بۇگىنگى كەزدەسۋ بارىسىندا مەملەكەت باسشىسىنا رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ قازىرگى قىزمەتى جانە مەملەكەتتىك باعدارلامالاردىڭ ءاۋديتى, سونداي-اق وڭىرلەردەگى تەكسەرۋ كوميسسيالارىنا كورسەتىلىپ جاتقان ادىستەمەلىك قولداۋ جۇمىستارى تۋرالى مالىمەت بەرىلدى.
نۇرسۇلتان نازارباەۆ بيۋدجەت قارجىسىن ءتيىمدى يگەرۋدى جانە ونىڭ قولدى بولۋىنا جول بەرمەۋدى قامتاماسىز ەتۋ ىسىندەگى ەسەپ كوميتەتىنىڭ ماڭىزدى ءرولىن اتاپ ءوتتى.
– ەسەپ كوميتەتى – مەملەكەت قارجىسىنىڭ ورىندى يگەرىلۋىن جانە بيۋدجەتتىڭ اتقارىلۋىن تاۋەلسىز باعالاۋدى قامتاماسىز ەتەتىن ماڭىزدى ورگان. قاراجات تەك كوزدەلگەن ماقساتقا بولىنۋگە ءتيىس, – دەدى قازاقستان پرەزيدەنتى.
ن.گودۋنوۆا «100 ناقتى قادام» ۇلت جوسپارى اياسىندا جۇزەگە اسىرىلىپ جاتقان مەملەكەتتىك اۋديت جۇيەسىن الەمدىك ستاندارتتارعا ساي جاڭعىرتۋدىڭ بارىسى جونىندە باياندادى.
– قازىرگى ۋاقىتتا ەسەپ كوميتەتى ءوز جۇمىسىندا قارجىعا قاتىستى قۇقىق بۇزۋشىلىق فاكتىلەرىن انىقتاۋ تاجىريبەسىنەن گورى تيىمدىلىكتى باعالاۋعا باستى ءمان بەرىپ وتىر. ءبىز قارجىلىق قۇقىق بۇزۋشىلىققا نەگىز بولاتىن سەبەپتەردى انىقتاۋ ىسىندە اۋديت نىساندارىنا قولداۋ كورسەتەمىز جانە ءتيىستى ۇسىنىمدار بەرەمىز, – دەدى ەسەپ كوميتەتىنىڭ ءتورايىمى.
سونىمەن قاتار, ن.گودۋنوۆا قازاقستان پرەزيدەنتىنە مەملەكەتتىك باعدارلامالار مەن مەملەكەتتىك ورگانداردىڭ ستراتەگيالىق جوسپارلارىنا اۋديت جۇرگىزۋ جانە رەسپۋبليكالىق بيۋدجەتتى جوسپارلاۋ كەزىندەگى الدىن الا باعالاۋ جۇمىستارى جونىندە باياندادى.
كەزدەسۋ سوڭىندا ەلباسى رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ ءتورايىمى ناتاليا گودۋنوۆاعا بىرقاتار ناقتى تاپسىرما بەردى.
