سەناتتىڭ جالپى وتىرىسىندا «ستاندارتتاۋ تۋرالى» جانە وعان ىلەسپە كەيبىر زاڭنامالىق اكتىلەرگە ولشەم بىرلىگىن قامتاماسىز ەتۋ جانە ستاندارتتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوبالارى ءبىرىنشى وقىلىمدا قارالدى. بۇلار تۋرالى باياندامانى ينۆەستيتسيالار جانە دامۋ ءمينيسترى جەڭىس قاسىمبەك جاسادى. ونىڭ ايتۋىنشا, «ستاندارتتاۋ تۋرالى» زاڭ جوباسىندا تەحنيكالىق رەگلامەنتتەر جۇيەسىن شەكتەۋ, ستاندارتتاۋدىڭ ۇلتتىق جۇيەسىن قالىپتاستىرۋ جانە ۇلتتىق ورگانىن انىقتاۋ جانە تەحنيكالىق كوميتەتتەردىڭ ءرولىن ارتتىرۋ قاراستىرىلعان. «زاڭ جوباسى نەگىزىنەن مەترولوگياداعى ولشەم بىرلىگىن قامتاماسىز ەتۋدىڭ جاڭا مەملەكەتتىك قۇرىلىمىن جاساۋدى جانە تۇزەتۋلەردىڭ جاڭا ەتالوندار كاليبروۆكاسىنا ءوتۋىن كوزدەيدى. بۇل حالىقارالىق ساۋدادا ولشەمدەر ناتيجەسىنە دەگەن سەنىمدى ارتتىراتىن نەگىزگى تەتىكتەر», دەدى ج.قاسىمبەك.
زاڭ جوباسى اكىمشىلىك قۇقىق بۇزۋشىلىق كودەكسىنە وزگەرىستەر ەنگىزىپ, تەحنيكالىق رەتتەۋ مەن مەترولوگيا سالاسىنداعى بۇزۋشىلىقتاردىڭ جاۋاپكەرشىلىگىن ارتتىرۋدى كوزدەپ, ايىپپۇلداردى ءۇش ەسە كوبەيتۋدى ەنگىزگەن. ال «جول ءجۇرۋ ءتارتىبى تۋرالى» زاڭعا ەنگىزگەن تولىقتىرۋدا – كولىك قۇرالدارىنا ەلەكتروندى پاسپورت ەنگىزۋ نورماسى قاراستىرىلعان.
نەگىزگى بايانداماشىعا بىرنەشە سۇراقتار بەرىلگەن سوڭ زاڭ جوباسى تالقىلانىپ, وندا «قابىلدانسىن» دەگەن ءبىر عانا ۇسىنىس ءتۇستى. «ستاندارتتاۋ تۋرالى» زاڭ جوباسىنا سەنات ءبىر وزگەرىس ەنگىزگەن ەكەن, ول قابىلدانىپ, ءماجىلىستىڭ قاراۋىنا جىبەرىلدى. ال ىلەسپە زاڭ جوباسى ءبىرىنشى وقىلىمدا وزگەرىسسىز ماقۇلداندى. الايدا ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ توراعاسى اسقار بەيسەنباەۆتىڭ ۇسىنىسىمەن زاڭ جوباسى وسى وتىرىستان كەيىنگى شاعىن ۇزىلىستەن سوڭ ەكىنشى رەت قارالىپ, زاڭ قابىلداندى.
جالپى وتىرىستا سەناتتىڭ كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتى دەپۋتاتتارىنىڭ جول ءجۇرۋ قاۋىپسىزدىگى ماسەلەلەرى بويىنشا دەپۋتاتتىق ساۋالىنا جاۋاپ بەرۋ دە كۇن تارتىبىنە شىعارىلعان ەكەن. ويتكەنى ساۋال جولداعان دەپۋتاتتار وزدەرىنە جالتارما جاۋاپتار كەلەتىنىنە نارازىلىق بىلدىرگەن. بۇل تۋرالى دەپۋتات دۋلات قۇسداۋلەتوۆ ايتىپ بەردى. سەناتورلار
6 قىركۇيەكتە دەپۋتاتتىق ساۋال جولداپ, جول ءجۇرۋ قاۋىپسىزدىگىنىڭ بۇزىلۋىنان بولعان اپاتقا 2017 جىلى 24 مىڭنان استام ادام ۇشىراپ, ونىڭ 2 مىڭى قازا تاپقانى سياقتى ستاتيستيكالىق مالىمەتتەر كەلتىرىپ, وسىنىڭ سەبەبىن انىقتاۋ ماقساتىندا ساۋال جولداسا, قاناعاتتانارلىق جاۋاپ بولماعان. سوندىقتان جالپى وتىرىسقا ىشكى ىستەر ءمينيسترىنىڭ ورىنباسارى ەرلان تۇرعىمباەۆ شاقىرىلىپ, دەپۋتاتتاردىڭ ساۋالىنا تىكەلەي جاۋاپ بەرۋىن سەناتورلار تالاپ ەتكەن كورىنەدى.
گەنەرال ە.تۇرعىمباەۆ دەپۋتاتتارعا جول ءجۇرۋ قاۋىپسىزدىگىنە بايلانىستى بۇگىنگى تاڭدا جۇرگىزىلىپ جاتقان جۇمىستار تۋرالى كەڭىنەن بايانداپ بەردى. جول قاۋىپسىزدىگىن ساقتاۋعا بايلانىستى كوپتەگەن جاڭالىقتار دا ايتىلدى. باياندامادان سوڭ سەناتورلار گەنەرال ە.تۇرعىمباەۆقا جانە وتىرىسقا قاتىسىپ وتىرعان وسى ماسەلەگە بايلانىستى باسقا دا ورگانداردىڭ باسشىلارىنا كوپتەگەن سۇراقتار بەردى. سەنات توراعاسى قاسىم-جومارت توقاەۆ: «بۇل ماسەلە ۇنەمى سەناتتىڭ باقىلاۋىندا بولادى», دەپ قورىتتى.
وسى كۇنگى وتىرىستا سەناتورلار ەۋرازيالىق ەكونوميكالىق قوعامداستىققا مۇشە ءبىر مەملەكەتتىڭ ازاماتتارى وسى قوعامداستىققا مۇشە ەكىنشى مەملەكەتتىڭ اۋماعىندا ەڭبەك ەتىپ جۇرگەن كەزىندە ۇشىراپ قالعان جازاتايىم وقيعالاردى تەرگەپ-تەكسەرۋ تۋرالى جانە قازاقستان مەن يوردان حاشيميت كورولدىگىنىڭ اراسىندا ازاماتتىق قورعانىس, توتەنشە جاعدايلاردىڭ الدىن الۋ جانە ولاردى جويۋ سالاسىنداعى ىنتىماقتاستىق تۋرالى كەلىسىمدەردى راتيفيكاتسيالادى.
وتىرىستىڭ سوڭىنان سەناتورلاردىڭ ورتالىق مەملەكەتتىك ورگاندارعا جولداعان ساۋالدارى جاريالاندى.
جاقسىباي سامرات,
«ەگەمەن قازاقستان»
