باياندالعان اقپاراتقا سايكەس, كوپتەگەن كورسەتكىشتەر بويىنشا (سابيلەر ءولىم-ءجىتىمىنىڭ, قانتامىر جۇيەلەرى,وبىر مەن تۋبەركۋلەز اۋرۋلارىنان ءولىم-ءجىتىمنىڭ ازايۋى) دەنساۋلىق ساقتاۋ ساپاسىنىڭ ارتۋى بايقالىپ وتىر. دەگەنمەن, پرەمەر-مينيستر باقىتجان ساعىنتاەۆ وبلىس اكىمدەرىنىڭ باعدارلامانىڭ بەكىتىلگەن كورسەتكىشتەرىن ۋاقىتىلى ورىنداۋىنا نازار اۋدارتتى.
وسىعان بايلانىستى دەنساۋلىق ساقتاۋ مينيسترلىگىنە اكىمدەردىڭ ۇسىنىستارىن قاراستىرىپ, مەملەكەتتىك باعدارلاما اياسىنداعى جۇمىستاردى ودان ءارى بەلسەندىرۋ ءۇشىن قوسىمشا تەتىكتەردى پىسىقتاۋ تاپسىرىلدى.
سونىمەن قاتار مينيسترلىككە ءدارى-دارمەكتەرمەن, مەديتسينالىق بۇيىمدارمەن, كادرلارمەن قامتاماسىز ەتۋ ماسەلەلەرى بويىنشا جۇمىستاردى جۇيەلەۋ, سونداي-اق دەنساۋلىق ساقتاۋ نىساندارىنىڭ ماتەريالدىق-تەحنيكالىق جاي-كۇيى مەن زاماناۋي مەديتسينالىق جابدىقتارمەن جاراقتاۋ ماسەلەلەرىن شەشۋ تاپسىرىلدى.
دەنساۋلىق ساقتاۋ ينفراقۇرىلىمىن دامىتۋ, مەديتسينالىق تەحنيكامەن جابدىقتاۋ بويىنشا مەملەكەتتىك-جەكەشەلىك ارىپتەستىك تەتىگىن بەلسەنە پايدالانۋ قاجەت.
دەنساۋلىق ساقتاۋ, ءبىلىم جانە عىلىم مينيسترلىكتەرىنە وبلىس اكىمدىكتەرىمەن بىرلەسىپ ەمحانالار مەن اۋرۋحانالاردى اسىرەسە, شاعىن ماماندانعان دارىگەرلىك كادرلارمەن جيناقتاۋ مەن وقىتۋ, ولاردىڭ بىلىكتىلىگىن ارتتىرۋ, ولاردى الەۋمەتتىك قولداۋمەن قامتۋ بويىنشا ءىس-شارالار قابىلداۋ تاپسىرىلدى.
