جاھاندىق كونفەرەنتسيادا جاڭا دەكلاراتسيا قابىلدانادى

مەديتسينا • 19 قىركۇيەك، 2018

جاھاندىق كونفەرەنتسيادا جاڭا دەكلاراتسيا قابىلدانادى

استانادا 25-26 قازاندا الماتى دەكلاراتسياسىنىڭ 40 جىلدىعىنا وراي مەديتسينالىق-سانيتاريالىق العاشقى كومەك كورسەتۋگە ارنالعان جاھاندىق كونفەرەنتسيا وتەدى. ورتالىق كوممۋنيكاتسيالار قىزمەتىندە دەنساۋلىق ساقتاۋ ءمينيسترى ەلجان ءبىرتانوۆتىڭ، ددۇ باس ديرەكتورىنىڭ كومەكشىسى ناوكو ياماموتو جانە يۋنيسەف اتقارۋشى ديرەكتورىنىڭ جاھاندىق باعدارلامالار جونىندەگى ورىنباسارى تەد چايباننىڭ قاتىسۋىمەن كونفەرەنتسياعا دايىندىق ماسەلەلەرى بويىنشا ءباسپاسوز كونفەرەنتسياسى ءوتتى.

مايگۇل سۇلتان

مەديتسينالىق-سانيتاريالىق العاشقى كومەك كورسەتۋدى ودان ءارى دامىتۋعا سەرپىن بەرەتىن جانە زاماناۋي جاھاندىق دەنساۋلىق ساقتاۋ جۇيەسىندە قازاقستاننىڭ جاڭا ءرولىن قالىپتاستىرۋعا ىقپال ەتەتىن كونفەرەنتسيانى وتكىزۋدى دەنساۋلىق ساقتاۋ ءمينيسترى ە.ءبىرتانوۆ بيىلعى جىلدىڭ 26 ساۋىرىندە دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس گەبرەيەسۋسپەن جەنەۆاداعى كەزدەسۋى كەزىندە ۇسىنعان بولاتىن. دۇنيەجۇزىلىك دەنساۋلىق ساقتاۋ ۇيىمى، بۇۇ بالالار قورى (يۋنيسەف) جانە قازاقستان ۇكىمەتى ۇيىمداستىرىپ وتىرعان القالى جيىنعا ددۇ-عا مۇشە 100-دەن اسا ەلدەن دەلەگاتسيا شاقىرىلعان. باسقوسۋدا مەديتسينالىق-سانيتاريالىق العاشقى كومەك كورسەتۋدىڭ پراكتيكالىق ماسەلەلەرى تالقىلانىپ، وسى سالا بويىنشا ەنگىزىلىپ وتىرعان جاڭا زاڭنامالىق وزگەرىستەر تانىستىرىلادى. سونداي-اق، ەلىمىزدىڭ بىلىكتى، ءبىلىمدى ماماندارىمەن قاتار ەڭبەك جولىن ەندى باستاعان جاس ماماندار شەتەلدىڭ تاجىريبەلى دارىگەرلەرىمەن ءوزارا تاجىريبە الماسادى.

XX عاسىرداعى دەنساۋلىق ساقتاۋ ءىسىنىڭ ۇلى حارتياسى اتانعان الماتى دەكلاراتسياسى حالىق دەنساۋلىعىن قورعاۋدىڭ باستى قۇجاتى بولعانى انىق. ساراپشىلاردىڭ ايتۋىنشا، 40 جىل بۇرىنعى ۋاقىتپەن سالىستىرعاندا حالىق دەنساۋلىعى جاقسارا تۇسكەن، ءومىر ءسۇرۋ جاسى دا اناعۇرلىم ۇزارعان.

