2018 جىلدىڭ 15 قىركۇيەگىندە «الەۋمەتتىك مەديتسينالىق ساقتاندىرۋ قورى» كوممەرتسيالىق ەمەس اكتسيونەرلىك قوعامى اتىراۋ وبلىسى بويىنشا فيليالى جىل سايىنعى حالىقتى ەمحانالارعا تىركەۋ ناۋقانىن باستادى.
وبلىس بويىنشا 624 مىڭ ادام ەمحانالاردا تىركەۋدە تۇر. وتكەن جىلعى تىركەۋ ناتيجەسىندە 1725 ادام ىشكى تىركەۋگە تۇرسا, باسقا وڭىرلەردەن كەلگەن 579 ادام ەمحانالارعا تىركەلدى. قازىرگى تاڭدا حالىققا ىڭعايلى جاعداي جاسالعان. ءار ازامات ءوز ەركى بويىنشا ەمحانا تاڭداۋ قۇقىعىنا يە. اتالعان تىركەۋ ناۋقانىندا ەمحانادا تىركەلمەگەن تۇرعىندار تىركەۋگە تۇرىپ, جۇمىس ورنى,تۇرعىلىقتى جەرى نەمەسە وقۋ ورنىن اۋىستىرعان ازاماتتار ەمحانانى اۋىستىرا الادى. تۇرعىلىقتى مەكەن-جايىنا جاقىن ورنالاسقان ەمحاناعا تىركەلۋ تۇرعىندار ءۇشىن دە, دارىگەرلەر ءۇشىن دە قولايلى بولادى. تۇرعىنداردان ناۋقانعا بەلسەندى قاتىسۋلارىن سۇرايمىز,- دەيدى فيليال ديرەكتورى بايتوللا عازيزوۆ.
وبلىستا قوسىمشا ۋچاستكەلىك ەمحانالار سانى ارتقان. وبلىستىق دەنساۋلىق ساقتاۋ باسقارماسىنىڭ باسشىسى مانشۇك ايمۋرزيەۆانىڭ ايتۋىنشا, جاڭا ۋچاستكەلەردىڭ اشىلۋى وتە ءتيىمدى.
زاڭ بويىنشا ءبىر تاجىريبەلى دارىگەر ەسەبىندە تۇراتىن حالىق سانى 1700-دەن اسپاۋى كەرەك. وتكەن جىلى وبلىس بويىنشا ءبىر تاجىريبەلى دارىگەرگە 2560 ادامنان كەلسە, بۇگىنگە دەيىن جاڭا بولىمشەلەر اشىلىپ, تىركەلگەن ادام سانىن 2200-گە تۇسىردىك. جىل سوڭىنا دەيىن تاعى 35 دارىگەرلىك بولىمشەنى اشۋدى جوسپارلاپ وتىرمىز. ناتيجەسىندە 1 دارىگەرگە 1850 ادامنان تىركەلەتىن بولادى,- دەيدى باسقارما باسشىسى.
ەمحاناعا تىركەۋدىڭ ءۇش ءتۇرلى جولى بار:
- تاڭداپ العان ەمحاناعا تىكەلەي بارۋ,
- ەلەكتروندى ۇكىمەت پورتالى ارقىلى ونلاين رەجيمىندە,
- حالىققا قىزمەت كورسەتۋ ورتالىقتارىنداعى Connection point ءبولىمى ارقىلى.
ەمحانالارعا تىركەلۋ ءۇشىن تۇرعىندار جەكە ءتول قۇجاتى مەن ەمحانانىڭ باس دارىگەرى اتىنا ءوتىنىشىن تاپسىرادى. ال, ءوزى تاڭداعان ەمحاناعا اۋىسقىسى كەلەتىندەر ءۇشىن جەكە كۋالىك جەتكىلىكتى. باسقا قالالاردان نەمەسە مەملەكەتتەن كەلگەندەر ءۇشىن بۇرىنعى تىركەۋ ورنىنان انىقتاما تالاپ ەتىلەدى.
