قورعانىس جانە اەروعارىش ونەركاسىبى ءمينيسترى بەيبىت اتامقۇلوۆ دەپۋتاتتارعا بۇگىنگى كۇنگە دەيىن اتقارىلعان جۇمىستار تۋرالى بايانداما جاسادى. ول سونداي-اق سەناتورلارعا «قورعانىس ونەركاسىبى جانە مەملەكەتتىك قورعانىس تاپسىرىسى تۋرالى» زاڭ جوباسىن تانىستىرىپ, قورعانىس جانە اەروعارىش قىزمەتى ماسەلەلەرى جونىندەگى قولدانىستاعى زاڭناماعا ۇسىنىلىپ وتىرعان وزگەرىستەر مەن تولىقتىرۋلار تۋرالى ايتىپ بەردى.
سەناتورلار جىل بويى وسى سالانى ەگجەي-تەگجەيلى زەردەلەدى. ولار «قازاقستان عارىش ساپارى» ۇلتتىق كومپانياسىنىڭ, اقكول قالاسىنداعى عارىش كەمەلەرى مەن بايلانىس مونيتورينگى جۇيەسىن باسقارۋدىڭ جەر ءۇستى كەشەنىنىڭ قىزمەتىمەن تانىستى, «Eurocopter» تىكۇشاق قۇراستىرۋ زاۋىتى مەن سولتۇستىك قازاقستان جانە شىعىس قازاقستان وبلىستارىنداعى قورعانىس ونەركاسىبى كەشەنىنە قاراستى بىرقاتار كاسىپورىنداردا بولدى. شارالار قورىتىندىسى بويىنشا ءتيىستى ۇسىنىستار ازىرلەنىپ, ۇكىمەتكە جىبەرىلدى.
سەناتورلار سەرىك جاقسىبەكوۆ پەن تالعات مۇساباەۆ قورعانىس ونەركاسىبى كەشەنى كاسىپورىندارىنىڭ ءوندىرىس قۋاتىنا ساي تولىق كولەمدە جۇمىس بەرىلمەي وتىرعانىنا, دامۋدىڭ ستراتەگيالىق جوسپارىنىڭ جوقتىعىنا, بىلىكتى ماماندار ساياساتىنا قاتىستى بىرقاتار سىن ەسكەرتپەلەرىن ايتتى.
جان-جاقتى پىكىرسايىستان كەيىن سەناتتىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى داريعا نازارباەۆا تالقىلانعان ماسەلەلەر قارۋلى كۇشتەردى قايتا جابدىقتاۋ تۇجىرىمداماسىن ىسكە اسىرۋدا ماڭىزدى ءرول اتقاراتىنىن اتاپ ءوتتى.
مەملەكەت باسشىسىنىڭ تاپسىرماسىنا وراي قازاقستاندا تاياۋ جىلداردا قورعانىس ونەركاسىبىنىڭ 9 كاسىپورنىندا تەحنولوگيالىق جاڭعىرتۋ جۇزەگە اسادى جانە كەلەشەگى زور ونىمدەر وندىرۋگە باعدارلانعان, ەكسپورتقا شىعارۋعا مۇمكىندىگى بار ءاربىر كاسىپورىندى جاڭعىرتۋ جونىندەگى جول كارتاسى ازىرلەندى.
