كەزدەسۋ بارىسىندا قىتاي حالىق رەسپۋبليكاسىنان (2014-2018 جج.) تاجىكستان رەسپۋبليكاسىنا (2018-2020 جج.) اوسشك توراعالىعىن تاپسىرۋ ءراسىمى ءوتتى. حابيبوللا ميرزوەۆ حاتشىلىقتىڭ جاڭا اتقارۋشى ديرەكتورى بولىپ تاعايىندالدى. ونىڭ كانديداتۋراسىن بارلىق اوسشك-گە مۇشە 27 مەملەكەت ءبىراۋىزدان قولدادى.
قازاقستان رەسپۋبليكاسىنىڭ سىرتقى ىستەر ءمينيسترى قايرات ءابدىراحمانوۆ قىتاي حالىق رەسپۋبليكاسىنا جانە اوسشك ۇدەرىسىنىڭ دامۋىنا قوسقان ۇلەسى ءۇشىن ميسسياسىن اياقتاعان اتقارۋشى ديرەكتور گۋن تسزيانۆەيگە العىسىن ءبىلدىردى. ول قىتاي توراعالىعى كەزىندە ازياداعى تۇراقتى قاۋىپسىزدىك پەن ىنتىماقتاستىقتى قامتاماسىز ەتۋگە باعىتتالعان كەڭەستى دامىتۋدىڭ جاڭا جانە ماڭىزدى كەزەڭى باستالعانىن ەسكە سالدى. اوسشك جاستار جانە ىسكەرلىك كەڭەستەرى قۇرىلدى, اوسشك-ءنىڭ قاۋىپسىزدىك تۇجىرىمداماسىن كەڭىنەن تالقىلاۋ جانە تاراتۋعا ارنالعان جاڭا ارنا بولعان ۇكىمەتتىك ەمەس فورۋم ءوز قىزمەتىن باستادى. ءسىم باسشىسى قىتايدىڭ توراعالىعى كەزىندە كەڭەستىڭ قۇرامىنا 27-ءشى مۇشە-مەملەكەت رەتىندە شري-لانكا دەموكراتيالىق سوتسياليستىك رەسپۋبليكاسىنىڭ كىرۋى ارقىلى (2018 جىلعى 20 ماۋسىم) اوسشك-ءتى كەڭەيتۋ ماسەلەسىنە ارنايى توقتاپ ءوتتى.
مينيستر كەزدەسۋگە قاتىسۋشىلاردىڭ پرەزيدەنت نۇرسۇلتان نازارباەۆتىڭ كەڭەستىڭ نەگىزىندە ازياداعى قاۋىپسىزدىك جانە دامۋ ۇيىمىن قۇرۋ تۋرالى باستاماسىنا ەرەكشە نازار اۋداردى جانە بۇل ماسەلەنى ساراپتامالىق دەڭگەيدە ءارى قاراي تالقىلاۋعا شاقىردى.
اوسشك 1992 جىلى 5 قازاندا قازاقستان رەسپۋبليكاسىنىڭ پرەزيدەنتى ن. نازارباەۆتىڭ باستاماسىمەن قۇرىلدى. اوسشك ازياداعى قاۋىپسىزدىك ماسەلەلەرى بويىنشا كونسەنسۋس نەگىزىندە ديالوگ, كەڭەس بەرۋ, شەشىم قابىلداۋ جانە شارالاردى جۇزەگە اسىرۋ ءۇشىن مەملەكەتارالىق فورۋم بولىپ تابىلادى. قازىرگى ۋاقىتتا ازياداعى 27 مەملەكەت اوسشك مۇشەسى, ال 8 ەل جانە 5 ۇيىم باقىلاۋشى بولىپ تابىلادى.
