وتىرىستى اشقان گ.ابدىقالىقوۆا سىبايلاس جەمقورلىققا قارسى ءىس-ارەكەت قازاقستاندا مەملەكەتتىك ساياساتتىڭ ماڭىزدى ستراتەگيالىق باسىمدىعى رەتىندە قاراستىرىلاتىنىن اتاپ ءوتتى. ەلباسى نۇرسۇلتان نازارباەۆ ءوزىنىڭ قازاقستان حالقىنا ارناعان قاڭتارداعى جولداۋىندا سىبايلاس جەمقورلىقتىڭ الدىن الۋ جولىنداعى كۇرەستى جالعاستىرۋ قاجەتتىگىن ايتقانىنا دا توقتالدى.
«بۇگىنگى جيىن سەلەكتورلىق فورماتتا وتەدى. ءىس-شاراعا الماتى, استانا, شىمكەنت قالالارىنىڭ جانە وبلىستاردىڭ باسشىلارى, سونىمەن قاتار وڭىرلىك كوميسسيالاردىڭ مۇشەلەرى قاتىسىپ وتىر. وزدەرىڭىزگە بەلگىلى, ەلباسى نۇرسۇلتان نازارباەۆ بارلىق سالالاردا سىبايلاس جەمقورلىقپەن كۇرەستىڭ تيىمدىلىگىن ارتتىرۋدىڭ ماڭىزدىلىعىنا جانە ءتيىستى الدىن الۋ شارالارىن جۇرگىزۋ قاجەتتىگىنە باسا نازار اۋدارىپ وتىر», دەدى مەملەكەتتىك حاتشى.
وتىرىستا جەر قاتىناستارى سالاسىندا زاڭدىلىقتى ساقتاۋ ماسەلەلەرى, ءبىلىم بەرۋ ىسىنە بيۋدجەت قاراجاتىن ءتيىمدى پايدالانۋدى قامتاماسىز ەتۋى باعىتىندا قابىلدانىپ جاتقان شارالار تالقىلاندى. جيىن بارىسىندا باس پروكۋراتۋرانىڭ, مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ, رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ, اۋىل شارۋاشىلىعى, ءبىلىم جانە عىلىم مينيسترلىكتەرىنىڭ باياندامالارى تىڭدالدى.
جەر قاتىناستارى سىبايلاس جەمقورلىق بەلەڭ العان سالانىڭ ءبىرى ەكەنى بەلگىلى بولىپ وتىر. تەك سوڭعى 2,5 جىلدىڭ ىشىندە بۇل سالا بويىنشا سىبايلاس جەمقورلىققا قارسى قىزمەت 457 قىلمىستى تىركەگەن. 78 ادام سوتتالعان. پروكۋرورلىق تەكسەرىس ناتيجەسى بويىنشا جەرگە قاتىستى زاڭنامانى قولدانۋ سالاسىندا 342 ادام, ونىڭ 24-ءى مەملەكەتتىك قىزمەتتىڭ بەدەلىنە نۇقسان كەلتىرگەنى ءۇشىن ءتۇرلى جاۋاپكەرشىلىككە تارتىلعان.
وسى ورايدا وتىرىس بارىسىندا جەر تۋرالى زاڭنامانى, جەكە باسپانا قۇرىلىسى ءۇشىن جەر بەرۋ كەزىندە كەزەكتى جانە مەملەكەتتىك قىزمەتتەر كورسەتۋ مەرزىمدەرىن ساقتاۋ, كوممەرتسيالىق جەرلەردى ءباسساۋداسىز يەلەنۋگە جول بەرمەۋ قاجەتتىگىنە مۇددەلى مەملەكەتتىك ورگانداردىڭ نازارى اۋدارىلدى.
ءبىلىم سالاسىندا 2016 جىلدان بەرى سىبايلاس جەمقورلىق سيپاتتاعى 510 قىلمىس تىركەلىپ, ولارعا قاتىستى 178 ادام سوتتالعان. الەۋمەتتىك ساۋالنامالار جوعارى وقۋ ورىندارىنداعى ءبىلىم بەرۋدە, مەكتەپكە دەيىنگى مەكەمەلەرمەن بالالاردى قامتۋدا سىبايلاس جەمقورلىق دەڭگەيى جوعارى ەكەنىن كورسەتكەن.
تالقىلاۋ ناتيجەسىندە كوميسسيا تاراپىنان وكىلەتتى مەملەكەتتىك ورگاندارعا انىقتالعان زاڭ بۇزۋ جايتتارىنا قاتىستى تالداۋ جۇرگىزىپ, ولاردىڭ الدىن الۋ ءۇشىن ءتيىستى تەتىكتەر ازىرلەۋ ارقىلى شارالار قابىلداۋ جونىندە تاپسىرما بەرىلدى.
جيىن سوڭىندا گ.ابدىقالىقوۆا سىبايلاس جەمقورلىقسىز قۇقىقتىق مەملەكەت قۇرۋ باعىتىندا ەلدە جۇرگىزىلىپ جاتقان رەفورمالار قازاقستاننىڭ 2025 جىلعا دەيىنگى ستراتەگيالىق دامۋ جوسپارىنىڭ باستى مىندەتتەرى – جەدەل ءارى ساپالى ەكونوميكالىق ءوسىم مەن ەلدەگى حالىق تۇرمىسى دەڭگەيىنىڭ جوعارىلاۋىنا قول جەتكىزۋگە باعىتتالۋعا ءتيىس ەكەنىن اتاپ ءوتتى.
اباي اسانكەلدى ۇلى,
«ەگەمەن قازاقستان»
