وتاعاسى قوجاتاي اقساقال 94-كە كەلسە دە, ءالى شيراق, مىعىم. كەۋدەسى مەملەكەتتىك ماراپاتتارعا تولى سوعىس ارداگەرى قان شايقاستان ورالعاننان كەيىنگى بار عۇمىرىن بالا تاربيەسىنە ارناپتى. قۇداي قوسقان قوساعى ايشا اجەي ەكەۋى 10 ۇل-قىز ءوسىرىپ, نەمەرە-شوبەرە قىزىعىن كورىپ وتىر.
– مەنىڭ اۋلەتىمدە ۇستازدىق جولىمدى قۋعان ۇلدارىم مە كەلىندەرىمنىڭ جۇمىس ءوتىلىن ەسەپتەسەم, 200 جىلعا جۋىقتاپ قالادى. نەمەرەلەرىمنىڭ ءبارى ىستىق. باحتيارىم –ەلگە ايگىلى ۆەلوشاباندوز. وليمپياداعا قاتىستى. قازىر شەتەلدە جاتتىعىپ ءجۇر. كەمپىرىم ەكەۋمىز باعداتتىڭ قولىندا تۇرىپ جاتىرمىز. وسى كۇنگە جەتكەنىمىزگە شۇكىرشىلىك دەيمىز. مەرەكە سايىن سىيلىقتارىن اكەلىپ, قۇرمەتتەپ جاتادى. ەڭ باستىسى, كوڭىل عوي. ۇمىتپاعاندارىنا راحمەت», دەيدى قوجاتاي اقساقال.
ەرىك ەسىم ۇلى ءبىر شاڭىراق استىندا 70 جىل ءتۇتىن تۇتەتىپ, ماۋەلى بايتەرەك سەكىلدى تامىرىن تەرەڭگە جايعان قوس قارياعا ساۋلىق تىلەپ, يىقتارىنا شاپان, قامزول جاپتى. باسقا دا تارتۋ-تارالعىلار جاسادى.
ءبىلىم جانە عىلىم كاسىپوداعى كوميتەتىنىڭ توراعاسى نازىمبەك ورازىمبەتوۆ تە ءوز سىيلىقتارىن ۇسىندى.
سوڭعى جىلدارى وبلىس اۋماعىندا بىردە-ءبىر گاۋحار تويدىڭ اتالماعانىن ەسكەرسەك, نەكىباەۆتار اۋلەتىنە قانداي قۇرمەت كورسەتىلسە دە ارتىقتىق ەتپەيدى.
ءومىر ەسقالي.
«ەگەمەن قازاقستان».
سولتۇستىك قازاقستان وبلىسى.