ناوكو ياماموتونىڭ قازاقستاندىق دارىگەرلەر حالىق دەنساۋلىعىن ساقتاۋدا قارقىندى قادام جاساعانىن اتاپ ءوتتى. «1978 جىلى قول قويىلعان الماتى دەكلاراتسياسى بارشانىڭ دەنساۋلىعىنا قول جەتكىزۋدىڭ نەگىزگى ستراتەگياسى رەتىندە مەديتسينالىق-سانيتاريالىق العاشقى كومەكتى ناسيحاتتايتىن تۇڭعىش حالىقارالىق دەكلاراتسيا بولدى. مەديتسينالىق قىزمەتتىڭ ساپاسى بارلىق ەلدە وزەكتى. بىراق وعان تولىقتاي جەتۋ وڭاي ەمەس. ول ءۇشىن دارىگەرلەر جۇرتشىلىققا جاقىن بولۋىمىز كەرەك. ءبىز الداعى باسقوسۋ ارقىلى دەنساۋلىق ساقتاۋ سالاسىن ودان ءارى دامىتۋعا مۇمكىندىك الامىز. الەمدىك ساراپشىلار مەن بولاشاق ماماندار دەنساۋلىق ساقتاۋ سالاسىنىڭ ماسەلەلەرىن بىرلىكتە تالقىلايتىن بولامىز»، دەدى ددۇ باس ديرەكتورىنىڭ كومەكشىسى ناوكو ياماموتو.

كونفەرەنتسيا كەزىندە جاڭادان استانا دەكلاراتسياسى قابىلدانباق. جيىنعا قاتىسۋشىلار بۇل الەمدەگى باستاپقى دەنساۋلىق ساقتاۋدى ودان ءارى دامىتۋ باعىتىن انىقتايتىنىن ايتتى. مينيستر ە.ءبىرتانوۆ الماتى مەن استانا دەكلاراتسيالارىنىڭ نەگىزگى ايىرماشىلىعىنا توقتالىپ: «قىرىق جىلدان استام ۋاقىتتا قازاقستاننىڭ عانا ەمەس، الەم حالىقتارىنىڭ ءومىر ءسۇرۋ جاسى ارتتى. دەمەك، قارتتار مەديتسينالىق قىزمەتتى كوبىرەك پايدالانادى. سونداي-اق، قىرىق جىل بۇرىن ينفەكتسيالىق اۋرۋلار - وتە ماڭىزدى اۋرۋلار قاتارىندا بولسا، العاشقى مەديتسينالىق كومەكتىڭ ارقاسىندا كوپتەگەن اۋرۋلار جويىلدى. قازىر جۇقپالى ەمەس اۋرۋلار - قانت ديابەتى، باۋىر، وكپە اۋرۋلارى دۇنيە جۇزىندە وزەكتى بولىپ وتىر. ولاردىڭ الدىن الۋ ءۇشىن پروفيلاكتيكاعا كوڭىل بولگەن ءجون. ءۇشىنشى ماڭىزدى فاكتور - جاڭا تەحنولوگيالار. قىرىق جىل بۇرىنعى مەديتسينا مەن قازىرگى مەديتسينانىڭ اراسى جەر مەن كوكتەي. اقپاراتتىق تەحنولوگيالاردىڭ ءرولى كوبەيىپ جاتىر. وسىنىڭ بارلىعىن ءتيىمدى پايدالانۋىمىز كەرەك»، دەدى.

ايتا كەتەيىك، كونفەرەنتسيادا جوعارى دەڭگەيدەگى 6 پلەنارلىق وتىرىس، 18 قاتار سەسسيا وتەدى. سونداي-اق كونفەرەنتسيانىڭ ءبىرىنشى كۇنى ساياسي كوشباسشىلاردىڭ دەنساۋلىقتى مەديتسينالىق-سانيتاريالىق العاشقى كومەك ارقىلى ساقتاۋعا ادالدىعىن اتاپ ءوتۋ ءۇشىن كونفەرەنتسياعا شاقىرىلعان مەملەكەت باسشىلارىمەن كەزدەسۋ وتكىزىلەتىن بولادى.

مايگۇل سۇلتان،

«ەگەمەن قازاقستان»