ەۋرووداقتىڭ قىسىمى مەن نارىقتىڭ تەپكىسىنە قاراماستان, بيلىكتەگى ەكى باسقارۋشى پارتيا جالپى ىشكى ءونىمنىڭ 2%-دان جوعارى بيۋدجەت تاپشىلىعى جوباسىن بەكىتۋگە دايىن.
بۇعان دەيىن ۆيتسە-پرەمەر, «5 جۇلدىز قوزعالىسى» باسشىسى لۋيدجي دي مايو سايلاۋالدى مالىمدەمەلەردى ورىنداۋ مەن ەكونوميكانى دامىتۋ ءۇشىن ۇكىمەت جوعارى, الايدا ەۋرووداق تالاپتارىنان اسپايتىن, ياعني 3%-دان از بيۋدجەت تاپشىلىعى جوباسىن قابىلداۋعا ءازىر ەكەنىن ايتتى.
بۇل ۇستانىمدى «ليگا» باسشىسى, ىشكى ىستەر ءمينيسترى ماتتەو سالۆيني دە قۇپتادى. ساياساتكەر بۇل جولدا تەك ساندار تۋرالى عانا ەمەس, ازاماتتاردىڭ دا جاعدايىن ۇمىتپاۋعا شاقىردى.
يتاليانىڭ بيۋدجەت تاپشىلىعىنىڭ شەكتەن شىعۋىنا ەۋرووداق پەن مەملەكەتتىڭ ەكونوميكا ءمينيسترى دجوۆانني تريا قارسى پىكىر تانىتۋدا. ونىڭ ايتۋىنشا, بيۋدجەت تاپشىلىعىن 1,9%-دان ءوسىرۋ ەكونوميكاعا نۇقسان كەلتىرىپ, مەملەكەتتىڭ قارىز كورسەتكىشىن باقىلاۋعا دا كەرى اسەرىن تيگىزەدى.
قازىرگى تاڭدا يتاليانىڭ مەملەكەتتىك قارىزى ەۋرووداقتاعى ەڭ جوعارعىلاردىڭ ءبىرى. مەملەكەت ايماقتارىنداعى جۇمىسسىزدىق كورسەتكىشى 29%-عا جەتىپ وتىر. بۇل رەتتە «ليگا» سالىقتىق رەفورما جاساپ, جەكە تۇلعالاردىڭ كىرىس سالىعىنىڭ مولشەرىن بىرىڭعايلاۋدى ۇسىندى. ول جىلدىق كىرىسى 80 مىڭ ەۋرودان از وتباسىلارعا 15%, كىرىسى 80 مىڭنان جوعارى وتباسىلار ءۇشىن 20%-دى قۇراۋى مۇمكىن.
يتاليا ۇكىمەتى كەلەر جىلدىڭ بيۋدجەتىن قازاننىڭ 20-نا دەيىن بەكىتۋى كەرەك.
