرۋ جانە باسشىلىق قۇرامىن قىسقارتۋ ەسەبىنەن تومەنگى جانە ورتا بۋىنداعى قىزمەتكەرلەردىڭ جالاقىسى 2 - 2,5 ەسە ءوستى. وسىنىڭ ناتيجەسىندە مەملەكەتتىك قىزمەتكە قىزىعۋشىلىق ارتتى, اسىرەسە وڭىرلىك دەڭگەيدە ونىڭ وزەكتىلىگى جوعارى. كادرلاردىڭ جۇمىستان كەتۋى 2 ەسە قىسقاردى. بەدەلدى جوعارى وقۋ ورىندارىن بىتىرگەن تۇلەكتەردى قوسا العاندا, بىلىكتىلىگى جوعارى كادرلاردىڭ جەكە سەكتوردان كەلۋى 3 ەسە ارتتى.
تاعى ءبىر قۋانتارلىق جاعداي ەلباسى قۇقىق قورعاۋ ورگاندارىنىڭ جۇمىسىنا تەرەڭ جانە ساپالى وزگەرىستەردى ەنگىزۋدى ءجون سانادى. ول ۇكىمەتكە پرەزيدەنت اكىمشىلىگىمەن بىرلەسىپ, «ىشكى ىستەر ورگاندارىن جاڭعىرتۋ جونىندەگى جول كارتاسىن» قابىلداۋدى تاپسىردى.
«ىشكى ىستەر مينيسترلىگىنىڭ شتاتتىق سانىن وڭتايلاندىرىپ, پوليتسيانى وزىنە تيەسىلى ەمەس فۋنكتسيالاردان ارىلتۋ قاجەت. ۇنەمدەلگەن قاراجاتتى پوليتسەيلەردىڭ جالاقىسىن كوبەيتۋگە, ولاردىڭ تۇرعىن ءۇي جانە وزگە دە الەۋمەتتىك ماسەلەلەرىن شەشۋگە باعىتتاعان ءجون. سونىمەن قاتار پوليتسيا قىزمەتكەرىنىڭ جاڭا ستاندارتىن بەكىتۋ, مانساپتىق ىلگەرىلەۋ, پوليتسيا اكادەميالارى ارقىلى كادرلاردى دايارلاۋ مەن ىرىكتەۋ جۇيەسىن وزگەرتۋ ماسەلەلەرى دە قوزعالدى. جالپى ازاماتتار ساناسىندا پوليتسەيلەر جازالاۋشى ەمەس, كەرىسىنشە, قيىن جاعدايدا كومەك كورسەتۋشى دەگەن تۇسىنىك ورنىعۋى كەرەك», دەيدى ەلباسى.
بيىلعى جولداۋ قازاق حالقىنىڭ رۋحىن جىگەرلەندىرىپ, بويىمىزعا كۇش-قايرات دارىتتى دەپ ويلايمىن. قازاقستاننىڭ باعىندىراتىن بيىكتەرى ءالى الدا دەگەنگە سەنىمىم مول.
ەركىن يسيمباەۆ,
كوكشەتاۋ قالالىق ءماسليحاتىنىڭ حاتشىسى
