بۇل كەزدەسۋ استانالىقتار ءۇشىن ءساتتى باستالدى. 1-مينۋتتا-اق رومان ستارچەنكو مەن اندرە پەتەرسسوننان پاس العان كانادالىق شابۋىلشى پاتريس كورمە ەسەپ اشتى.
ءبىرىنشى كەزەڭ «بارىستىڭ» باسىمدىلىعىمەن ءوتىپ جاتقانىمەن, 13-مينۋتتا ايدىن يەلەرى ەسەپتى تەڭەستىرىپ كەتتى. الەكساندر نيكۋلين مەن گەننادي ستولياروۆ قاتىسقان جىلدام شابۋىلدان كەيىن داررەن ءديتستىڭ جەتىپ ۇلگەرمەگەنىن پايدالانعان الەكسەي ماكەەۆ حەنريك كارلسسون قورعاعان قاقپانىڭ اشىق تۇسىنا سۇڭگىتە سالدى 1:1.
ەكىنشى كەزەڭ باسىندا ايدىن يەلەرى پ.كورمەگە قارسى ءتارتىپ بۇزعانىمەن, تورەشىلەر ونى «كورمەي قالدى». ەسەسىن ەكەلەسى ساتتە «بارىستىڭ» حوككەيشىسى ايدىننان قۋىلدى. سوعان قاراماستان, ءاليحان اسەتوۆ ء«ۆيتيازدىڭ» قاقپاشىسى يوني ورتيومەن جەكەدارا شىققانىمەن, وڭتايلى ءساتتى پايدالانا المادى. دەگەنمەن قارقىنىن ۇدەتكەن استانالىقتار دەگەنىنە جەتتى. 26-مينۋتتا كانادالىق مەتتيۋ فرەتتين سوققان شايبا ا.نيكۋليننىڭ كونكيىنە ءتيىپ, قاقپاعا كىرىپ كەتتى - 2:1. كوپ ۇزاماي «بارىس» ويىنشىلارى سان باسىمدىلىعىن قۇر جىبەرمەي, كانادالىق قورعاۋشى دجەسسي بلەكەر ەسەپتى 3:1-گە جەتكىزدى. ءۇشىنشى, شەشۋشى كەزەڭدە تورەشىلەر قارسىلاسىن قولمەن ۇستاپ, تەجەدى دەگەن جەلەۋمەن ءاليحان اسەتوۆتى ايدىننان قۋدى. سونى پايدالانعان «ۆيتيازدان» گەننادي ستولياروۆ 45-مينۋتتا ەسەپتى قىسقارتتى.
كەزدەسۋ اياقتالۋعا ءسال قالعاندا, قاقپاشىسىن التىنشى ويىنشىعا الماستىرعان ايدىن يەلەرىنەن ۆويتەح موزيك تارازى باسىن تەڭەستىرىپ كەتتى - 3:3. وسىلايشا ماتچ وۆەرتايمعا, ودان بۋلليتكە ۇلاستى. بۋلليت سەرياسىندا جەڭىسكە جەتكەن «بارىس» شىعىس كونفەرەنتسياسىندا 13 ۇپاي جيناپ, التىنشى ورىنعا كوتەرىلدى. ءار كونفەرەنتسيادان ۇزدىك سەگىز كوماندانىڭ پلەي-وفف باسەكەسىنە جولداما الاتىنى بەلگىلى.
ايتا كەتەيىك, ەلوردالىقتار كەلەسى ماتچىن 29 قىركۇيەك كۇنى لاتۆيا استاناسى ريگادا جەرگىلىكتى «دينامومەن» وتكىزەدى. ريگالىقتار 13 ۇپايمەن باتىس كونفەرەنتسياسىندا بەسىنشى ورىندا كەلەدى.
